लुका 11
11
इसुको धिरपाका पारथाना
(मत्ति ६:९-१३; ७:७-११)
1एअ्नि प्रभु इसु एलोङ थामेता पारथाना पातेङ हिघाहि। पारथाना पालि दोकान्हुअ्सो वाको एलोङ चात्या दोअ्हि, “प्रभु, युहन्ना ताइको चात्यागेलाइहेङ पारथाना पालि धिरपाकाभाइपाङ केलाइहेङ बुङ धिरपा।” 2इसु एम्बालाइहेङ दोअ्हि, “नेलाइ एसापा पारथाना पासु:
ओइ परमेस्वर आबा,
नाङको मिङ पुनित ज्याको,
नाङको सारभि ल्वाको,
3 दिनाङ गोइका चाका आनेमाने केलाइहेङ दिनाङ पि।
4 केलाइको पाका पाप माफ पापि
हाइदोनु केलाइको खिलापता पाप पाका झाराङहेङ केलाइ बुङ माफ पिन्हाखे।
कालाउ जाचसो केलाइहेङ बान्चिपा।”
5कालाउ इसु चात्यागेलाइहेङ आरोङ दोअ्हि, “एअ्मि द्याङको एअ्मि सानाइति हिघाहि। वा आधान्हिसिङता सानाइतिकोता हानितेङ दोअ्तावा, ‘ओइ सानाइति, कासेहेङ सुम्लोङ तोले खिल्लि पि। 6हाइदोनु काङको साअ्ता दुरेसो एअ्मि बान्सालाइ लोका हि। कालाउ वासेहेङ चापालि भाअ्सिङ कादोफा हाइदोङ मान्थु।’ 7कालाउ वाको सानाइति साअ् लिअ्तासो दोअ्हि, ‘कासेहेङ तु:मापि, फिनु गिअ्तेङ जामालाइदोफा जिम्लिदोहोइका। एला का ल्होतेङ नासेहेङ हाइदोङ पिलि माद्वाङका।’” 8इदोइ दोअ्लिदोतेङ इसु एम्बालाइहेङ दोअ्हि, “वा सानाइति दोअ्तेङ मापिलाउ बुङ वा र्हेका र्हेकाङ पानु वा ल्होकावा रो र्हेका झोको गोताङ वासेहेङ प्यावा।
9 “एन्साङ का नेलाइहेङ दोअ्खा, र्हेसु कालाउ नेलाइ निङस्वाना। भोसु कालाउ नेलाइ निङस्वाना। चालापासु कालाउ नेलाइको भाअ्सिङ फिनु हेनावा। 10हाइदोनु जाइ र्हेकावा वा निनावा। कालाउ जाइ भोकावा वा निनावा। जाइ चालापावा वाको भाअ्सिङ फिनु हेनावा। 11नेलाइता हासु इस्का आबा बुङ हि वाला, जाइको चान हाया र्हेनु पुह्याँ प्यावा? 12कालाउ तुइ र्हेनु बिच्छि प्यावा? 13नेलाइ पापि हिलाउ बुङ ताइको चानचामिन्दिहेङ रेम्का सामान पिलि गिसुन्हा पानु स्वरगता हिका आबा र्हेकालाइहेङ झन हेन्जा पुनित हाङसा माप्यावा कुनु?”
इसु रो बालजिबुल
(मत्ति १२:२२-३०,४३-४५; मरकुस ३:२०-२७)
14एअ्मि द्याङहेङ मासान लाटा बान्हाइका हिघाहि। कालाउ इसु वाकोलिअ्ता हिका मासान ओल्हिपापिकान्हुअ्सो इङको द्याङ नुइधुइलि तेङहि। इदोइ तिङतेङ द्याङगेलाइ भारभुसाइहि। 15एम्बालाइता आधिमि दोअ्हि, “याते मासानको राजा बालजिबुलको सरबङसो मासानगेलाइ ओल्हिपाखे।”#मत्ति ९:३४; १०:२५ 16आधिमि वाको जाच पालिभाअ्सिङ दोअ्हि, “इदोइ काम परमेस्वरको सरबङसो पाका नु ते केलाइहेङ स्वरगसो एलोङ भारभुसाइका काम तिम्पापि।”#मत्ति १२:३८; १६:१; मरकुस ८:११ 17एम्बालाइको मन गितेङ इसु दोअ्हि, “हिदोइ बुङ सारभिता मिलाप मान्थुनु इङको ताइमिङ मुअ्न्हाखे। ताइमिङलिअ्ता मिलाप मान्थुका साअ् बुङ मुअ्न्हाखे। 18कालाउ साइतान ताइको बिरोध ताइमिङ पानुते वाको सारभि हेसापा टिकिलि द्वावा? नेलाइ कासेहेङ मासानको राजा बालजिबुलको सरबङहोइ मासान ओल्हिपाखे दोअ्सुखेना। 19एन्सानु नेलाइको ताइको चात्यागेलाइ हासुको सरबङहोइ ओल्हिपाखे कुनु? नेलाइको ताइको चात्यागेलाइ दोङ नेलाइको पाका गल्ति काथा तिम्पाप्यावा। 20का परमेस्वरको सरबङसो मासान ओल्हिपाखा पानु स्वरगको सारभि नेलाइको माझाता लोहोइ। 21एअ्मि बोल्याका द्याङ काति भिरितेङ वाको साअ् खाङपिनु ते वाको आनेमाने मारामावा। 22कालाउ वाखान्तेङ बोल्याका द्याङ लोनु ते वासेहेङ जित्यावा। वाको भर पाका हातियारगेलाइ रो आनेमानेगेलाइ बुङ घिङतेङ चुमप्वावा। कालाउ आनेमाने बुङ घिङतेङ चुमपुतेङ ताइको सनाइतिगेलाइ दोफा बाखारायावा। 23कादोफा मामिलिका द्याङ काङको बिरोधि जेङखे। कासेहेङ जोम्पालि मासाघाइका द्याङ जोम्पाका बुङ राइन्हा पापिखे।#मरकुस ९:४०
24 “हिदोइ बुङ द्याङसो मासान ओल्हितेङ वा उदादाङका थामेभारि हानितेङ हिलिको भाअ्सिङ रेम्का थामे भोगिल्खे। रेम्का थामे हिसो बुङ मानिङनु ‘लाम्फाको द्याङकोता दोङ हानाङका’ दोअ्तेङ घुरितेङ लोखे। 25इन्ता थुकालिलोलाउ मासान लाम्फाको साअ् साफा सुघ्घर जेङका तिङखे। 26इदोइ तिङतेङ वा बो न्हिअ्लोङ ताइमिखान्तेङ बुङ झन हेन्जाङ मारेम्का मासानगेलाइहेङ काइतेङ चुमाखे। कालाउ एम्बालाइ झाराङ लिअ्ता दुल्तेङ बासा ह्यावा। इङकोन्हुअ्सो इङको द्याङको न्हुअ्सोको आवास्ता लाम्फाको खान्तेङ झन मारेम्का ज्यावा।”
जातिङको सुख
27इसु काथा पाकाताङ पालाउ द्याङको हुलसो एअ्मि बेबाल र्हिकाइतेङ दोअ्हि, “नासेहेङ जोल्माइका रो दुदु आम्पाका आमाइ हेथे सहसाम्पा निङका हि।” 28इदोइ हिङतेङ इसु दोअ्हि, “इन्सिका माको भुरुङ परमेस्वरको बिद्या हिङतेङ मानिकालाइ हेथे सहसाम्पा निङका जेनावा।”
द्याङगेलाइ भारभुसाइका चिनो खाङलि भोका
(मत्ति १२:३८-४२)
29इन्ता द्याङगेलाइको चेअ्सुमेअ्सुका पोङघातेङ हानिलाउ इसु दोअ्हि, “एलाको द्याङगेलाइ हेथे दुरजन हि। एबालाइ चिन्हो खाङलि भोखे, कालाउबुङ योनाको चिन्होबिना एबालाइ बो हिदिङ चिन्हो तिङलि मानिनावा।#मत्ति १६:४; मरकुस ८:१२ 30योना जेसापा निनबे पुरको द्याङगेलाइको भाअ्सिङ चिनो जेङकाभाइपा आन्जि नानिको द्याङगेलाइको भाअ्सिङ का द्याङको चान दोङ चिनो ज्याङका।#योना ३:४ 31नियाको दिनाता माहेँको सेबा मुलुकको रानि जाअ्तेङ आन्जि नानिको द्याङगेलाइहेङ दुस्यावा हाइदोनु सोलोमन राजाको आकिलको काथा हिङलि वा हेन्जाङ दुरेसो धावाइतेङ लोहि। कालाउबुङ खाङ, राजा सोलोमनखान्तेङ बुङ बारका एअ्मि इता हि।#१ राजा १०:१-१०; २ इतिहास ९:१-१२ 32नियाको दिनाता निनबे पुरको द्याङगेलाइ जाअ्तेङ एलाको द्याङगेलाइहेङ दुस्यावा, हाइदोनु योना परमेस्वरको बिद्या पारचार पालाउ एम्बालाइ पास्ताइहि। कालाउबुङ खाङ, योनाखान्तेङ बुङ बारका एअ्मि इता हि।”#योना ३:५
जिउको गेसा
(मत्ति ५:१५; ६:२२-२३)
33 “गेसा जोलाइतेङ हासु बुङ पाथिहोइ माथुम्खे कालाउ म्होअ्तेङ बुङ माताअ्खे। भुरुङ लिअ्ता लोका द्याङहेङ फाइसालाम्ताको दोअ्तेङ झाउका थामेता ताअ्पिखे। #
मत्ति ५:१५; मरकुस ४:२१; लुका ८:१६ 34नाङको मिको दोङ नाङको जिउको गेसा। नाङको मिको रेम्फा तिङनु ते गोताङ जिउदोङ फाइसालामावा। कालाउबुङ नाङको मिको बिगिरका हिनुते नाङको गोताङ जिउदोङ कितिकितितावा। 35इङकोभाअ्सिङ होसियार जेङसु, नेलाइको मनको गेसा हेअ्लाउ मास्याको। 36नाङको जिउको हिदि बुङ भाग कितिकितिकाता माहिसिङ फाइसालाम्का हिनुते इङको गोताङ फाइसालाम्तावा। जेसापा गेसाको फाइसालाम्का नाङकोर्हुता जोलावा।”
फरिसि रो धरम मास्टरगेलाइहेङ इसुको चेतानि
(मत्ति २३:१-३६; मरकुस १२:३८-४०)
37इसु इदोइ काथा दोअ्लिदोतेङ एअ्मि फरिसि द्याङ वासेहेङ वाको साअ्ता उम चालि काइहि। कालाउ इसु वाको साअ्ता हानितेङ चालि योम्हि। 38इसु ताइको खुर माझासिङ चालि योम्का तिङतेङ वासेहेङ चालि काइका फरिसि बुङ भारभुसाइहि। 39कालाउ इसु इङको फरिसि द्याङहेङ दोअ्हि, “नेलाइ फरिसिगेलाइ थालि रो बाति बाहार खिनिङ झासुखेना। कालाउ नेलाइको मन लोभ रो मारेम्का थोकहोइ पोङघाका हिसुन्हा। 40ओइ पुन्धुइ मान्थुका द्याङगेलाइ, हाइ नेलाइ मागिसुखेना? जाइ बाहारको भाग बान्हाइहि वादोङ लिअ्ताको भागबुङ बान्हाइका माको कुनु? 41नेलाइदोफा हिका थोकगेलाइ हाइदोङ मान्थुकालाइहेङ पिसु। कालाउ नेलाइको भाअ्सिङ गोताङ थोक सुदो जेनावा।
42 “कालाउ नेलाइ फरिसिगेलाइहेङ धिकार! पुदिना, आरुद, रो बो ओसेरेपाइतिको उब्जिकासो ते बाखाराको एअ् बाखारा परमेस्वरहेङ पिसुखेना। कालाउ परमेस्वरहेङ माया मापासुखेना रो बोमिहेङ रेम्फा पातेङ निया मापापिसुखेना। इङको बो काथाको दोसादोसाङ नेलाइ न्याय रो माया पाका काम बुङ पासु। #
लेबि २७:३०
43 “नेलाइ फरिसिगेलाइहेङ धिकार! हाइपानु नेलाइ कचहरिसाअ्ता मुलमुल थामेता रो हातेगेलाइता द्याङगेलाइ सेउपाको दोअ्तेङ मन पासुखेना। 44नेलाइहेङ धिकार! नेलाइते नाल्लि मादोका तोम भाइका हिसुन्हा। इन्सिका मातिङका तोमर्हुता ते द्याङगेलाइ मागिसिङ हिगिल्खे।”
45एअ्मि धरम मास्टर इसुहेङ दोअ्हि, “मास्टर, एसा दोअ्तेङ नाते केलाइको दोङ बिजेत पाखेना।” 46इसु वासेहेङ दोअ्हि, “ना धरम मास्टरगेलाइहेङ बुङ धिकार! नेलाइ द्याङगेलाइहेङ धरम करमको फुलि मादोपाङ ल्हिका बोकाना फुपासुखेना। कालाउ नेलाइ ताइमिङचाहिँ एलोङ आङगुलिहोइ बुङ इङको बोकानागेलाइ मासाइसुखेना।
47 “नेलाइहेङ धिकार! नेलाइ ताइकोङ आजुखालको सेअ्का परमेस्वर पाहासो धुइकालाइको भाअ्सिङ रेरेम्का तोमगेलाइ बान्हाइसुखेना। 48एसापा नेलाइ नेलाइको ताइको आजुखाल इस्का काम पाका हि दोअ्तेङ मानिसुखेना। एम्बालाइ परमेस्वर पाहासो धुइकालाइहेङ सेअ्हि कालाउ नेलाइचाहिँ एम्बालाइको तोम बान्हाइसुखेना। 49इङकोभाअ्सिङ गोताङ काथा गिका परमेस्वर लाम्फासो दोङ दोअ्का हिघाहि, ‘का नेलाइकोता परमेस्वर पाहासो धुइकालाइ रो साल्तेङ दिङगिल्कालाइहेङ दिङगिलाङका। कालाउ एम्बालाइता हेथेहेङ सान्तायावा रो हेथेहेङ सेअ्तावा।’ 50एन्साङ दुनियाको लाम्फासो एलाथिकिपा सेअ्का परमेस्वर पाहासो धुइकालाइको हितिको हिसाब इदोङ पुस्ताको द्याङगेलाइ दोङ पिलिगोयाङ। 51का दोअ्ताङका, हाबिलहेङ सेअ्का पहरसो थान रो थामेको माझाता सेअ्का जकरिया थिकापाको हितिको दुस गोताङ इदोइ पुस्ताको द्याङगेलाइहेङ पर्यावा।#सिरजाइ ४:८; २ इतिहास २४:२०-२१
52 “नेलाइ धरम मास्टरगेलाइहेङ धिकार! नेलाइदोफा आकिलको फिनु हेका चाबि हि। कालाउ नेलाइ ताइमि बुङ लिअ्ता दुल्नाङ मान्थुसुन्हा। कालाउ बोमिहेङ बुङ दुल्लि पिनाङ मान्थुसुन्हा।”
53इसु इन्तासो हानितेङ धरम मास्टरगेलाइ रो फरिसिगेलाइ वासेहेङ मारेम्फाङ बिरोध पालि तेङहि कालाउ वाकोदोफा हेन्जाङ काथागेलाइ हिअ्लि तेङहि। 54वा काथा बिराइपानु एम्बालाइ वासेहेङ रिम्लि गोयाङ दोअ्तेङ दाउ खान्तेङ हिघाहि।
Currently Selected:
लुका 11: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
