Vei Ira Na Kai Roma 7

A tamata sa vakabauti Jisu sa sereki mai na vunau, ka veiwatini kei Jisu, 1-6. Nai valavala ni tamata sa via muria na vunau ni Kalou, a sa kunea ni sa dredre, 7-25.

1DOU sa sega li ni kila, oi kemudou na veiwekani, (niʼu sa vosa vei ira ga era sa kila na vunau,) ni sa lewa na tamata na vunau e na veisiga ni nona bula? 2Ia na yalewa sa vakawati, sa vauci koya na vunau vua na watina, ni sa bula tiko ko koya; ia kevaka sa mate na watina, sa qai sereki kina na yalewa mai na vunau ni veiwatini. 3O koya ena vakatokai kina me dautagane, kevaka sa laʼki vakawati kei na dua na tagane tani, ni sa bula tiko na watina: ia kevaka sa mate na watina, sa qai sereki ga mai na vunau ko ya; ka na sega kina ni dautagane, kevaka ena laʼki vakawati kei na dua na tagane tani. 4Dou sa vakakina, na veiwekani, ni dou sa qai sereki mai na vunau e na vuku ni yago i Karisito; me dua tani mo dou veiwatini kina, ko koya sa vakaturi cake tale mai na mate, me da vua kina vua na Kalou. 5Ni da sa tiko vakayago ga, sa cakacaka vakaukauwa e na vei-tikida na gadreva ca, a ya sa tubu mai na vunau, me vuataki kina na mate. 6Ia eda sa qai sereki mai na vunau, ni sa qai mate na ka sa vauci keda; me da ia na veiqaravi me vaka nai tovo vou ni yalo, ka sega ni vaka nai tovo makawa sa vakarairai.

7A CAVA me da qai kaya? Sa vaka li nai valavala ca ko na vunau? E segai sara. Au a sega ni kila walega se sa cava nai valavala ca, a ya ga mai na vunau: niʼu sa sega ni kila se cava na daukocokoco, kevaka sa sega ni kaya na vunau, Kakua ni kocokoco. 8Ia na yaloca, ni sa kaukauwa e na vuku ni vunau, sa vakatubura e lomaqu na gadreva ca kecega. Ni sa mate na yaloca ni sa sega na vunau. 9Ia kaʼu a bula ga eliu ni sa sega na vunau; ia ni sa lako mai na vosa ni vunau, sa bula tale na yaloca, kaʼu sa qai mate kina. 10Ia na vosa ni vunau, a ya sa yaco rawa kina na bula, kaʼu sa kunea ni sa yaco kina na mate. 11Ni sa kaukauwa na ca, e na vuku ni vosa ni vunau, a sa temaki au, ka vakamatei au kina. 12Ia sa savasava na vunau, sa savasava nai vakaro talega, sa dodonu talega, ka vinaka.

13Sa qai yaco beka na ka vinaka me ka meʼu mate kina? E segai sara. A ca ga, me rairai kina me ca, sa taura na ka vinaka me kitaki au kina meʼu mate; me rairai kina na ca me ca dina sara e na vuku ni vosa ni vunau. 14Ni da sa kila ni sa ka vakayalo na vunau: ia koi au, au sa vakayago walega, kaʼu sa volitaki ki na ca. 15A ka kaʼu sa kitaka tiko, au sa sega ni vinakata: ia na ka kaʼu sa vinakata, au sa sega ni kitaka; ia na ka kaʼu sa cata, au sa kitaka tiko. 16Ia kevaka kaʼu sa kitaka na ka kaʼu sa sega ni vinakata, au sa kaya kina ni sa vinaka ga na vunau. 17A sa sega ni koi au dina sa kitaka, a yaloca ga sa tiko vei au. 18Niʼu sa kila ni sa sega sara ni tiko vei au (e na noqui tovo vakayago) e dua na ka vinaka; ni sa tiko ga vei au na vinakata na ka vinaka; ia na kaukauwa meʼu kitaka kina, kaʼu sa tawa kunea. 19Ia na ka vinaka kaʼu sa vinakata, au sa sega ni kitaka; ia na ka ca kaʼu sa sega ni vinakata, au sa kitaka ga. 20Ia kevaka kaʼu sa kitaka na ka kaʼu sa sega ni vinakata, sa qai sega ni koi au dina sa kitaka, a yaloca ga sa tiko vei au. 21Ia kaʼu sa kunea kina nai vau, sa tiko kina vei au na ca niʼu sa via kitaka na vinaka. 22Niʼu sa vinakata na vunau ni Kalou e na lomaqu dina: 23ia kaʼu sa kunea e dua tani na vunau e na veitikiqu, a rau sa veivala kei na vunau sa tu e na lomaqu, a sa vakabobulataki au ki na vunau ni valavala ca, a ya sa tiko e na veitikiqu. 24A tamata vakaloloma koi au! o cei ena sereki au mai na yago ni mate o qo? 25Au sa vakavinavinaka vua na Kalou e na vuku ni noda Turaga ko Jisu Karisito. Ia ka sa qai vakaoqo, au sa qarava na vunau ni Kalou e na lomaqu dina, ia na vunau ni valavala ca e na noqui tovo vakayago.

Currently Selected:

Vei Ira Na Kai Roma 7: FIJ1864

Highlight

Copy