Vei Ira Na Kai Roma 13
13
Sa vakarota vei ira na tamata lotu ko koya me ra talairawarawa vei ira na nodra turaga vakavuravura, 1-7. Me ra lomani ira na tamata kecega me vaka na nodra lomani ira vakai ira, 8-14.
1ME talairawarawa vei ira na turaga levu ko ira na tamata kecega. Ni sa sega na turaga sa tubu wale, mai vua ga na Kalou: ko ira era sa turaga tu, sa lesi ira ko na Kalou. 2Ia ko koya sa vorata na turaga, sa vorata nai lesilesi ni Kalou: ia ena cudruvi ko ira era sa vorata. 3Ni ra sa sega ni vu ni rere ko ira na turaga vei ira sa caka vinaka, vei ira ga sa caka ca: o sa qai gadreva li mo tawa rerevaka na turaga? mo kitaka na ka e vinaka, ena qai dokai iko kina ko koya: 4ni sai talatala ni Kalou ko koya vei iko mo vinaka kina. Ia kevaka ko sa caka ca, mo rere ga; ni sa sega ni taura walega nai seleiwau ko koya: ni sai talatala ni Kalou, me cudruvi koya sa caka ca, me vaka na kenai sau. 5O koya o qo e dodonu kina mo dou talairawarawa, ia me kakua walega e na vuku ni cudru, e na vuku ni lewa-eloma talega. 6O koya mo dou qai solia talega na drawe: ni ra sai talatala ni Kalou, era sa qarava tiko na ka o qo. 70 koya mo dou qai solia vei ira kecega na ka e dodonu: a drawe vei ira sa nodra na drawe; ai sigana vei ira sa nodra nai sigana; dou rerevaki ira e dodonu me ra rerevaki; vakarokorokotaki ira e dodonu me ra vakarokorokotaki.
8Me kakua na nona ka e dua ko sa tawa sauma, a ya ga na dauveilomani; ni sa cakava na vunau taucoko ko koya sa daulomana e dua tani. 9Io, o qo: Mo kakua ni ia na veibutakoci, Mo kakua ni laba, Mo kakua ni butako, Mo kakua ni ia na veibeitaki vakailasu, Mo kakua ni kocokoco; ia kevaka sa dua tale nai vakaro, sa tu vata taucoko e na vosa o qo, Mo lomana na kai nomu me vakataki iko. 10O koya sa dauloloma sa sega ni caka ca vua na kai nona: o koya o qo sa cakava kina na vunau taucoko ko koya sa dauloloma.
11Ia o qo, ni da kila na gauna, ni sa gauna o qo me da yadra kina mai na moce; ni sa qai voleka cake na noda bula, ka yawa e na gauna ni noda vakabauta. 12Sa kolai oti na bogi, a sa voleka na siga; o koya me da qai luvata tani nai valavala ni butobuto, ka vakaisulu e nai yaragi ni rarama. 13Me da lako voli me vaka e kilikili, me vaka e na siga; me kakua nai soqosoqo lialia, se na mateni, me kakua na daudara se nai valavala velavela, me kakua na veileti se na vuvu. 14Ia dou vakaisulu e na Turaga ko Jisu Karisito, ka kakua ni ia me vakarau ki na veigadreva ca ni yago.
Currently Selected:
Vei Ira Na Kai Roma 13: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
