Vei Ira Na Kai Roma 9

Sa tukuna ko koya na nona loloma vei ira na kai nona, 1-5. Sa qai tukuni ira ni ra sa valavala ca, a sa biuti ira kina ko na Kalou, ka vakabauti ira na veimatanitu kisau me ra nona tamata; a sa vakatakila ni sa dodonu sara na Kalou e na nona lewa, 6-33.

1AU sa vosa dina e na mata i Karisito, au sa sega ni vosa lasu, sa vakadinadina talega vei au na lewa-ni-lomaqu e na Yalo Tabu, 2niʼu sa rarawa vakalevu, a sa yaluma tikoga na lomaqu; 3(ni kaʼu sa daugadreva meʼu tawase tani vei Karisito,) e na vukudra na wekaqu, o ira era sa wekaqu dina vakayago: 4era sa luve i Isireli; sa nodra na vakabau me gone, kei nai ukuuku, kei na veiyalayalati, kei na soli vunau, kei nai valavala ni soro, kei na vosa ni yalayala; 5sa nodra ko ira na qase, a sa tubu maivei ira ko Karisito me vaka na yagona, o koya sa Kalou, sa veitaliataka na ka kecega, sa nona na vakarokoroko ka tawa mudu. Emeni.

6A sa sega ni tawa yaco na vosa ni Kalou. Ni sa sega ni Isireli ko ira kece sa maivei ira na Isireli: 7ia era sa sega ni luvena ko ira kecega na kawa i Eparaama: ia Na kawa i Aisake ga ena vakatokai me nomu kawa. 8Sa kenai balebale o qo, O ira na luvena vakayago, era sa sega ni luve ni Kalou; ia na luve ni yalayala ga era sa okati me kawa. 9Ni sa vakaoqo na vosa ni yalayala, E na gauna vakaoqo kaʼu na lako mai, ka na dua kina na luvena-tagane ko Sera. 10A sa sega ni koya walega; ia ko Repeka talega ni sa kunekune mai vua e dua, a tamada ko Aisake; ( 11ni rau sa tawa sucu se rau cakava na ka vinaka se na ka ca, me tu dei kina na ka sa lesia eliu ka digitaka ko na Kalou, sa sega ga e na vuku ni cakacaka, ka e na vukuna ga sa kaci;) 12sa kainaki vua na yalewa ko ya, O koya sa qase vei rau ena qaravi koya sa gone. 13Sa vakakina na ka sa volai, Au sa vinakati Jekope, ia kaʼu sa cati Iso.

14A cava me da qai kaya? Sa tu beka vua na Kalou nai valavala tawa-dodonu? E segai sara. 15Ni sa kaya ko koya vei Mosese, Au na lomani koya kaʼu sa lomana, ia kaʼu na yalovinaka vua kaʼu sa yalovinaka kina. 16Sa qai sega ni yaco e na vukuna sa gadreva, se na vukuna sa cici, ka e na vukuna ga na Kalou sa yalovinaka mai. 17Ni sa kaya vei Fero nai Vola, E na vuku ni ka o qo kaʼu sa vakaturi iko cake kina, meʼu vakatakila vei iko na noqu kaukauwa, me tukuni talega na yacaqu ki vuravura taucoko. 18O koya o qo sa yalovinaka kina ko koya vua sa yalona kina, a sa vakadomoqataki koya sa yalona kina.

19O na qai kaya vei au, E na vuku ni cava sa qai dauia kina na veibeitaki ko koya? ia ko cei sa vorata na ka sa veitaliataka ko koya? 20Kakua ni vakaoqo, o iko na tamata; o cei ko iko mo ia na veileti vua na Kalou? Ena kaya beka na ka sa caka vei koya sa cakava, O sa cakavi au vakaoqo e na vuku ni cava? 21E sega beka ni veitaliataka na qele ko koya sa dautuli kuro, me cakava kina e na dua bauga nai buli qele na bilo e dua me dokai, kei na bilo kadua me tawa dokai. 22Ia sa vinakata beka ko na Kalou, me vakarairaitaka na nona cudru, me vakatakila talega na nona kaukauwa, a sa vosota vakadede sara kina na veibilo ena cudruvi sa vakarau tu me rusa: 23me vakatakila talega na kena levu ni nona vinaka ki na veibilo sa lomani, a ya sa vakarautaka eliu ko koya ki nai ukuuku, 24oi keda ga, sa kacivi keda ko koya, sa sega walega maivei ira na Jiu, maivei ira talega sa matanitu tani:

25Me vaka talega na ka sa kaya ko koya e nai vola i Osia, Au na vakatokai ira ka sega ni noqu tamata eliu, me ra noqu tamata; ko koya talega ka sega ni lomani eliu, me qai lomani: 26ena yaco talega e na vanua sa kainaki kina eliu vei ira, Sa sega ni noqu tamata koi kemudou; era na qai vakatokai kina me ra luve ni Kalou bula. 27Sa kacivaki ira na Isireli ko Isaia talega, E dina ya ni sa tautauvata ko ira na luve i Isireli kei na nuku ni waitui ni ra sa wili, ia ena bula na kena vo ga: 28ni na dua na cakacaka ena vakaotia ko koya, ka vaku-sarawataka e na cakacaka dodonu: ni na dua na cakacaka e vakusarawataki ena kitaka e vuravura ko Jiova. 29Me vaka talega na ka sa kaya eliu ko Isaia, Kevaka ka sega ni dua na kawa sa vakalaiva vei keda ko Jiova sa nona na lewe vuqa, eda sa vakataki Sotoma, eda sa tautauvata talega kei Komora.

30A cava me da qai kaya? O ira na veimatanitu kisau, o ira era sa sega ni muria nai valavala dodonu, era sa yaco me ra vakadonui, ni ra sa vakadonui e na vakabauta. 31Ia ko ira ga na Isireli, o ira era sa muria na vunau me ra vakadonui kina, era sa sega ni yaco ki na vunau ni veivakadonui. 32E na vuku ni cava? ni ra sa sega ni muria na vakabauta, a ya ga na cakacaka ni vunau: ni ra sa tarabe e na vatu e dauveivakatarabetaki; 33me vaka na ka sa volai, Raica, au sa tauca mai Saioni na vatu e dauveivakatarabetaki kei na vatu ni veivakalomacataki: ia ko koya yadua sa vakabauta ena sega ni madua.

Currently Selected:

Vei Ira Na Kai Roma 9: FIJ1864

Highlight

Copy