Vei Ira Na Kai Roma 11

Sa tukuna ko koya ni sa sega ni biuti ira kecega na Jiu ko na Kalou, a sa sega ni biuti ira vakadua; ena vakabauti ira tale me ra nona tamata, me lotu kina ko vuravura kecega, 1-32. Sa qai vakarokorokotaka na Kalou, 33-36.

1AU sa qai taroga, Sa biuta tani na nona tamata ko na Kalou, se segai? E segai sara. Oi au na luve i Isireli, a kawa i Eparaama, mai na yavusa i Penijamini. 2Sa sega ni biuta na nona tamata ko na Kalou, o ira sa kila eliu ko koya. Dou sa sega li ni kila na ka sa kaya nai Vola e na vuku i Ilija? se sa masu vakaevei ko koya vua na Kalou me beitaki ira na Isireli, a sa kaya, 3I Jiova, era sa vakamatei ira na nomu parofita, a ra sa kelirukuta sobu na nomu veicabocabo-ni-soro; ia koi au duaduaga, au sa bula, ka ra sa qarai au meʼu mate? 4Ia ka cava sa kaya vua na vosa ni Kalou? Au sa maroroya me noqu e le vitu na udolu na tamata, era sa sega ni tekiduru e na durudra vei Peali. 5Sa vaka talega kina e na gauna o qo, sa tu ga na kena vo era sa digitaki e na loloma. 6Ta kevaka sa ka-ni-loloma, sa qai sega ni ka-ni-cakacaka: ke sa vakaoqo, sa sega ni loloma na loloma. Ia kevaka sa ka-ni-cakacaka, sa qai sega ni ka-ni-loloma: ke sa vakaoqo, sa sega ni cakacaka na cakacaka.

7Sa qai vakaevei? Sa sega ni rawata na ka era sa vakasaqara ko ira na Isireli; ia ko ira na digitaki era sa rawata; a sa vakamatabokotaki na kena vo, 8(me vaka na ka sa volai, Sa solia vei ira ko na Kalou na yalo sa daumoce, na mata sa sega ni rai rawa, kei na daliga sa sega ni rogo rawa;) ka yacova na siga o qo. 9Sa kaya ko Tavita talega, Me yaco na nodrai kanakana mei cori, kei na tudai, kei na ka me ra tarabe kina, me kedrai sau talega ni ca. 10Me vakabutobutotaki na matadra, me ra kakua ni rai rawa, ka mo vakatekilolou-taka tikoga na dakudra. 11Au sa qai taroga, Era sa tarabe me ra bale sara, se segai? E segai sara: ia e na nodra bale, sa rawa na bui a vei ira na veimatanitu kisau, me vakavuvutaki ira. 12Ia kevaka sa vutuniyau mai ko vuravura e na vuku ni nodra bale, a sa vutuniyau mai na veima tanitu kisau ni sa vakalailaitaki ko ira o qori; ena qai vakatanievei ni ra sa vakalevui mai? 13Niʼu sa qai vosa vei kemudou sa matanitu kisau; e na vuku niʼu sa nodrai apositolo na veimatanitu kisau, au sa doka na cakacaka kaʼu sa lesi kina: 14de kaʼu vakavuvutaki ira na wekaqu vakayago, ka meʼu vakabulai ira kina e so. 15Ia kevaka sa vinakati mai ko vuravura ni sa biu tani ko ira o qori, ena sega li vakaevei ni vaka na bula mai na mate na nodra lomani tale?

16Ia kevaka sa savasava nai sevu, ena vaka talega kina na kena taucoko; ia kevaka sa savasava na vuna, ena vaka talega kina na veitabana. 17Ia kevaka sa musuki laivi e so na tabana, ia ko iko, na taba ni olive ni veikau, sa mai sema vata kei ira, mo bula vata kei ira e na vu ni olive sa uro; 18mo kakua ni vakalevulevui iko cake vei ira na tabana dina. Ia kevaka ko sa vakalevulevui iko, sa sega ni bula na vuna e na vukumu, o iko ga sa bula e na vuku ni vuna. 19O na qai kaya, Sa musuki laivi na veitabana dina, meʼu sema kina. 20E dina; sa musuki laivi ko ira e na vuku ni ra sa tawa vakabauta, o iko talega ko sa tu ni ko sa vakabauta ga. Kakua ni yalolevu, mo rere ga. 21Kevaka sa sega ni vosota na veitabana dina ko na Kalou, de qai sega ni vosoti iko talega.

22O koya mo qai raica ruarua, na loloma, kei na cudru, ni Kalou: a cudru vei ira sa bale: kei na loloma vei iko, kevaka ko sa tu dei e na loloma: ia kevaka e segai, ena musuki laivi ko iko talega. 23O ira talega, kevaka era sa sega ni tawa vakabauta tiko, era na sema vata: ni sa rawarawa vua na Kalou me vakasemai ira vata tale. 24Ia kevaka ko sa musuki mai na olive sa nonai tovo ga me tubu e na veikau, ia ko sa sema vata kei na olive vinaka drau sa sega ni tovo vata kaya: ena qai rawarawa sara cake, me sema vata kei na nodra vu ni olive dina ko ira sa nodra nai tovo vakakina.

25Niʼu sa sega ni vinakata, na veiwekani, mo dou tawa kila na ka vuni o qo, do dou vakasami kemudou ni dou sa vuku; ni ra sa yaco na Isireli e so me ra mataboko, me malua me curu mada na lewe vuqa maivei ira na veimatanitu kisau. 26Ia sa vakaoqo, era na vakabulai ko ira kecega na Isireli: me vaka na ka sa volai, Ena lako mai Saioni ko koya nai Vakabula, ka na saumaka tani nai valavala ca maivei ira na Jekope; 27ia sa noqu veiyalayalati o qo vei ira, niʼu sa kauta tani oti na nodrai valavala ca. 28E nai tukutuku-vinaka, era sa veimecaki ko ira e na vukumudou: ia e nai lesilesi ga, era sa vinakati e na vukudra na qase. 29Ni sa tawa veivutuni ko na Kalou e na nona veisolisoli se nona kacikaci. 30Me vaka ni dou a tawa vakabauta eliu na Kalou, a sa qai yaco vei kemudou na loloma e na vuku ni nodra vakatitiqa: 31sa na vaka talega kina ko ira era sa tawa vakabauta, e na vuku ni sa yaco vei kemudou na loloma me yaco kina vei ira talega na loloma. 32Ni sa sogolati ira vata na Kalou e na vakatitiqa, me lomani ira kecega ko koya.

33A ka vakaidina na kena titobu ni nona vutu ni vuku kei na nona yalomatua na Kalou! sa tawa kilai rawa na nona lewa, a sa tawa kune na nonai valavala! 34O cei sa kila na loma ni Turaga? se ko cei me nonai vakavuvuli? 35se ko cei sa solia vua, me saumi tale vua? 36Ni sa mai vua na ka kecega, e na vukuna talega, me nona talega; me vakarokorokotaki ko koya ka tawa mudu. Emeni.

Currently Selected:

Vei Ira Na Kai Roma 11: FIJ1864

Highlight

Copy