Vei Ira Na Kai Roma 15
15
Sa vakavulici ira me ra yalovinaka vei ira na tamata era sa malumalumu ga e na lotu, 1-7. Sa tukuna ni sa vinakata ko na Kalou me bula ko ira talega na veimatanitu era sega ni Jiu, 8-21. Sa via raici ira mai Roma, a sa kaya me ra masulaka me lako rawa kina vei ira ko koya, 22-33.
1SA kilikili talega kei keda, oi keda sa kaukauwa, me da vosota na nodra malumalumu era sa tawa kaukauwa, me da kakua talega ni kitaka na ka sa rekitaka koi keda ga. 2Me da kitaka yadua na ka e rekitaka ko na kai noda, na ka e yaga me vakatavulici kina ko koya. 3Ia ko Karisito talega sa sega ni kitaka na ka sa rekitaka ko koya ga; ia e vaka ga sa volai, Sa lutuki au na nodra vosa ca era sa vosavakacacataki iko. 4Io, na ka kecega sa volai eliu sa volai me da vakatavulici kina, me noda kina nai nuinui sa tubu e na vosota kei na vakacegui sa mai nai Vola. 5Ia me solia mada vei kemudou ko na Kalou, o koya na vu ni vosota kei na veivakaocataki, mo dou lomavata vakai kemudou me vakataki Karisito Jisu: 6mo dou lomavata ka domovata ni dou sa vakarokorokotaka na Kalou, o koya na Tama i Jisu Karisito na noda Turaga. 7O koya mo dou qai veivinakati vakai kemudou, me vaka sa vinakati keda ko Karisito, me vakarokorokotaki na Kalou.
8Ia kaʼu sa kaya ni sai talatala ko Jisu Karisito vei ira era sa cili, me vakatakila ni sa dina na Kalou, me vakadinadinataka na yalayala ka vosataki vei ira na qase: 9me ra vakarokorokotaka na Kalou ko ira talega na veimatanitu e na vuku ni nona loloma; me vaka sa volai, E na vuku ni ka o qo kaʼu na vakatusai iko kina e na kedra maliwa na veimatanitu, ka sere ki na yacamu. 10A sa kaya tale, Dou reki vata na veimatanitu, kei ira na nona tamata. 11Sa kuri talega, Dou vakarokorokotaki Jiova, na veimatanitu kecega: ia dou vakarokorokotaki koya vakalevu, oi kemudou na veivanua kecega. 12O Isaia talega sa kaya, Ena tubu o dua na waka i Isei, kei koya ena tu cake me lewa na veimatanitu; era na vakararavi vei koya ko ira na veimatanitu. 13Ia me vakasinaiti kemudou mada ko na Kalou, o koya na vu ni nuinui, e na reki kecega kei na vakacegu ni dou sa vakabauta, me levu sara na nomudoui nuinui e na vuku ni nona kaukauwa na Yalo Tabu.
14Ia koi au talega, au sa vakasami kemudou, na wekaqu, ni dou sa sinai e na yalololoma, ni dou sa sinai e na vuku kecega, ni dou sa rawata talega me veivakatavulici vakai kemudou. 15Ia kaʼu sa doudou ga, meʼu vola vakalailai yani vei kemudou, na veiwekani, meʼu vakasa tale na lomamudou, e na vuku ni loloma sa solia mai vei au ko na Kalou, 16meʼu yaco mei talatala i Jisu Karisito vei ira na veimatanitu, meʼu kitaka na cakacaka e nai tukutuku-vinaka ni Kalou, me vinakati nai cabocabo ni veimatanitu, ni sa vakasavasavataka ko na Yalo Tabu. 170 koya sa tu kina vei au e dua na ka meʼu vakalevulevui au kina e na vuku i Jisu Karisito e na veika ni Kalou. 18Niʼu na sega ni doudou walega meʼu cavuta na ka sa sega ni lavaka vei au ko Karisito me caka, me vakatalairawara-wataki ira na veimatanitu, e na vosa kei nai valavala, 19e na vuku ni sa kaukauwa na veika-mana kei na veika e veivakidacalataki, sa caka e na kaukauwa ni Yalo ni Kalou; ia kaʼu a vakatekivu kina mai Jerusalemi, ka lako voli ka yaco ki Iliriko, niʼu sa vunautaka kece nai tukutuku-vinaka kei Karisito. 20Ia kaʼu sa gumatua sara vakakina, meʼu vunautaka nai tukutuku-vinaka, ia ka sega ga e na vanua sa cavu oti kina na yaca i Karisito, deʼu tara walega na ka e dela ni yavu ni tamata tani: 21ia me vaka ga sa volai, O ira sa sega ni tukuni mada vei ira ko koya, era na raica: ia ko ira era sa sega ni rogoca, era na kila.
22O koya o qo sa tarovi vakalevu kina na noqu lako vei kemudou. 23Ia ni sa qai sega na ka meʼu tiko kina e na yasana o qo, ka sa yabaki vuqa kaʼu a gadreva kina meʼu lako vei kemudou; 24kaʼu na qai lako vei kemudou, ni na yaco na noqu lako ki Sipeini: niʼu sa nanuma meʼu raici kemudou e na noqu lako, ka mo dou kauti au e na noqui lakolako kina, ni sa oti mada na nomudou vakalecataki au vakalailai. 25Ia kaʼu sa qai lako ki Jerusalemi, meʼu votavota vei ira era sa lotu. 26Ni ra sa vinakata ko ira na kai Masitonia kei Akaia, me ra cakava e dua nai solisoli loloma, me nodra na dravudravua mai Jerusalemi era sa lotu: 27io, era sa vinakata; a sa dodonu me ra ia nai solisoli vei ira. Io, kevaka era sa rawata maivei ira na nodra veika vakayalo ko ira na veimatanitu kisau, e dodonu talega vei ira me ra solia vei ira na veika vakayago. 28Ia niʼu sa cakava oti mada na ka o qo, ka solia na ka-ni-loloma o qo, me ra taura, au na qai taka vei kemudou ka lakani ki Sipeini. 29Ia kaʼu sa kila dina, niʼu na lako yani vei kemudou, au na lako kei na veivakalougatataki taucoko ni tukutuku-vinaka kei Karisito.
30Ia kaʼu sa vakamasuti kemudou, na veiwekani, e na vuku ni noda Turaga ko Jisu Karisito, kei na vuku ni loloma ni Yalo, me da gumatua vata e na masu vua na Kalou e na vukuqu; 31meʼu vakabulai maivei ira mai Jutia era sa tawa vakabauta; me ra vinakata talega ko ira era sa lotu na noqu cakacaka ena caka mai Jerusalemi; 32meʼu lako kina vei kemudou e na reki me vaka na veitalia ni Kalou, ka meʼu vakacegui vata kei kemudou. 33Ia me tiko vata kei kemudou kecega na Kalou ni veivakacegui. Emeni.
Currently Selected:
Vei Ira Na Kai Roma 15: FIJ1864
Highlight
Share
Compare
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
