Vei Ira Na Kai Roma 14

Sa vakavulici ira ko koya me ra kakua ni beci ira era sa vakabauta vakalailai, 1-4. Me ra kakua ni veileti ena kani lotu, a ya sa vakarairai; me ra veilomani ga; me ra kakua ni veilewayaka 5-23.

1O KOYA sa malumalumu na nona vakabauta dou kauta vei kemudou, e sega ga ni sa lewai tiko na veika e dauveibitaki. 2E dua sa doudou me kania loa na ka kecega: ia ko koya sa malumalumu, sa daukania na rourou ga. 3Me kakua ni beci koya sa tawa kana ko koya sa kana; ia me kakua ni lewai koya sa kana ko koya sa tawa kana: ni sa vinakati koya ko na Kalou. 4O cei ko iko mo lewa na tamata ni turaga tani? ena tu ko koya, se bale, vua na nona turaga. Io, ena tu dei ga: ni sa rawarawa vua na Kalou me vakataudeitaka.

5E dua sa doka e dua na siga ka sega nai kadua: ka dua tani sa doka na siga kecega. Me dui lewa deivaki na tamata yadua e na lomana. 6O koya sa nanuma na siga, sa vua ga na Turaga na nona nanuma; ia ko koya sa sega ni nanuma na siga, sa vua ga na Turaga na nona tawa nanuma. Ia ko koya sa kana, sa vua ga na Turaga na nona kana, ni sa vakavinavinaka ko koya ki na Kalou; ia ko koya sa tawa kana, sa vua ga na Turaga na nona tawa kana, a sa vakavinavinaka ko koya ki na Kalou. 7Ni sa sega e dua vei keda sa bula e na vukuna ga, se dua sa mate e na vukuna ga. 8Io, kevaka eda sa bula, eda sa bula e na vuku ni Turaga; se da mate, eda sa mate e na vuku ni Turaga: o koya o qo eda sa nona kina na Turaga, se da bula se da mate. 9O koya o qo sa mate kina ko Karisito, a sa tu cake tale mai, a sa qai bula tiko, me nodra Turaga era sa mate tu kei ira era sa bula.

10Ia ko iko, ko sa lewai koya na wekamu e na vuku ni cava? se ko iko tale, ko sa beci koya na wekamu e na vuku ni cava? ni da na tu kecega e na mata ni tikotiko ni veilewai nei Karisito. 11Ni sa volai, Sa taya na Turaga, me vaka kaʼu sa bula, ena tekiduru vei au ko ira na tamata kecega, ia ena vakatusa vua na Kalou na yame kecega. 12O koya o qo eda na vakatusai keda kecega kina vua na Kalou.

13O koya me da qai kakua tale ni veilewayaki tiko; o qori ga vakalevu, mo dou lewa, me kakua e dua me tokara e dua na ka e na mata ni wekana me tarabe kina se bale kina. 14Au sa kila, ka sa vakadinadinataka vei au na Turaga ko Jisu, ni sa sega na ka e dukadukali vakai koya, a ya ga vua sa nanuma ni sa dukadukali na ka: sa dukadukali vei koya. 15Ia kevaka sa rarawa na loma ni wekamu e na vuku ni kakana, o sa qai sega ni valavala me vaka na loloma. Kakua ni vakarusai koya e na kemu kakana, o koya sa mate ko Karisito e na vukuna. 16O koya me kakua kina ni vosavakacacataki na nomudou ka vinaka: 17ni sa sega ni kakana se ka-ni-gunu na matanitu ni Kalou; a ya ga na yalododonu, kei na vakacegu, kei na reki e na Yalo Tabu. 18Ni sai koya sa qaravi Karisito e na veika o qo, sa vinaka vua na Kalou, a sa vinakati koya talega ko ira na tamata.

19O koya o qo me da muria kina na veika ni veivinakati, kei na veika ni veivakatavulici 20Kakua ni vakarusa na cakacaka ni Kalou e na vuku ni kakana. E dina ya ni sa savasava na ka kecega; ia ka sa ca vua na tamata sa kana ka sa tarabe kina e so. 21E vinaka mo kakua ni kania na lewe ni manumanu, se gunu waini, ka kua na ka sa bale kina na wekamu, se tarabe kina, se malumalumu kina. 22O sa lewa li vaka e na yalomu? mo vakakina vei iko ga e na mata ni Kalou. Sa kalougata na tamata sa sega ni beitaki koya e na ka sa vakatara ko koya. 23Ia ko koya sa sega ni lewa vakakina e na yalona, sa lewai me cudruvi kevaka e kana, e na vuku ni sa sega ni vakakina na lewa ni yalona: ia na ka kecega sa sega ni vaka na lewa ni yaloda, sai valavala ca o qori.

Currently Selected:

Vei Ira Na Kai Roma 14: FIJ1864

Highlight

Copy