Vei Ira Na Kai Roma 10

Sa tukuna ko koya ni sa biuti ira na Jiu ko na Kalou ni ra sa sega ni vakabauti Jisu; ia na tamata kece sa vakabauti koya dina, era sa veivinakati kina kei na Kalou, 1-21.

1OI kemudou na veiwekani, au sa gadreva e na vu ni yaloqu, au sa masu talega vua na Kalou e na vukudra na Isireli, me ra bula. 2Niʼu sa tukuni ira dina ni ra sa lomakatakata vua na Kalou, ia ka sa sega ni vaka na yalomatua. 3Ni ra sa sega ni kila na veivakadonui sa yaco mai na Kalou, a ra sa dauvakatovolea me ra vakataudeitaka na veivakadonui vakai ira, a ra sa sega kina ni vakamalumalumutaki ira me ra vakadonui mai vua na Kalou. 4Ni sa vakayacora ko Karisito na ka sa nakiti e na vunau, me vakadonui ko ira kece era sa vakabauta.

5Ni sa tukuna ko Mosese na veivakadonui sa yaco e na vuku ni vunau, Na tamata sa cakava na veika o qori, ena bula kina. 6Ia na veivakadonui sa yaco e na vakabauta sa tukuna vakaoqo, Mo kakua ni vosa e na yalomu, O cei me lako cake ki lomalagi? [ka me kauti Karisito sobu mai:] 7se vakane, O cei me lako sobu ki na Yasana-vuni? [ka me kauti Karisito cake mai na mate.] 8Ia ka cava e kaya? Sa voleka vei iko na vosa, e na gusumu, kei na yalomu: [a vosa ni vakabauta, a ya keitou sa vunautaka; 9Kevaka ko na vakatusa e na gusumu na Turaga ko Jisu, ka vakadinata e na vu ni yalomu ni sa vakaturi koya cake tale mai na mate ko na Kalou, o na bula.] 10Ni sa yalona sa vakadinata kina ko na tamata me vakadonui kina, a sa gusuna sa vakatusa kina me bula. 11Ni sa kaya nai Vola, O koya yadua sa vakabauti koya ena sega ni madua.

12Ni sa tautauvata na Jiu kei koya sa matanitu tani: ni sa dua bauga na Turaga vei ira kecega, o koya sa vutu ni ka vinaka vei ira kecega era sa masuti koya. 13Ni na bula ko ira vakaaduaga era sa masuta na yaca i Jiova.

14Era na qai masu vakacava vua era sa sega ni vakabauta? a ra na vakabauti koya vakacava era sa sega ni rogoca kina? a ra na rogoca vakacava, kevaka c sega e dua me tukuna? 15Ia era na tukuna vakacava, kevaka era sa sega ni talai? me vaka na ka sa volai, Sa lagilagi sara na yavadra era sa tukuna na vakacegu, era sa tukuna na veika vinaka! 16A ra sa sega ni vakabauta kecega nai tukutuku-vinaka: ni sa kaya ko Isaia, I Jiova, ko cei sa vakabauta na neitoui tukutuku? 17Eda sa kila kina ni sa rawa na vakabauta e na vakarorogo, kei na vakarorogo e na vosa ni Kalou. 18Ia kaʼu sa kaya, Era sa sega li ni rogoca? E dina sa vakakina, sa lako na kedrai rogorogo ki vuravura taucoko, kei na nodra vosa ki nai yalayala kei vuravura. 19Ia kaʼu sa kaya, Sa sega beka ni kila ko ira na Isireli? Sa tukuna eliu ko Mosese, Au na vakavuvutaki kemudou e na vukudra era sega ni noqu tamata: au na vakacudrui kemudou e na matanitu sesewa. 20A sa doudou sara ko Isaia, ka sa tukuna, Era sa kunei au ko ira era a sega ni qarai au: au sa vakarairaitaki vei ira era a sega ni tarogi au. 21Ia ka sa kaya vei ira na Isireli, E na veisiga kecega kaʼu sa dodoka yani na ligaqu kivei ira na tamata dautalaidredre ka dau-vakatitiqa.

Currently Selected:

Vei Ira Na Kai Roma 10: FIJ1864

Highlight

Copy