رومیوں 3

1بس یہُودی ہووݨ دا کیا فائدہ ہے تے ختنہ ءچ کیا خُوبی ہے؟ 2ہر لحاظ نال بہُوں سارا ہے۔ خاص طور تے ایہ جو خُدا دا کلام اُنہاں دے سپُرد کیتا گئے۔ 3جے کُجھ بے وفا تھی گئے تاں کیا تھیّا؟ کیا اُنہاں دی بے وفائی دے سببّوں خُدا وفا داری کرݨ چھوڑ ڈیسی؟ 4ہرگز نئیں۔ بلکہ خُدا سچا ہے تے ہر بندہ کُوڑا ہے۔ جِینویں پاک کلام ءچ لِکھیا ہے جو

”تُوں آپنڑے گالھیں ءچ سچا ثابت ہوسیں

تے آپنڑے مقدمے ءچ جِتسیں#زبُور 51‏:4۔ ۔“

5پر ہُنڑ مَیں ہِک گالھ اِنسان وانگُوں اکھیندا ہاں۔ جے ساڈی بدی خُدا دی راستبازی ظاہر کریندی ہے تاں اساں کیا آکھوں؟ کیا ایہ جو خُدا ساڈے اُتے غضب نازل کر تے بے اِنصافی کریندے؟ 6ہرگز نئیں۔ جے اِینویں تھیوے تاں خُدا دُنیا دا اِنصاف کِینویں کریسی؟

7پر کوئی شاید ایہ آکھے جو ”جے میڈے کُوڑ دی وجہ کنُوں خُدا دی سچائی زیادہ ظاہر تھی تے اُوندا جلال ودھیندی ہے تاں وَل مَیں کیوں قصُوروار سمجھیا ویندا ہاں؟“ 8کیوں نہ ایہ آکھوں جو ”آؤ اساں بُرائی کرُوں تاں جو بھلائی تھیوے؟“ کُجھ لوک ساڈے اُتے اِلزام لیندے ہِن جو اساں ایہ تعلیم ڈیندے ہیں۔ پر ایجھے لوکاں دا مُجرم کھڑایا ونجنڑ اِنصاف ہے۔

کوئی نیکوکار نئیں

9بس اِیندا نتیجہ کیا ہے؟ کیا اساں یہُودی اُنہاں کنُوں چنگے ہیں؟ اصلُوں نئیں۔ اساں تاں پہلے ای آکھ ڈِتے جو یہُودی تے غیریہُودی سارے دے سارے گُناہ دے قبضے ءچ ہِن۔ 10جِینویں لِکھیا ہے جو

”کوئی نیک نئیں۔ ہِک وی نئیں۔

11کوئی سمجھدار نئیں۔

کوئی خُدا دا طالب نئیں۔

12سارے گُمراہ تھی گئے ہِن،

یکے کہیں کم دے نئیں ریہے۔

بھلائی کرݨ آلا کوئی نئیں۔ ہِک وی نئیں#زبُور 14‏:1‏-3۔۔

13اُنہاں دا گلا کُھلی قبر وانگُوں ہے۔

اُنہاں دی زبان فریب دے گالھیں کریندی ہے#زبُور 5‏:9۔۔

اُنہاں دے ہونٹاں اُتے نانگاں دا زہر ہے#زبُور 140‏:3۔ ۔

14اُنہاں دا مُنہ لعنت تے کڑواہٹ کنُوں بھریا ہے#زبُور 10‏:7۔۔

15اُنہاں دے پیر قتل کرݨ کیتے جلدی کریندے ہِن۔

16اُنہاں دے رستیاں ءچ تباہی تے مُصیبت ہے۔

17او امن دے رستے کنُوں واقف نئیں#یسعیاہ 59‏:7‏،8۔۔

18اُنہاں دے اکھیں ءچ خُدا دا ڈر کائنی#زبُور 36‏:1۔ ۔“

19بس اساں جانڑدے ہیں جو شریعت جیہڑا کُجھ آدھی ہے، اُنہاں کُوں آدھی ہے جیہڑے شریعت دے پابند ہِن، تاں جو ہر مُنہ بند تھی ونجے تے ساری دُنیا خُدا دے سامنڑے سزا دی حقدار ہووے۔ 20کیوں جو شریعت دے کم کر تے کوئی بندہ خُدا دی نِگاہ ءچ راستباز نئیں کھڑ سگدا بلکہ شریعت دے وسیلے گُناہ دی پچھاݨ تھیندی ہے۔

خُدا دے نال ساڈا رشتہ کِینویں بحال تھیندے

21پر ہُنڑ خُدا شریعت دے بغیر راستباز کھڑاوݨ دی ہِک راہ ظاہر کیتی ہے جیندی گواہی توریت تے نبیاں تُوں تھیندی ہے۔ 22یعنی خُدا دی او راستبازی جیہڑی یسُوع مسیح اُتے اِیمان گِھن آوݨ نال سبھ اِیمانداراں کُوں مِلدی ہے۔ یہُودیاں تے غیر یہُودیاں ءچ کوئی فرق نئیں، 23کیوں جو ساریاں گُناہ کیتا تے خُدا دے جلال کنُوں محروم ہِن۔ 24پر خُدا دے فضل دے سببّوں مُفت راستباز کھڑائے ویندے ہِن، اُوں خلاصی دے ذریعے جیہڑی یسُوع مسیح دے وسیلہ مِلدی ہے۔ 25خُدا اُونکُوں مقرر کیتا جو او آپنڑے خون دے سببّوں ایجھا کفارہ بنڑ ونجے جیہڑا اِیمان گِھن آوݨ آلے کیتے فائدہ مند ہووے۔ ایہ خُدا آپنڑی راستبازی ظاہر کرݨ کیتے کیتا، کیوں جو اُوں بہُوں صبر تے برداشت نال اُنہاں گُناہاں دی سزا نہ ڈِتی جیہڑے ماضی ءچ تھئے ہَن۔ 26بلکہ اِیں زمانہ ءچ وی آپنڑی راستبازی ظاہر کرݨ کیتے، کیوں جو او خود وی عادل ہے تے ہر بندے کُوں جیہڑا یسُوع اُتے اِیمان گِھن آندے، راستباز کھڑاوݨ آلا ہے۔

27بس فخر کِتھاں ریہا؟ اِیندی گُنجائش ای نہ ریہی۔ کیہڑی شریعت دی وجہ تُوں؟ کیا اعمال دے وسیلے نال؟ نئیں، بلکہ اِیمان دی شریعت دے وسیلے نال۔ 28اِیں واسطے اساں اِیں نتیجے اُتے پُجدے ہیں جو اِنسان شریعت اُتے عمل کرݨ نال نئیں بلکہ اِیمان گِھن آوݨ دے سببّوں راستباز کھڑایا ویندے۔ 29کیا خُدا صرف یہُودیاں دا خُدا ہے؟ کیا او غیریہُودیاں دا نئیں؟ بے شک او غیریہُودیاں دا وی ہے۔ 30کیوں جو ہِک ای خُدا ہے جیہڑا ختنہ تھئے ہوئیاں تے ختنہ نہ تھئے ہوئے لوکاں، ڈُوہائیں کُوں اُنہاں دے اِیمان دے وسیلے نال راستباز کھڑیسی۔ 31کیا اساں شریعت کُوں اِیمان دے سببّوں منسوخ کریندے ہیں؟ ہرگز نئیں بلکہ شریعت کُوں قائم رکھیندے ہیں۔

Currently Selected:

رومیوں 3: SKRV

Highlight

Copy

Compare