رومیوں 1

تعارف

1ایہ خط میں پولُس دی طرفوں ہے جیہڑا یسُوع مسیح دا خادم ہاں۔ میں رسُول ہووݨ کیتے سڈیا گِیا ہاں تے خُدا دی خوشخبری سُناوݨ کیتے مقرر کیتا گِیا ہاں۔

2اِیں خوشخبری دا وعدہ خُدا بہُوں پہلے کنُوں آپنڑے نبیاں دی معرفت پاک کلام ءچ 3آپنڑے پوتر دے بارے ءچ کیتا، جیہڑا جِسمانی لحاظ نال تاں داؤد دی نسل ءچوں ہا، 4پر پاکیزگی دے رُوح دے لحاظ نال مُردیاں ءچوں زندہ تھیوݨ دے سببّوں وڈی قُدرت نال خُدا دا پوتر ثابت تھیّا۔ ایہ ساڈا خُداوند یسُوع المسیح ہے، 5جیندے وسیلے تے ناں دی خاطر ساکُوں فضل تے رسُول ہووݨ دی ذمہ داری مِلی، تاں جو سبھ قوماں ءچوں لوک اِیمان گِھن آ تے یسُوع دے تابع تھی ونجنڑ۔ 6تے تُساں وی اُنہاں لوکاں ءچ شامل ہیوے جیہڑے یسُوع مسیح دے لوک ہووݨ کیتے سڈے گئے ہِن۔

7ایہ خط اُنہاں سارے خُدا دے پیاریاں دے ناں ہے جیہڑے روم ءچ ہِن تے مُقدّس تھیوݨ کیتے سڈے گئے ہِن۔ ساڈے باپ خُدا تے خُداوند یسُوع المسیح دی طرفوں تُہاکُوں فضل تے اِطمینان حاصل تھیندا راہوے۔

شُکرگزاری دی دُعا

8پہلے تاں مَیں تُساں ساریاں کیتے یسُوع مسیح دے وسیلے نال آپنڑے خُدا دا شُکر کریندا ہاں جو تُہاڈے اِیمان دی مشہوری ساری دُنیا ءچ تھیندی پئی ہے۔ 9خُدا جیندی خدمت مَیں دل و جان نال اُوندے پوتر دی خوشخبری سُنڑا تے کریندا ہاں، میڈا گواہ ہے جو مَیں تُہاکُوں آپنڑیاں دُعاواں ءچ ہمیشاں یاد کریندا ہاں۔ 10تے آپنڑیاں سبھ دُعاواں ءچ ایہ درخاست کریندا ہاں جو آخر کار خُدا دی مرضی نال مَیں تُہاڈے کولھ آ سگاں۔ 11کیوں جو مَیں تُہاکُوں مِلنڑ دی بہُوں سِک رکھیندا ہاں تاں جو تُہاکُوں کوئی ایجھی رُوحانی نعمت ڈے سگاں جیہڑی تُہاڈے اِیمان دی مضبوطی دا سبب بنڑے، 12یعنی ایہ جو تُہاڈے نال میکُوں وی اُوں اِیمان دے سببّوں تسلی مِلے جیہڑا تُہاڈے تے میڈے ڈوہائیں ءچ ہے۔

13بِھراؤ، مَیں نئیں چاہندا جو تُساں اِیں گالھ کنُوں ناواقف راہو جو مَیں کئی پھیری تُہاڈے کولھ آوݨ دا اِرادہ کیتا، تاں جو جِینویں ڈُوجھیاں غیر قوماں ءچ میڈی خدمت پھل گِھن آئی، تُساں ءچ وی گِھن آوے، پر مَیں اَج تئیں رُکیا ریہا۔ 14مَیں یُونانیاں تے غیر یُونانیاں، داناواں تے ناداناں ڈوہائیں دا قرض دار#1‏:14 بھانویں ادبی یُونانی ہووݨ یا باقی قوماں دے غیر ادبی لوک ہووݨ، سبھ غیر قوماں کُوں خوشخبری سُنڑاوݨ پولُس دا فرض ہا۔ ہاں۔ 15اِیں واسطے مَیں تُہاکُوں وی جیہڑے روم ءچ ہیوے خوشخبری سُنڑاوݨ دی بہُوں سِک رکھیندا ہاں۔

اِنجیل دی قُدرت

16مَیں خوشخبری کنُوں نئیں شرمیندا کیوں جو او ہر اِیمان گِھن آوݨ آلے دی نجات کیتے خُدا دی قُدرت ہے، پہلے یہُودی کیتے#1‏:16 خوشخبری پہلے یہُودیاں کُوں سُنڑائی گئی ہئی۔، وَل غیریہُودی کیتے۔ 17کیوں جو خوشخبری خُدا دی راستبازی#1‏:17 اِتھاں اِیندا مطلب خُدا دی آپنڑی راستبازی نئیں بلکہ خُدا دی نظر ءچ راست بنڑنڑاں ہے، یعنی اُوندے مقبول لوک بنڑݨ دا رستہ جیہڑا خُدا خود یسُوع مسیح دے وسیلے مُہیا کیتے۔ کُوں ظاہر کریندی ہے، او راستبازی جیہڑی اِیمان ای دے ذریعے حاصل تھیندی ہے، جِینویں پاک کلام ءچ لِکھیا ہے جو ”راستباز اِیمان نال زندہ راہسی#حبقُّوق 2‏:4۔۔“

اِنسان دی خطا کاری

18پر خُدا دا قہر اُنہاں لوکاں دی ساری بے دینی تے بدکاری اُتے اسمان کنُوں ظاہر تھیندے جیہڑے سچائی کُوں آپنڑی بدکاری نال دبا ڈیندے ہِن، 19کیوں جو خُدا دے بارے ءچ جیہڑا کُجھ وی معلوم تھی سگدے او اُنہاں کیتے ظاہر ہے، اِیں واسطے جو خُدا آپ اُونکُوں اُنہاں اُتے ظاہر کر ڈِتے۔ 20کیوں جو دُنیا دی پیدائش کنُوں گِھن تے اَج تئیں خُدا دیاں اَن ڈِٹھیاں صفتاں یعنی اُوندی ابدی قُدرت تے اِلٰہی ذات، بنڑائیاں ہوئیاں چیزاں کنُوں صاف ڈِکھالی ڈیندیاں ہِن۔ اِیں واسطے اِنسان دے کولھ کوئی بہانہ نئیں۔ 21بے شک او خُدا دے بارے ءچ جانڑدے تاں ہَن پر اُنہاں اُوندی خُدائی دے لائق اُوندی تمجید تے شُکرگزاری نہ کیتی بلکہ او فضول سوچاں ءچ پے گئے تے اُنہاں دے ناسمجھ دِلاں اُتے اندھارا چھا گِیا۔ 22او عقلمند ہووݨ دا دعویٰ کریندے ہَن، پر بیوقُوف نِکلے۔ 23تے غیرفانی تے جلالی خُدا دی بجائے فانی اِنسان، پکھیاں، ڈھورڈنگراں تے کیڑے مکوڑیاں دی پُوجا کیتی۔

24اِیں واسطے خُدا وی اُنہاں دے دِلاں دیاں بُریاں خواہشاں دے مطابق اُنہاں کُوں ناپاکی ءچ چھوڑ ڈِتا تے نتیجے ءچ اُنہاں آپنڑے جسماں کُوں آپس ءچ بے حُرمت کیتا۔ 25اُنہاں خُدا دی سچائی کُوں کُوڑ نال بدّل ڈِتا تے مخلوقات دی زیادہ عبادت تے خدمت کیتی، بجائے خالق دی جیہڑا ہمیشاں تئیں تمجید دے لائق ہے۔ آمین۔

26اِیں واسطے خُدا اُنہاں کُوں شرمناک خواہشاں ءچ چھوڑ ڈِتا۔ اِتُھوں تئیں جو اُنہاں دیاں عورتاں آپنڑے فطرتی جنسی تعلقات کُوں غیر فطرتی تعلقات ءچ بدّل ڈِتا۔ 27اِینویں ای مرد وی عورتاں نال آپنڑے فطرتی جنسی تعلق کُوں چھوڑ تے آپس ءچ مست تھی گئے یعنی مرداں، مرداں نال بُرائی کیتی تے اُنہاں آپنڑے آپ ءچ آپنڑی گُمراہی دے لائق سزا پاتی۔

28تے جِینویں اُنہاں خُدا کُوں جاننڑاں پسند نہ کیتا، اِینویں ای خُدا وی اُنہاں کُوں گندے خیالاں دے حوالے کر ڈِتا جو نامناسب کم کرݨ۔ 29او ہر طرحاں دی ناراستی، بدی، لالچ، ناانصافی، حسد، قتل، جھیڑے، فریب تے بُغض نال بھریج گئے۔ او چغلی کرݨ آلے، 30کُوڑے اِلزام لاوݨ آلے، خُدا تُوں نفرت کرݨ آلے، گُستاخ، مغرُور تے شیخی باز، بدی دے بانی، آپنڑے ماء پِیُو دے نافرمان، 31بیوقُوف، بے وفا، محبت تُوں خالی تے بے رحم تھی گئے۔ 32بھانویں او خُدا دا ایہ حُکم جانڑدے ہِن جو ایجھے کم کرݨ آلے موت دی سزا دے حقدار ہِن، وَل وی نہ صرف او آپ اِیہو کم کریندے ہِن بلکہ ایجھا کم کرݨ آلے کُوں چنگا سمجھدے ہِن۔

Currently Selected:

رومیوں 1: SKRV

Highlight

Copy

Compare