Vei Ira Na Kai Roma 6

Era sa sega ni valavala ca tiko ko ira na tamata era sa veivinakati tale kei na Kalou; eda sa via muri koya ga e na vuku ni nona loloma vei keda, 1-23.

1A CAVA me da qai kaya? eda na valavala ca tiko li, me tubu vakalevu kina na loloma?

2E segai sara. Oi keda sa mate ki nai valavala ca, eda na valavala vakakina vakaevei? 3Dou sa sega beka ni kila, ni koi keda kece sa papitaisotaki vei Jisu Karisito, eda sa papitaisotaki ki na nona mate? 4O koya eda sa bulu vata kaya kina, ni da sa papitaisotaki ki na nona mate: me vaka ni sa vakaturi cake tale mai na mate ko Karisito e na kaukauwa nei Tamana, me da valavala vaka talega kina e na bula vou. 5Ia kevaka eda sa tei vata me da vakataki koya e na nona mate, eda na vakataka talega e na tu cake tale mai: 6ni da sa kila o qo, ni rau sa lauvako vata kaya ki na kauveilatai na noda tamata makawa, me takali kina na yago ni valavala ca, me da kakua tale ni qarava nai valavala ca. 7Ni sa sereki mai nai valavala ca ko koya sa mate tu. 8Ia kevaka eda sa mate vata kei Karisito, eda vakadinata ni da na bula vata kaya talega: 9ni da sa kila ni na sega ni mate tale ko Karisito, o koya sa vakaturi cake tale mai na mate; sa sega tale ni veitaliataki koya na mate. 10Ni sa mate ko koya, sa mate vakadua e na vuku ni valavala ca; ia na bula vua na Kalou na nona bula. 11Mo dou vaka talega kina ni dou sa vakasami kemudou ni dou sa mate sara ki nai valavala ca, ka bula vua na Kalou e na vuku i Jisu Karisito na noda Turaga.

12O koya me qai kakua ni gumatua nai valavala ca e na yagomudou sa mate rawa, mo dou muria na kena gadreva ca. 13Kakua talega ni solia na veitikimudou ki nai valavala ca me caka kina na ka ca: dou soli kemudou ga vua na Kalou, me vaka dou sa bula mai na mate, kei na veitikimudou vua na Kalou me caka kina na ka e dodonu. 14Ni na sega ni veitaliataki kemudou nai valavala ca: ni dou sa sega ni lewai e na vunau, e na loloma ga.

15Ia ka vakaevei? me da valavala ca tiko li, ni da sa sega ni lewai e na vunau, e na loloma ga? E segai sara.

16Dou sa sega beka ni kila, o koya yadua dou sa soli kemudou me nona tamata mo dou talairawarawa vua, dou sa nona tamata ga dou sa talairawarawa kina; se ki na caka cala mo dou mate kina, se ki na caka dodonu mo dou vakadonui kina? 17Ia me ia na vakavinavinaka vua na Kalou, ni dou sa muria, mai na vu ni yalomudou, koi kemudou kai talatala ni valavala ca, nai vakarau ni vakavuvuli dou sa vakatavulici kina. 18Ia ni dou sa qai sereki mai nai valavala ca, dou sa yaco mei talatala ni valavala dodonu. 19Au sa vosa me vaka na tamata, e na vuku ni sa malumalumu na yagomudou: ia me vaka dou a solia eliu na veitikimudou me ra qarava na ka dukadukali, kei nai valavala ca me levu kina na ca; mo dou qai solia vakakina na veitikimudou me ra qarava na ka dodonu me caka kina na ka savasava. 20Ni dou a bobula tiko ki nai valavala ca, dou a yawa tu ki nai valavala dodonu. 21Ia ka cava na vua dou sa rawata, e na gauna ko ya, mai na veika dou sa qai madua kina? ni sa kenai otioti ni veika o qori na mate. 22Ia ni dou sa qai sereki mai nai valavala ca, ka yaco me tamata ni Kalou, dou sa qai rawata na vua e nai valavala savasava; kei nai otioti, na bula tawa mudu. 23Ni sa kenai sau ni valavala ca na mate: ia sai solisoli walega ni Kalou na bula tawa mudu, e na vuku i Jisu Karisito na noda Turaga.

Currently Selected:

Vei Ira Na Kai Roma 6: FIJ1864

Highlight

Copy