लुका 13
13
ताइको पाप मानितेङ परमेस्वरपाहा घुरिसु
1इदोङ घुरि इन्ता हिका द्याङगेलाइ इसुहेङ दोअ्हि, “गालिलको द्याङगेलाइ थानता भोक पिका पहरता पिलातस दोअ्का रोमको बारका हाकिम हेथे द्याङगेलाइहेङ सेअ्लि हुकुम पिहि। कालाउ ओबालाइकोङ हिति ओबालाइको भोक पिका हितिदोसाङ मिसालाइन्हाहि।” 2इसु एम्बालाइहेङ दोअ्हि, “एसापा सेअ्का इङको गालिलको द्याङगेलाइ बो गालिलि खान्तेङ हेन्जाङ पापि हिघाखे दोअ्तेङ नेलाइ फोम पासुखेना? 3एन्सा माको, का नेलाइहेङ दोअ्ताङका; मापास्ताइसुन्हा पानु नेलाइ बुङ एन्साङपातेङ सिस्वाना। 4आरोङ सिलोआमको धारारा उन्धिलाउ सिका तेयेअ्मि द्याङगेलाइ यरुसलेम पुरता हिका बो द्याङगेलाइ खान्तेङ पापि हिघाहि दोअ्तेङ नेलाइ फोम पासुखेना? 5एन्सा माको, कालाउ का नेलाइहेङ दोअ्ताङका, मापास्ताइसुन्हा पानु नेलाइ बुङ एन्साङपातेङ सिस्वाना।”
फल मासेका सिङको उदारन
6इङकोन्हुअ्सो इसु एम्बालाइहेङ एलोङ उदारनको रुपता इस्का काथा दोअ्हि, “एअ्मि द्याङ ताइको आङगुर बारिता एलोङ दुमरिको सिङ थिङका हिघाहि। वा इन्ता जेलाउसेलाउ दोङ दुमरि सेहोइ बे दोअ्तेङ खाङलि लोलाउ हेअ्लाउ बुङ सेका मातिङघाहि। 7कालाउ वा इङको आङगुर बारिता काम पाकाहेङ दोअ्हि, ‘का सुम बाअ्सारसो इदोइ दुमरि स्यावा बे दोअ्तेङ खाङदोङखा कालाउ या मामासेहि। हाइपालि एन्साङ थामे र्हुअ्लि पिलि? एला यासेहेङ पाल्गिल!’ 8कालाउ बारिता काम पाका द्याङ दोअ्हि, ‘मालिक, आरोङ एबासार झोको यासेहेङ र्हुमाइने। का यासेहेङ चारबितिङ तोतेङ मल जल पाप्याङका। 9भेनेङ बाअ्सार सेनु ते रेम्फाङ ज्याङ, मासेनु पाल्गिलाइने।’”
इसु गान्धि कुकुरुका बेबालहेङ एल्पाका
10एअ्खे पुनित माइसाका दिना इसु कचहरिसाअ्ता बिद्या पिदोङघाहि। 11इन्ता एअ्मि तेयेअ् बाअ्सारसो मासान लागितेङहिका एअ्मि बेबाल हिघाखे। वा गान्धि कुकुरुतेङ सोझा जेङलि मादोघाखे। 12इसु इङको बेबालहेङ तिन्तेङ वाको भेरपा काइतेङ दोअ्हि, “ओइ आनाउ, एला ना रोगसो एल्होइना।” 13कालाउ इसु ताइको खुर इङको बेबाल र्हुता ताअ्हि रो उदोङघरि वाको गान्धि सोझातेङ परमेस्वरहेङ बाखिन्लि तेङहि।
14इसु इङको बेबालहेङ पुनित माइसाका दिनाता एल्पाका तिङतेङ कचहरिसाअ्को हाकिम चेरताम्पाहि। कालाउ वा इन्ता हिका द्याङगेलाइहेङ दोअ्हि, “काम पालि एअ् आथारता तुनि हिदोङ हि! पुनित माइसाका दिनाता एल्लि हाइपालि लोसुखेना? हाइ इदोइ दिना माकोसिङ भेनेङ दिना मान्थु कुनु?”#दामालाअ्का २०:९-१०; न्याम ५:१३-१४
15इसु एम्बालाइहेङ दोअ्हि, “ओइ चिम्काटागेलाइ, हाइ पुनित माइसाका दिनाता नेलाइ गाइ पिया रो गाधाहेङ खाइतेङ चि आम्पालि माचुम्पुसुखेना कुनु? 16या आब्राहामको खालको चामिन्दिहेङ साइतान तेयेअ् बाअ्सारसो ताइको काब्जाता ताअ्का हिघाहि। हाइ पुनित माइसाका दिना दोअ्तेङ वासेहेङ काब्जासो ओल्हिलि मागोयाङ कुनु?” 17इसुको इस्का दोअ्का हिङतेङ बिरोध पाकालाइ झाराङ लेदेरहि। कालाउ जोम्तेङ हिका द्याङगेलाइ इसुको गोताङ भारभुसाइका काम पाका तिङतेङ लेङचाहि।
पासाइको चालाइ रो साउरिको उदारन
(मत्ति १३:३१-३३; मरकुस ४:३०-३२)
18कालाउ इसु एम्बालाइहेङ दोअ्हि, “स्वरगको सारभि हिसिका हि दोअ्तेङ यासेहेङ हाइदोफा दाज्याङका? 19याते पासाइको चालाइ भाइका हि। एअ्मि द्याङ इङको चालाइ चुम्पुतेङ ताइको बारिता बिअ्हि। कालाउ योतेङ बाराहि रो याको दालेङगेलाइता जिह्याँ जुइलेङगेलाइ लोतेङ भासा जोहि।”
20इसु आरोङ दोअ्हि, “स्वरगको सारभिहेङ आरोङ का हाइभाइका हि दोअ्ताङका? 21याते सोडा मोअ्का तोले भाइका हि। एअ्मि बेबाल आतुइसा सोडा चुमातेङ हेन्जा तोलेता मोअ्खे कालाउ गोताङ तोलेहेङ फुलिपापिखे।”
चेअ्का फिनु
(मत्ति ७:१३-१४,२२-२३; ८:११-१२)
22इसु यरुसलेम हानिकाताङ पालाउ देरा देराता रो पुर पुरता दुल्तेङ द्याङगेलाइहेङ धिरपादोङघाहि। 23इङको पहर एअ्मि द्याङ वासेहेङ हिअ्हि, “मास्टर, हाइ आतुइसा द्याङगेलाइ खिनिङ छुटकारा निनावा?” 24इसु एम्बालाइहेङ दोअ्हि, “चेअ्का फिनुसो स्वरगको सारभिता लिअ्ता दुल्लि बल पासु। हाइदोनु का नेलाइहेङ दोअ्ताङका, हेन्जाङ द्याङगेलाइ चेअ्का फिनुसो लिअ्ता दुल्लि भोलाउ बुङ दुल्लि माद्वावा। 25एन्सालाउ साअ्को मालिक ल्होतेङ फिनु गिअ्तावा कालाउ नेलाइ बाहारसो दोस्वाना ‘काङको मालिक केलाइको भाअ्सिङ फिनु हेपि।’ वा दोअ्तावा, ‘नेलाइ हासु? हितासो लोका हिसुन्हा? का नेलाइहेङ मानाल्खा!’ 26एन्सालाउ नेलाइ दोअ्स्वाना, ‘केलाइ नाङको दोफाङ योम्तेङ चाघान्हाहि। कालाउ ना केलाइकोङ देरा साअ्ता केलाइहेङ धिरपाघान्हा।’ 27कालाउ वा आरोङ दोअ्तावा, ‘का माग्याङका, नेलाइ हासु? का मानाल्खा। ओइ दुरजन काम पाकालाइ; इतासो हानिसु!’#ले ६:८ 28कालाउ आब्राहाम, इसहाक, याकुब रो झाराङ परमेस्वर पाहासो धुइकालाइहेङ स्वरगको सारभिता तिङलाउ रो ताइमिचाहिँ बाहार थालन्हालाउ नेलाइ तासि रेअ्तेङ खारतेङ हिस्वाना।#मत्ति ८:११-१२; २२:१३; २५:३० 29द्याङगेलाइ नुहेँ, दिहेँ, दाहेँ माहेँ रो चारबितिङसो लोतेङ स्वरगको सारभिता वाकोदोसा चालि योमावा। 30कालाउ खाङसु, एला न्हुअ्कालाइ लानावा रो एला लाङकालाइ न्हुअ्तावा।”#मत्ति १९:३०; २०:१६; मरकुस १०:३१
इसु यरुसलेमहेङ फोमपातेङ पिर पाका
(मत्ति २३:३७-३९)
31उदोङघरि आधिमि फरिसिगेलाइ इसुकोता लोतेङ दोअ्हि, “ना इतासो ओल्हितेङ भेनेङ थामेभारि हाने हाइदोनु राजा हेरोद एन्टिपास नासेहेङ सेअ्लि खाङदोङखे।” 32इसु एम्बालाइहेङ दोअ्हि, “हानितेङ इङको स्याइलेहेङ एसा दोअ्पिसु, ‘नानि रो जुम्नि मासानगेलाइ ओल्हिपाका रो एल्पाका काम पाङका कालाउ इतिनि चाहिँ काङको काम दोपाङका।’ 33कालाउ नानि जुम्नि रो इतिनिथिकापा का यरुसलेम हानिलिदोङ गोयाङ। हाइदोनु यरुसलेमबाहेक बो थामेता परमेस्वर पाहासो धुइकालाइहेङ मासेअ्तावा!
34 “ओइ यरुसलेम! ना परमेस्वर पाहासो धुइकालाइहेङ सेअ्ताना रो स्वरगदुतगेलाइहेङ उन्ठुइहोइ तोकाना। भुन्दिकिया किचानहेङ थुम्काभाइपाङ का हेअ्खे नाङको चानचामिन्दिहेङ जोम्पालि खाङघा, कालाउबुङ ना माकिअ्न्हा। 35खाङ, यरुसलेम पुरको द्याङगेलाइहेङ परमेस्वर लाअ्तावा। कालाउ का नेलाइहेङ दोअ्ताङका, जेलाउथिकापा परमप्रभुको मिङता लोकालाइहेङ ‘सहसाम्पा निङका द्याङ’ दोअ्तेङ मादोअ्पाधाउ नेलाइ कासेहेङ मातिङस्वाना।”#ले ११८:२६
Currently Selected:
लुका 13: DHIM
Highlight
Copy
Compare
Share
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
