Bimwa 14
14
Mwan’a gbata na bakoncha bango badi bachungibaki badi o bokoli, kombo, Sion. Bangelo bachato bachakole edyalele a botòtè ba Nzambe.
1Na nga yènèki o Mwan’a gbata abèki chu o bokoli ba Sion, na kbamu na wango ebèki mituku kama mò na mako manè n’inè, kombo a Mwan’a gbata na kombo a Chango ekòtibaki o mabocho ma bango.
2Na nga wokaki ikingo ikolo ko ikito a may manè bona, na ko eluncha ekuli bona, na ikingo dyango nga wokaki ibèki ko o bato babete bakietèmbe bona,
3na bango bayembaki eyembo etemu o bocho ba trône na o bocho ba banyama banè na baphomba; ebèki moto nyò mò akbwi iyicha boyekola eyembo yango twa, eyebaki yango ko mituku kama mò na mako manè n’inè, bakoncha bango bachombibaki na babèki bakakwaki na che.
4Ye edi bakoncha bango babokuliza manchoto ma bango na mbindo a batò ka, tonga bango badi ko bawòli ba batò, bango bachòyeba baphele ka bona. Ye edi bakoncha bango balondo Mwan’a gbata o binongo bichò byango wango akiè. Bango babichombiba na babikakwa na bato, tonga n’idyala bato ba Nzambe na Mwan’a gbata ba tabocho.
5Na o cha mina ma bango ech’otuba iwò a bwanya nyò dyò ka, bango badi miyengwa.
6Na nga yènèki angelo akbwi mò awumbwaki otata ikolo, na wango abèki na mina minyòngò ma biteneli myango wango tachakola bato ba che, bato ba madia machò, ba bilobele bichò, na bato moto elenge elenge.
7Na wango alobaki nikichi bwe: ”Botilaka Nzambe, na bophè wango botochibe, tonga bobiko ba wango b’ichamba botòtè bukoka, botocha koncha wango etulaki ikolo na che na may manè na banchomba.”
8Na angelo mobandi alondoki wango alobaki bwe: ”Yango ebikwa, yango ebikwa, Babylone monè, wango anywezaki bato bachò na du vin a ibèli a wango a bochembi.”
9Angelo a ichato alondoki angelo a mobandi, alobaki nikichi bwe: Koncha wango otèchambela nyama a ibèli n’akòtibe ndembo a wango o bocho ba wango,
10nyò o ebòkò a wango, moto wango tanywa du vin a ibèli a Nzambe n’o bimbi, dyango ibikaniba o cha kobo a wango a ibèli, na tachèbiza wango na meya na soufre o michò ma bangelo b’èchwa, na o michò ma Mwan’a gbata.
11Na nchumbele a ichèbo a bango tituta biteneli o biteneli, na mieche na mikolo bango tidwe phi, techèbe kobona bakoncha bango bachambele nyama a ibèli n’èlenge a wango, na bango bakòtibe ndembo a kombo a wango.
12Ye edi komo a b’èchwa iwoka miyeko ma Nzambe n’idyala otata èchingane a Jésus.”
13Na nga wokaki ikingo ichònòki ikolo ilobaki: ”Kòtè bwe! Edi moni na bakoncha bango bawe o cha Mokonchi o chima yango. Eyaye elobe bwe: He, bango tayò o nch’èbati a mochalo ma bango, tonga matoma ma bango maya o chima bango.”
14Na nga yènèki ephephelo ephumbaki, na o ephephelo edyaki bwa koncha wango ewulaki Mwan’a bole a moto, wango abèki na ngula a or o mutu ma wango, na wango abèki na monapha ma mèngò kbo o ebòkò a wango.
15Na angelo akbwi atubaki o cha temple, angamwaki nikichi, alobaki na koncha wango edyaki bwa o ephephelo bwe: ”Tika monapha ma kò mochèngè, tonga bobiko b’itolo bukoka, na mboto a che ikoka.”
16Na koncha wango edyaki bwa o ephephelo atambuzaki monapha ma wango, na ch’echò echèngibaki.
17Na angelo akbwi atubaki o cha temple, wango edi ikolo, nà wango abèki na monapha ma mèngò.
18Na wona angelo akbwi atubaki o cha autel, wango abèki na chwa ikolo na meya, wango angamwaki nikichi n’alobaki na koncha wango edi na monapha ma mèngò bwe: ”Tika monapha ma kò mochènge grappes a milange (edi mbuka a molange ma vigne) o che, tonga mbuka a myango itela.”
19Na angelo atambuzaki monapha ma wango o che, na mwango mochèngèki milebu myango mibèki na mbuka, na angelo akanaki mbuka dyango o ch’iphako a Nzambe inè a ibèli.
20Na iphako dyango idyatibaki na makolo ichuku a mboka, etubaki nganga a malongo mapholaki kokoko ncho o mibanga ma bayanga, bochanda ba wango bobèki stades: motuku mò na kama ichamano (stade mo edi motwatwa kama mo na mako mwambi na itano).
Currently Selected:
Bimwa 14: BUI1947
Highlight
Copy
Compare
Share
Want to have your highlights saved across all your devices? Sign up or sign in
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
