Vei Ira Na Kai Roma 5

A veika vinaka sa yaco vei keda ni da sa vakadonui, 1-5. A ka dina sara na loloma ni Kalou, ni ka lomani keda ni da sa tamata ca, 6-11. Eda sa ca vakalevu e na vuku i Atama kei na vukuda talega, a sa rawarawa me da vinaka vakalevu sara e na vuku i Jisu, 12-21.

1O KOYA o qo, ni da sa vakadonui e na vakabauta, eda sa qai veivinakati kei na Kalou e na vuku ni noda Turaga ko Jisu Karisito: 2e na vukuna talega eda sa torova rawa kina, e na vakabauta, na loloma o qo eda sa qai tu kina; eda sa reki talega ni da sa vakanuinuitaka na nona kalougata na Kalou.

3A sa sega ni koya walega, ia eda sa daureki talega e na vuku ni veika rarawa; ni da sa kila ni sa tubu na dauvosota mai na ka rarawa; 4ia na dauveivakatovolei mai na dauvosota; ia nai nuinui mai na dauveivakatovolei. 5Ia sa sega na madua e na vuku ni nuinui; ni sa sovaraki ki na yaloda na loloma ni Kalou ni sa soli vei keda na Yalo Tabu.

6Ni sa mate ko Karisito me nodrai sosomi na tamata i valavala ca, e na gauna sa lokuci eliu, ni da sa malumalumu tiko. 7Ni sa sega beka e dua me mate mei sosomi ni tamata yalododonu: ia ka sa dua beka sa doudou me mate mei sosomi ni tamata dauloloma. 8Ia na Kalou sa vakatakila na nona loloma vei keda, ni sa mate ko Karisito me nodai sosomi ni da sa tamata ca. 9Ia ni da sa qai vakadonui e na vuku ni nona dra, ena qai rawarawa cake me da vakabulai mai na cudruvi e na vukuna. 10Io, kevaka eda sa veivinakati kei na Kalou e na vuku ni nona mate na Luvena, ni da sa veimecaki, ena qai rawarawa cake, ni da sa veivinakati tu, me da vakabulai tiko e na vuku ni nona bula.

11A sa sega ni koya walega, ia eda sa daureki talega e na Kalou e na vuku ni noda Turaga ko Jisu Karisito, o koya eda sa yaco kina me da veivinakati tu.

12O koya o qo, me vaka sa curu ki vuravura nai valavala ca e na tamata e lewe dua, kei na mate e na vuku ni valavala ca; a sa yaco vakakina na mate ki na tamata kecega, e na vuku ni sa cala na tamata kecega:

( 13Ni sa tu eliu e vuravura nai valavala ca, sa yaco emuri na vunau: a sa sega ni okati nai valavala ca ni sa sega na vunau. 14Ia era sa dauveitaliataki ko ira talega e na mate, sa vakatekivu vata kei Atama ka yacovi Mosese, era sa sega ni valavala ca oti me vaka na talaidredre i Atama, o koya sa nonai vakatakarakara sa lako mai emuri. 15Ia erau sa sega ni tautauvata sara na talaidredre, kei nai solisoli walega. Ia kevaka sa mate na lewe vuqa e na vuku ni nona talaidredre na lewe dua, sa qai rawarawa cake sara me yaco vakalevu vei ira na lewe vuqa na loloma ni Kalou, kei nai solisoli ni loloma, e na vukuna ga na tamata le dua, o Jisu Karisito. 16Ia sa dua tani nai tovo ni solisoli, kei na ka sa yaco e na vuku ni lewe dua sa valavala ca; ni sa dua bauga na ka sa tubu maikina na lewa me cala, ia sa vuqa nai valavala ca sa yaco kina nai solisoli me sega ni lewai. 17Ia kevaka sa gumatua na mate e na vukuna na lewe dua, e na talaidredre ni le dua; ena qai rawarawa cake sara vei ira sa yaco kina na loloma levu kei nai solisoli ni veivakadonui, me ra gumatua e na bula e na vukuna na le dua, o Jisu Karisito.)

18O koya o qo, me vaka ni sa dua bauga na talaidredre sa yaco kina me ra cudruvi na tamata kecega; sa vaka talega kina ni sa dua bauga nai valavala dodonu sa yaco kina, me ra vakadonui na tamata kecega me ra bula: 19ni sa vaka ni sa lewe vuqa era sa cala e na vuku ni sa talaidredre e dua bau na tamata, sa vaka talega kina ni sa lewe vuqa era sa vakadonui e na vuku ni sa talairawarawa e le dua.

20A sa qai kau mai na vunau, me uasivi kina nai valavala ca. Ia ni sa uasivi mai nai valavala ca, sa qai uasivi cake vakalevu sara na loloma: 21me vaka ni sa gumatua nai valavala ca ki na mate, me gumatua vaka talega kina na loloma, e na vakadonui, ki na bula tawa mudu, e na vuku i Jisu Karisito na noda Turaga.

Currently Selected:

Vei Ira Na Kai Roma 5: FIJ1864

Highlight

Copy