लुका 12
12
कपट पाकालाइहेङ इसुको चेतानि
(मत्ति १०:२६-२७)
1इङको पहर इन्ता गान्दिलि मादोपाङ हेन्जाङ द्याङगेलाइ जोम्नाङसिङ मिचामिच दोङ ज्याङभाइपा जेङका हिघाहि। कालाउ इङको पहर इसु लाम्फा ताइको चात्यागेलाइहेङ दोअ्हि, “नेलाइ फरिसिगेलाइको तोले फुलिपाका साउरिसो जोगितेङ हिसु! इङको साउरि नेलाइको कपटि आनिबानि।#मत्ति १६:६; मरकुस ८:१५ 2हाइदोनु थुमन्हाका काथा जेथे हि, इङको गोताङ एअ्नि तिनावा। म्होअ्न्हाका काथा जेथे हि, इङको गोताङ परमेस्वर तिमप्यावा।#मरकुस ४:२२; लुका ८:१७ 3नेलाइ कितिकितिकाता दोअ्का काथागेलाइ फाइसालाम्काता झाराङ हिनावा। कोठालिअ्ता सिकापा दोअ्का काथा साअ्को चाल्हासो पारचार जेनावा।”
परमेस्वरदोफा थिसु
(मत्ति १०:२८-३३; १२:३२)
4इसु आरोङ दोअ्हि, “काङको सानाइतिगेलाइ, का नेलाइहेङ दोअ्ताङका, नेलाइहेङ सेअ्लि खाङका द्याङगेलाइदोफा माथिसु। एम्बालाइ ते नेलाइको जिउहेङ खिनिङ सेअ्लि द्वावा कालाउ नेलाइको हाङसाहेङ एम्बालाइ हाइदोङ पालि माद्वावा। 5का नेलाइहेङ दोअ्खा, परमेस्वरदोफा खिनिङ थिसु। हाइदोनु वाकोदोफा खिनिङ जिउहेङ सेअ्तेङ नरकता थालपिका सरबङ हि। इदोइभाअ्सिङ वाकोदोफाङ दोङ थिसु! 6कालाउ खाङसु, न्हे टाकाता नालोङ सारन्या माबिकाइखे कुनु? बागाराइ इदोइझोको सस्तो हिलाउ बुङ परमेस्वर एलोङहेङ बुङ मानिल्खे। 7हाइदोनु परमेस्वर नेलाइको एलोङ एलोङपा पुरिङको पुसिङ सुदाङ गान्देका हि। एन्साङ माथिसु, नेलाइते बागाराइ खान्तेङ हेन्जा मोलको हिसुन्हा।
8 “का नेलाइहेङ दोअ्ताङका, जाइ कासेहेङ द्याङको आगाता काङको प्रभु दोअ्तेङ स्विकार पावा, वासेहेङ का द्याङको चान बुङ स्वरगदुतको आगाता ताइको दोअ्तेङ मन्जुर पाङका। 9कालाउबुङ जाइ कासेहेङ द्याङगेलाइको आगाता मानाल्खा दोअ्तावा, इङकोहेङ का बुङ परमेस्वरको स्वरगदुतगेलाइको आगाता मानाल्खा दोअ्ताङका। 10कालाउ का द्याङको चानको खिलापता धुइकालाइ माफ निनावा। कालाउ जाइ पुनित हाङसाको खिलापता बादानामि पातेङ धुइखे वा हेअ्लाउ बुङ छमा मानिनावा।#मत्ति १२:३२; मरकुस ३:२९
11 “जेलाउ एम्बालाइ नेलाइहेङ कचहरिसाअ्गेलाइता, हाकिमगेलाइकोता रो निया पाका थामेता चुमावा, कालाउ नेलाइ हेसापा रो हाइ दोअ्लिगोयाङ दोअ्तेङ सुरता मापासु। #
मत्ति १०:१९-२०; मरकुस १३:११; लुका २१:१४-१५ 12उदोङघरि पुनित हाङसा नेलाइहेङ दोअ्लिगोइका काथा धिरपावा।”
बुदि मान्थुका धनि द्याङ
13कालाउ हेन्जाङ द्याङगेलाइको माझासो एअ्मि द्याङ इसुहेङ दोअ्हि, “मास्टर, ‘ओनेको ताइको भाग खेङपि’ दोअ्तेङ काङको दादाहेङ दोअ्पि।” 14कालाउ इसु वासेहेङ दोअ्हि, “निधिमिको आङसा बाखाराइपिलि कासेहेङ हासु दिङगिल्हि?” 15वा एम्बालाइहेङ दोअ्हि, “होस पासु, गोताङ खाल्को इछासो जोगिका काम पासु, हाइपानु द्याङको जिबन वाको टाका काउरि जेथे दोङ हेन्जा हिलाउ बुङ इङको द्याङहेङ जातिङको जिबनचाहिँ माप्यावा।”
16इङकोन्हुअ्सो इसु एलोङ उदारनको रुपता इस्का काथा दोअ्हि, “एअ्मि धनि द्याङको मिलिङता हेन्जा उब्जनि जेङहि। 17वा ताइको मन्ताङ बिचार पाहि, ‘या गोताङ उब्जनि हिता ताअ्लि वाला? थामेदोङ मान्थु। हाइपालि?’ 18कालाउ एला वा एसा पाङका दोअ्तेङ ताइको मनता बिचार पाहि इदोइ आतुतुइका उब्जनि ताअ्का थामेगेलाइ र्हाअ्तेङ बाबारका बान्हायाङका। कालाउ इन्ताङ गोताङ उब्जनि ताअ्ताङका। 19इङकोन्हुअ्सो वा ताइमिहेङ दोअ्तावा, ‘का हेथे भागेमानि हिघा! काङकोदोफा बाअ्सार बाअ्सारथिकापा थेम्का उब्जनि हि। कालाउ चाङका, आमाङका रो सुखता ह्याङका।’
20 “कालाउ परमेस्वर वासेहेङ दोअ्हि, ‘ओइ बुद्धिमान्थुका द्याङ, नानिङ न्हिसिङताङ नाङको पारान हानावा। कालाउ नाङको जोम्पातेङ ताअ्का टाका काउरि हासु चावा?’” 21कालाउ इसु इदोइ उदारन दोपातेङ दोअ्हि, “ताइको भाअ्सिङ टाका काउरि जोम्पातेङ ताअ्का द्याङको गति इस्का दोङ ज्यावा। परमेस्वर इस्कालाइहेङ टाका काउरि हिका फोम मापाखे।”
स्वरगको सारभि भोसु रो पिर मापासु
(मत्ति ६:२५-३४)
22इङकोन्हुअ्सो इसु चात्यागेलाइहेङ दोअ्हि, “एन्साङ का नेलाइहेङ दोअ्ताङका बान्चिलिको भाअ्सिङ हाइ चाङका हाइ लागायाङका दोअ्तेङ सुरता मापासु। 23हाइदोनु चाकाआनेमानेखान्तेङ जिबन दोङ बारका रो धाबाखेन्ताराखान्तेङ जिउदोङ बारका। 24काह्वागेलाइहेङ खाङसु! एम्बालाइ मिलिङ बुङ माचोइखे, रोपाबुङ माथिङखे, कालाउ बालि नालि चेतेङ भाकारता बुङ मासान्तेखे। कालाउ परमेस्वर एम्बालाइहेङ चापादोङखे। खाङसु, नेलाइते इङको जिह्याँ जुइलेङ खान्तेङ बुङ हेन्जाङ मोलको हिसुन्हा।
25 “हाइ नेलाइता हासु बुङ सुरतापातेङ ताइको आयु एअ्घुरिको भाअ्सिङ बार्हेपालि दोस्वाना? 26इदिझोको म्हुइका काम बुङ पालि मादोनु ते बो काथाको सुरता हाइपालि पासुखेना? 27झारगेलाइता भारका लिलि ल्हेअ्हेङ खाङसु, एम्बालाइ ते काम बुङ मापाखे रो लागाइलिको भाअ्सिङ धाबा बुङ माथिरखे। कालाउ का नेलाइहेङ दोअ्ताङका, सोलोमन राजादोफा ओथेमाम्फा टाका काउरि हिलाउ बुङ वा ते इङको ल्हेअ्गेलाइ भाइपा साजितेङ माहिघाहि।#१ राजा १०:४-७; २ इतिहास ९:३-६ 28नानि माउलाइका कालाउ जुम्नि दोङ चुअ्तेङ ओअ्पाका घासिहेङ बुङ परमेस्वर एसापा वास्तापाखे दोअ्लाउ हाइ वा झन नेलाइहेङ वास्ता मापावा कुनु? खोइ नेलाइको खान्धुर? 29हाइ चाङका रो हाइ लागायाङका दोअ्तेङ भोतेङ माहिसु कालाउ इङकोको भाअ्सिङ सुरता बुङ मापासु। 30परमेस्वरहेङ मानाल्कालाइ कि इस्का सुरता पाखे। इदोइ गोताङ सामान नेलाइहेङ गोयाङ दोअ्तेङ परमेस्वर आबा दोङ ग्यावा। 31कालाउबुङ लाम्फा परमेस्वरको सारभिहेङ भोसु कालाउ वा इदोइ गोताङ थोक नेलाइहेङ थपिप्यावा।”
स्वरगको टाका काउरि
(मत्ति ६:१९-२१)
32इसु ताइको चात्यागेलाइहेङ दोअ्हि, “ओइ म्हुइका जेरको काङको चात्यागेलाइ, नेलाइ माथिसु! हाइदोनु परमेस्वर आबा नेलाइहेङ ताइको सारभि पिलि लेङचाका हि। 33नेलाइदोफा हिका टाका काउरि पिअ्तेङ गरिबगेलाइहेङ पिसु। ताइको भाअ्सिङ हेअ्लाउ मादोका टाका काउरि स्वरगता जोम्पासु। इन्ता ते खुकालाइ बुङ खुलि माद्वावा रो पेअ्सा बुङ माचावा। 34हाइदोनु जेता नेलाइको टाका काउरि हि, इन्ताङ नेलाइको मन बुङ ह्यावा।”
चोङखो जेङतेङ हिसु
35इङकोन्हुअ्सो इसु दोअ्हि, “ताइको केङखेने जिङतेङ त्यार जेङतेङ हिसु रो गेसागेलाइ जोलाइतेङ ताअ्सु।#मत्ति २५:१-१३ 36नेलाइ बिहुचातेङ घुरिका मालिकको दामा खाङतेङ हिका कामत्यागेलाइ भाइपा जेङसु। मालिक लोतेङ द्वार चालापातेङसाङ ओबालाइ द्वार हेप्यावा।#मरकुस १३:३४-३६ 37कालाउ मालिक लोलाउ नाङघातेङ हिका इङको कामत्यागेलाइ च्याबासि निनावा। जातिङको का नेलाइहेङ दोअ्ताङका, इङको मालिक बान्सालाइहेङ भाइपा बान्सा बुझाइलि त्यार ज्यावा। कालाउ इङको कामत्यागेलाइहेङ रेम्फा योम्पातेङ चापावा।
38 “कालाउ मालिक बेलोमतेङ आधान्हिसिङता लोलाउ बुङ; झेङलि तोम्तेङ लोलाउ बुङ; ताइको कामत्यागेलाइहेङ नाङघातेङ हिका तिङनु वा झन हेन्जा च्याबासि प्यावा।
39 “कालाउ इदोइ फोमपातेङ ताअ्सु, खुकालाइ लोका बेला गिनु ते साअ् धनि खुकालाइहेङ साअ्ता दुल्लि दोङ मापिधावा। #
मत्ति २४:४३-४४
40एन्साङ नेलाइ बुङ चालाक जेङतेङ हिसु। हाइदोनु का द्याङको चान हिदोइ पहर ल्वाङका नेलाइ मामा गिस्वाना।”
इमानि रो बाइमानि कामत्याको उदारन
(मत्ति २४:४५-५१)
41कालाउ पत्रुस इसुहेङ हिअ्हि, “प्रभु, ना या काथा केलाइहेङ खिनिङ दोअ्का ना बो झाराङको भाअ्सिङ?” 42प्रभु दोअ्हि, “आकिल हिका रो कामता साअ्लिदोका खाजान्चिचाहिँ हिसिका द्याङ वाला? मालिक ताइको साअ्को गोताङ कामकाजको जिमा पिकान्हुसो वा बो कामत्यागेलाइहेङ उचित पहरता चाकाचिज मिलिपापिखे। 43मालिक घुरितेङ लोलाउ इङको कामत्याहेङ इन्सिकाङ काम पातेङहिका निङलाउ मालिक वासेहेङ च्याबासि प्यावा। 44जातिङको का नेलाइहेङ दोअ्खा, मालिक इङको खाजान्चिहेङ ताइको गोताङ ताका काउरि जिम्मा लागायावा। 45कालाउ खाजान्चिको मालिक न्हुअ्सो खिनिङ घुर्यावा दोअ्का फोमपातेङ जेसोओसोङ आम्तेङ बो कामत्या चाकरगेलाइहेङ दान्हाइतेङ हिनुते 46वाको मालिक वाको माचिताइका पहरता लोतेङ वासेहेङ बारका दार प्यावा रो वाको गति परमेस्वरहेङ मामानिकालाइको भाइपाङ ज्यावा।
47 “मालिकको इछा गितेङ बुङ पालिगोइका काम मापाका कामत्याहेङ मालिक लोतेङ बारका साजाइ प्यावा। 48कालाउ जाइ मालिकको इछा मागिसिङ साजाइ निङलिगोइका काम पाका कामत्याहेङ वा आतुइसा साजाइ प्यावा। जाइहेङ हेन्जा पिका हि, वा हेन्जा पिलिगोयावा। एन्साङपातेङ जाइहेङ हेन्जा जिम्मा पिका हि, वादोफा झन हेन्जा र्हेकावा।”
जाहान खेङन्हाका
(मत्ति १०:३४-३६)
49इसु दोअ्हि, “का सुमिङता मे धोलि लोघा रो लाम्फादोङ मे ल्होनु ते रेम्काङ जेङधाङ! 50का एलोङ तु:को चिभुअ्लि र्हुलिगोयाङ। इङको चिभुअ्लि मार्हुपाधाउ कासेहेङ सान्ति दोङ माज्यावा।#मरकुस १०:३८ 51हाइ नेलाइ का सुमिङता मिलि पालि लोघा दोअ्तेङ गिसुखेना? माको, काते खेङलि कि लोघा। 52एलासो एलोङ नामिको परिबारता ताताइमिङ खेङन्हावा। सुमि न्हेमिको खिलापता रो न्हेमि सुमिको खिलापता ल्होकावा। 53एन्साङपातेङ आबा चानको खिलापता रो चान आबाको खिलापता, आमाइ चामिन्दिको खिलापता रो चामिन्दि आमाइको खिलापता, जुबे नामाको खिलापता रो नामा जुबेको खिलापता ल्होकावा।”#मिका ७:६
पहरको चिनो
(मत्ति १६:२-३; ५:२५-२६)
54कालाउ इसु इन्ता जोम्तेङ हिका द्याङगेलाइहेङ दोअ्हि, “नेलाइ दिहेँ बादेल तिन्तेङसाङ, ‘एला वाइ ल्वाङ’ दोअ्स्वाना कालाउ वाइ बुङ ल्वावा। 55माहेँसो भेरमा लोलाउ एला भेमावा दोअ्न्हाखे, कालाउ एन्साङ ज्यावा। 56ओइ चिम्काटागेलाइ! नेलाइ बादेल रो सुमिङ खाङतेङ वाइ ल्वाङ बे माल्वाङ दोअ्तेङ गिलि ते दोस्वाना। कालाउबुङ इदोइ पहरता जेङलि लोका घाटानाको चिनोचाहिँ नेलाइ हाइपालि मागिसुखेना? 57हिदोइ काथा ठिक हि, हिदोइ काथा बेठिक हि दोअ्तेङ नेलाइ ताइमिङ हाइपालि बिचार मापासुखेना?
58 “हासु बुङ नाङकोर्हुता आदालतता मुदा चालाइतेङ निया पाकाकोता चुमपुनु दामाताङ झागारियादोफा मिलिलि बल पासु। माकुनु वा नासेहेङ निया पाकाकोता आगाता जाअ्पावा कालाउ वा पलटनहेङ जिम्मा प्यावा। एन्सालाउदोङ पलटन नासेहेङ चुमपुतेङ थुनाता व्हाअ्तावा। 59हाइदोनु का नासेहेङ दोअ्ताङका, तिरिलिगोइका गोताङ टाका मातिरिपाधाउ ना इन्तासो खाअ्लि मानिनाना।”
Currently Selected:
लुका 12: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
