Bimwa 13
13
Ekoko a banyama b’ibèli babale.
1Na nga yènèki nyama ibèli atubaki o cha may manè, abèki na macheke dyomu na mitu mochabali, n’abèki na diadème dyomu o macheke ma wango (diadème edi bibanga byango echwe ko mikonchi), na o mitu ma wango ekòtibaki mawò ma mbèchi.
2Na nyama ibèli, wango nga yènèki, awulaki, ngwe, na makolo ma kiepha, na muna ma wango mobèki ko muna ma lion bona. Na dragon aphèki wango nguli a wango na trône a wango na chwa ekama.
3Na nga yènèki ophanyak’a mitu ma wango muna mò mokonchaki phota enè a bowe, ko phota a bowe yango ebelaki, na ch’echò eyènèki nyama wango n’ichimo.
4Na bango bachambelaki dragon tonga wango aphèki nyama ibèli chwa kobona, na bango bachambelaki nà nyama ibèli, balobaki bwe: ”Ne edi elenge na nyama a ibèli nda? ne eyiche bomane na wango nda?”
5Na baphèki wango muna mwango motondaki na mbèchi na nganga, na baphèki wango chwa ikomanda bawòli mako manè na babale.
6Na wango adipholaki muna n’abèchèki Nzambe, n’adyancholaki kombo a wango na tabernacle a wango nè bakoncha bango badi o ikolo.
7Baphèki wango chwa imana na bato b’èchwa tonga n’iyicha bango. Na baphèki wango chwa ikomanda bato ba madia machò ba bilobele bichò na bato moto elenge elenge.
8Na bakoncha bango babèki makombo o mokanda ma Mwan’a gbata wango ebomibaki o bophotiche ba che twa, bango tachambela ko wango.
9Koncha wango edi na matwe m’iwoka, awokaka.
10Koncha wango ekane bato o monyòli na wango takola ko o monyòli, koncha wango ebome bato na mongowa nà wango tabomiba ko na mongowa. Ye edi komo a b’èchwa idyala na chabo n’èchingane.
11Na nga yènèki wona nyama ibèli akbwi, atubaki o cha che, wango abèki na macheke mabale elenge na mwan’a gbata, alobaki elenge na dragon.
12Nyama a mobandi ayichaki bokiele matoma moto elenge elenge ko nyama atabocho bona, ayambaki chwa itutiza bato bachò o nch’ichambela nyama atabocho, nyama wango ebèki na phota a bowe, ko yango ebelaki.
13Na wango akielaki matoma machimube moto elenge elenge, n’ayichaki botubize meya michònò ikolo mikwe o che o michò ma bato bachò.
14Na wango alenguze bakoncha bango badi o che, tonga na matoma machimube, mango wango ayambaki chwa ikiela o michò ma nyama ibèli a tabocho, na wango alobe na bakoncha bango badi o che bwe, bakiele ndembo elenge a nyama ibèli atabocho wango bamaki mongowa ko abutwa na bomwè.
15Na nyama a mobandi ayambaki chwa iyicha bophè ndembo a nyama ibèli bomwè, na kobona yango eyichaki bolobe, na eyichaki bobome bakoncha bango batonaki bochambele elenge a nyama ibèli.
16Na tedyala kobona, bato bakiaki na bananè, bayoko na bamandi, bachomi na batamba bachimite bwe, takòtiza ndembo o ebòkò èlomi nyò o bocho.
17Tonga mo koncha wango edi ndembo a kombo a nyama ibèli twa, na ndembo yango eyènize mamelo ma kombo a wango twa, owana wango oyicha nyò bochombe nyò bochombe nyò botekize beka ka.
18O enongo ye edi kokomo bodyale na bokièngu; koncha wango edi na bolengi abalaka tonga n’iyeba etika a imelo a nyama ibèli, tonga etika yango edi bwe, imelo a bato. Imelo a wango edi bwe: Kama ichamano na mako machamano n’ichamano.
Currently Selected:
Bimwa 13: BUI1947
Highlight
Copy
Compare
Share
Want to have your highlights saved across all your devices? Sign up or sign in
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
