Roma 10
10
1Narilak norokhwi o. Allah en e, is narilak norokhwi nenaʼgul onuk mesigat aʼge ai, delenebelip o, oluk nogola en wenemennei eberiselat, Allah yoʼgo pasulat, taga legi o. 2Is en e, Allah paget enannisogo togwi aʼgeat de, enebabut e, naluk o. Demat tu aʼge enaluk welat togwi puk. 3Is e, Allah en wene enebam aʼge noʼgorlogo wokholuk pobuk togolik emin hwedik tagonobouwagoluk, at eragam ʼgoluk welat tu aʼge eneperlak en tu erlak welegesa. We, onuʼgwarek onogola en opoluk enannisogo togu legesa ai o. 4At Kristus ebe ʼgwiangma ʼbu aga ai pam, wene Allah en nenesaʼgo weregei wene ano demat aga. Aphwami enede at Kristus ebam heʼberik pogwi aʼge enebe loʼbok, wene enebam aʼge noʼgorlogo wokholuk, pobuk togolik Allah emin hwedik tagenebasu o.
Allah en aphwami nenebe ʼberlegat delnonobu wene
5At Musa en e, wene Allah en nenesaʼgo weregei aʼge ano pam, Allah en wene nenebam aʼge noʼgorlogo wokholuk pobuk togolik at emin hwedik taknenebasu ai paget e, disogo egei,
“Wene ai hologo welat, hegitsogo togu lorogup aʼge henebe loʼbok,
wene ai pam henelaluk modok wolorogup o,” (Imamat 18:5)
oluk pelal wokho pesi. 6Asogo aʼgeat de, aphwami enede Allah pam heʼberik pogwiam e, at en wene enebam aʼge noʼgorlogo wokholuk pobuk togolik at emin hwedik tagenebasu ai paget, Allah iak pam pelal disogo wokho pegesa,
“Hat hogola en e,
ʼBogorl pam sa ligema, oluk epagun o,”
oluk egei ai ebe re, Kristus ebe woluk ʼbumagoluk ogun no yo, oluk egei ai o. 7Ye,
“Ogodima sa ʼbua, oluk epagun o,”
oluk egei ai ebe re, Kristus waragarikmu nis en elalugap toluk woluk orlumagoluk ogun no yo, oluk egei ai o. 8Holuk e, wene ai disogo opoluk egei,
“Allah iak ai ebe horoksogoat oruak o.
Ai hemde pam emin, hedemu emin, oruak o,” (Ulangan 30:12-14)
oluk egei ai, aphwami en enede Allah pam heʼberik po wene nis en moʼgulhontogu lege aʼge ai pagerat egei o. 9Hemde pam en e,
“Nonue ʼgain Onuk Logo aʼge re, Yesus at o,” oluk ʼbaksogo eselat, ye, hogola en e,
“Yesus ebe waragarikmu re, Allah en elalugaptegeimu oruak o,” oluk demat epasulat, umu re, delhobuayat o. 10Aphwami enede Allah ebam heʼberik pogwiam e, at en wene enebam aʼge noʼgorlogo wokholuk, pobuk togolik at emin hwedik tagenebasu o. Ye, enemde pam en, at obok ʼbaksogo ogwiam e, delenebiso ai o. 11Allah iak pam pelal wokho pogulat e, disogo egesa,
“Aphwami enede at ebam heʼberik pouwa aʼge eneʼgerli houwa modok erlak o,” (Yesaya 28:16)
oluk pelal wokho pegesa. 12Is aphwami Yahudi aʼge muat, ye, aphwami Yunani aʼge muat, ogup o. Nis ʼberlegat nenaik ʼgain Onuk Logo aʼge re, Allah emategat o. Ye, at en wogontouwagoluk yoʼgo pogwi aʼge enebe ʼberlek loksogoat wogentasu o. 13At en eselat e,
“Is logon en an henaik ʼgain Nonuk Logo aʼge Allah nonuk ʼbalogwi aʼge,
ʼberlegat delenebik nak o,” (Yoel 2:32)
oluk egeimu pelal wokho pegesa.
14-15Allah en e, wene mesik disogo egei,
“Aphwami op wene woluk moʼgulentai lagai aʼge ai, op modogat o,” (Yesaya 52:7)
oluk egeimu pelal wokho pegesema oruak aʼgeat de, op wene ai woluk louwagoluk yoʼgo onoboluk peragonobogwi erlak holuk e, noʼgosogo en moʼgulentai lo no. Ye, is logon en wene ebe moʼgulentai lo erlak oruakhwe, at obok noʼgosogo en enesaʼgo holu no. Ye, at obok holu erlak welat e, noʼgosogo en enede at ebam heʼberik po no. Aphwami enede at ebam heʼberik po erlak welat e, onuk noʼgosogo ʼbalu no. 16Aʼge re, aphwami enebe ʼberlek op wene aiat wo aʼge re, is pema akhit wo erlak oruak o. At Yesaya en e, Allah disogo moʼgulesi,
“Nenaik o. Nis en wene moʼgulontogwiam e, sa en wene ai demat oluk pobi tegei no.
Pobitu erlak nak oruak o,” (Yesaya 53:1)
oluk moʼgulesi. 17Aʼge re, op wene ai, Kristus obok moʼgulentai lagaiamat enesaʼgo hologwi o. Ye, wene enesaʼgo holholugat, enede at ebam heʼberik pogwi o. 18Aʼge re, an en hin mesik wokhentaik. Is e, op wene ai enesaʼgo hwelak erlak oruak no? Erlak o. Enesaʼgo arat hweligisa. Allah iak pam,
“Is eniak ai o di owi yu owi ʼberlegat wiyalagama re,
o esaʼgo esaʼgo etleba ʼberlegat enesaʼgo hweligisa o,” (Mazmur 19:4=TB 19:5)
oluk egeimu pelal wogo oruak ai en egi o. 19An hin mesik wokhentaigat. Is aphwami Israel aʼge wene op wene ai eneperlak no? Enalugat o. Naduk e, at Allah en iak egeimu, at Musa en disogo moʼgulentesi,
“An en e, is aphwami logon an neiyagai aʼge puk.
We, is mu aʼge yoʼgo onoboma,
his en ʼbou tuagoluk takhenebasulat,
ye, is logon enede erlak aʼge yoʼgo onoboma, his honolot het emagoluk takhenebasulat, tik o,” (Ulangan 32:21)
oluk moʼgulesi. 20Ye, pobuk Allah en e, wene mesik disogo egei,
“Aphwami an nebe horonobogwi erlak aʼge en, hwiaknebigisa o.
Ye, aphwami an nebam hin woknobu erlak aʼge en,
nebe niouwagoluk nuʼgwarek en onorogolema inegi o,” (Yesaya 65:1)
oluk egeimu, Yesaya en ogorlok erlaksogoat moʼgulentesi. 21Ye, Allah en aphwami Israel aʼge disogo moʼgulentesi,
“An hubet emin, erlige emin, hopmuʼgwe emin, aphwami yema wogenebigoluk neʼgik langsogo welegi aʼgeat de,
enaʼgul erik welat e, niak hologwi erlak o,” (Yesaya 65:2)
oluk moʼgulentesimu, Yesaya en moʼgulentesiat.
Currently Selected:
Roma 10: WUL
Highlight
Share
Compare
Copy
Want to have your highlights saved across all your devices? Sign up or sign in
