Vei Ira Na Kai Roma 12

Sa vakatavulici ko ira na tamata lotu me ra soli ira vua na Kalou, 1-2. Me ra yalomalumalumu ka gumatua me kitaka na nodrai tavi, 3-8. Me ra veilomani sara vakai ira, me ra lomani ira talega na tamata kecega, 9-21.

1O KOYA o qo, au sa vakamamasu vei kemudou, na veiwekani, e na vuku ni loloma vakavuqa ni Kalou, mo dou solia na yagomudou mei madrali bula, me savasava, me vinaka vua na Kalou, me nomudoui soro vakayalo. 2Ia dou kakua ni vakatauvatani kemudou kei ira era sa vakavuravura: ia dou mataliataki ga ni sa vakavoui na yalomudou, mo dou kila rawa kina na veitalia ni Kalou, a ya sa yaga, ka vinaka, ka dodonu sara.

3Ia me vaka na loloma walega sa soli mai vei au, au sa kaya kina vei ira yadua na tamata vei kemudou, me kakua e dua me dokai koya me vaka sa sega ni dodonu me dokai koya; me yalomatua ga na nona nanuma, me vaka nai vakarau ni vakabauta sa vota ko na Kalou vei ira yadua. 4Me vaka ni sa dua bauga na yagoda, ka vuqa na tikida, ia ka sa sega ni vakaitavi vata na tikida kecega; 5sa vakakina koi keda, na lewe vuqa, eda sa yago vata e na vuku Karisito, eda sa veitikina vata talega vakai keda. 6Ni da sa dui rawata na veisolisoli tani me vaka na loloma walega sa soli vei keda: kevaka sa vosa e na Yalo, me vaka nai vakarau ni vakabauta; 7se na dauveivota, me ia na veivota; sei koya sa dauvakatavuvuli, me vakavuvuli tiko; 8sei koya sa dauvunau, me vunau tiko; o koya sa ia na dausolisoli, me dina na lomana; o koya sa ia na daulewa, me gumatua kina; o koya sa ia na dauloloma, me marau na lomana.

9Me kakua ni vakailasu na loloma. Mo dou cata sara na ka ca; mo dou kabita sara na ka vinaka. 10Dou veilomani sara e na veilomani ni veitacini; dou veiuasiviti e na veivakarokorokotaki: 11e na gumatua mo dou kakua ni vucesa mai: me katakata na yalomudou; mo dou qarava na Turaga; 12dou reki e nai nuinui; vosota na ka rarawa; ia tikoga na masu: 13veivotayaka vei ira na dravudravua era sa lotu; vakasaqara me daukaroni ira na vulagi. 14Dou vosavakalougatataki ira era sa vakacacani kemudou: vosavakalougatataka ga, ka kakua ni rukaka. 15Dou reki vata kei ira era sa reki, ka tagi vata kei ira era sa tagi. 16Dou lomavata tiko vakai kemudou. Kakua ni nanuma na veika vakaturaga, ia mo dou veiriti kei ira na kaisi. Dou kakua ni vakasami kemudou ni dou sa vuku.

17Kakua ni veisausaumitaka na nona ca e dua. Nakita eliu na veika sa dodonu e na matadra na tamata kecega. 18Kevaka sa rawa, mo dou vakatovolea me veilomani kei ira na tamata kecega. 19Oi kemudou sa lomani, dou kakua ni saumi kemudou, ia mo dou vakaberaberataka ga na cudru; ni sa volai, A noqui tavi na cudru; au na sauma koi au, sa kaya na Turaga. 20O koya mo qai vakania na nomu meca, kevaka sa viakana; kevaka sa viagunu, mo vagunuvi koya: ni ko na binia na qilaiso sa waqa tu ki na uluna, e na nomu kitaka na ka o qo. 21Me kakua ni rawai iko na ca, mo rawa ga na ca e na vinaka.

Currently Selected:

Vei Ira Na Kai Roma 12: FIJ1864

Highlight

Copy