Roma 9
9
Allah en aphwami Israel aʼge poligenebesi wene
1-3An narilak norokhwi nenaʼgul onuk mesigat aʼge wiak oruak ai en, nede wiagat welat, nede obotut welat, taga legi o. Nede en e,
“Allah en, an Kristus emin hwedik welege aʼge ai ʼgoboksogo uknoboluk, is enebalema heman nebelep e, epasu legi ai pam, is wogenebelip e,” oluk Kristus emin hwedik welat egi ai re, demat egi. Niak esei egi puk o. Allah Arogun nogola welat,
“Wene ai re, demat o,” oluk moʼgulneselat, nuʼgwarek nogola en ogo re,
“Demat egi o,” oluk epasulat, ese legi o. 4Is aphwami Israel aʼge enebe demat Israel aʼge Allah en poligenebesi aʼge ai en e, at eiyagai emagoluk wogenebiselat, at Ebe erliktogwi aʼge ai isat moʼgulentasulat, wene wusogo isat wogenebiselat, wene nenesaʼgo weregei aʼge ano isat wogentasulat,
“An disogo erliknobogu lomup o,” oluk isat moʼgulentasulat,
“Pobuk disogo takhonobouwa o,” oluk obok isat moʼgulentasulat, tegei ai o. 5Nis neneʼbalak en de, is ai dagenebigisa aʼge. At Kristus ebe nis aphwami dagagai ʼgelaʼge dagaga ai, is aʼge en derigisa aʼge re, ebe Allah aʼgeat o. Di aʼge yu aʼge ʼberlek e, sebelak ʼgelaʼge aʼgeat de, at nak e, abel likho ʼgelaʼgeat logo ai en e, at nak erliktogu lomul ai, demat emak o, oluk u ʼgelaʼge,
“Amin,” ogu lomok.
6Allah en e, is obok moʼgulentesi ai,
“Ebe sogwi aga,” oluk egi puk. Is Israel en dogoʼgwe aʼge ai ʼberlegat e, enebe Israel Allah en poligenebesi aʼge puk. 7At Allah en Abraham wene disogo moʼgulesi,
“Hat en dogoʼgwe aʼge wiyalema o, oluk moʼgulhegis ano ebe re, homlogo Ishak yu en dogoʼgwe aʼge en wiyalema aʼge nak paget moʼgulhegis o,” (Kejadian 21:12)
oluk moʼgulesi ai en e, Abraham en dogoʼgwe aʼge ʼberlegat e, Allah eiyagai oluk u puk. Erlak o. 8Asogo egei ai ebe disogo oluk egei. Enebe en dogoʼgwe aʼge ai re, Allah eiyagai oluk u puk. We, Allah en obok moʼgulentesi aʼge holugat, at eiyagai oluk u o. 9At Allah en Abraham obok moʼgulesi ano obok moʼguleselat e, disogo moʼgulesi,
“An pobuk heʼbek wom hegitsogoat weik o. Wagoam e, hwe Sara emalik ap dorua o,” (Kejadian 18:10)
oluk moʼgulesi.
10Aʼge re, wene ai nak puk. At hwe Ribka emalik e, enaik Ishak neneʼba mesigat ai en ap enebe ʼbiren dagenebegei. 11Is ap enebe ʼbiren ai, enebe dagom erlak welat enebabut op togulat, wiak togulat, tu erlak oruakhwe, at Allah ede opoluk poligenebesi ai demat otluk welemagoluk, 12enia Ribka wene disogo moʼgulesi,
“Hat hemalik dagonobogun aʼge eba de, naduk naduk dagema aʼge ai,
ebe pobuk dagema aʼge eragam welema o,” (Kejadian 25:23)
oluk asogo obok moʼgulesi. Asogo moʼgulesi ai re, is en di aʼge yu aʼge mesik tigisa pam poligenebesi puk. We, at Allah ogola opoluk poligenebesi ai o. 13Wene ai ʼgelaʼge mesik disogo egeiyat,
“At Yakub ai nede o.
Aʼgeat de, at Esau ai nebit o,” (Maleakhi 1:2-3)
oluk egeimu re, pelal wokho pegesa.
14Holuk e, nis en e, noʼgosogo ul. At Allah ebabut dagansogo tegei u no? Modok erlak o. Allah ebabut e, hegit. 15At en e, Musa disogo moʼgulesi,
“An enat e, nede aʼge holuk nedeabenebasulat,
nede hwedik aʼge holuk nede hwedigabenebasulat, tik o,” (Keluaran 33:19)
oluk moʼgulesi. 16Allah en asogo oso ai re, aphwami onogola en op opoluk, is en logon ningsogo tolukmu en, edeabenebasu erlak. We, at Allah ebabut op enat edeabonoboluk enebe wogenebiso ai o. 17At Allah en ʼgain Piraun disogo moʼgulesi,
“An en yu pagerat edikhebegi o.
Aphwami en an nanni enaluk agalat,
nonuk o di owi yu owi moʼgulentil lagalat, tuagoluk edikhebegi o,” (Keluaran 9:16)
oluk moʼgulesimu Allah iak pelal wogo ano pam pelal wokho pegesa. 18At Allah en e,
“At yu nede o,” oluk ede epasu aʼge holugat, edeap pasulat, ye,
“At ai aʼgul erigap paik,” oluk ede epasu aʼge holugat aʼgul erigap pasulat, tiso ai o.
Allah olot het aphwami enebam pasulat, edeabenebasulat, tiso wene
19Asogo tiso ai en, hat mesik en an disogo moʼgulnum epasu legi,
“At Allah ede opoluk tiso aʼge ai, ap sa en,
Nebit, oluk erlagap po no. Asogo erlagap po mia aʼgeat de, nopaget wene nenebam pasu,” oluk u epasu legi o. 20Eige! Nare yu. At Allah iak osoam, hat hiak uak lagalu no? Mia o. Aphwami en ik eʼbe domul aʼge heleʼgogwiam e, ʼgwiang domul ai en e, at heleʼgiso aʼge ai moʼguleselat e,
“Hat en an disogo nopaget taknebegen,” oluk moʼgulom no? Mia o. 21ʼGwiang domul ai mesigat aʼgeat de, at heleʼgiso aʼge ai eiyeatma re, mesik opsogo heleʼgogo pasulat, mesik wiak-wiak heliʼgogo pasulat, tu mia no? Tuat o.
22Ai ʼgelaʼge, at Allah ede epasulat e,
“Aphwami an en walentegis aʼgeat de, is pema en nolot herap pogwi ai en, wiagabenebaigoluk, nolot het aga aʼge ai, is en nebabut ʼbalogulat, nanni oruak aʼge ano enaluk agalat, tuak o,” oluk epe mosogo welago yo. 23Is ai enebaget asogo epe mosogo welat, nis nenebaget disogo epasu,
“Is logon nede aʼge obabenebigoluk naduk walentegis ai, op modok tagenebaik aʼge enaluk emak o,” oluk epasu. 24Asogo epasu aʼge ai, nis aphwami Yahudi aʼge nak poliknenebesirik yoʼgo nenebesi puk. Is oʼborl oʼgwe aʼge eneminat poliknenebesirik yoʼgo enebesiat o. 25Asogo oluk at Allah en e, wene mesik disogo egei,
“Aphwami we aʼge an neiyagai erlak welegesa aʼge re, an neiyagaiat o, oluk eselat,
enebe nedeabonobo erlak aʼge, nedeat o, oluk eselat, tik o. (Hosea 2:23=TB 2:22)
26An en e, aphwami o momu aʼge paget e,
His e, an neiyagai puk o, oluk egi aʼgeat de, pobuk is o eba aʼge enebagerat,
O yema an nelaluk welago aʼge neiyagai o, oluk ik o,” (Hosea 1:10)
oluk egeimu re, at Hosea en pelal wokho pesi.
27-28Ye, wene mesik at Allah en e, disogo egei,
“Aphwami ʼgwiangma aʼge yema wene enebam modok perleneat enebam paik ai en e,
aphwami Israel en dogoʼgwe aʼge enebe ik al mameʼgik ik laut lok yeʼgelak aʼge eragam oʼgwe welago ai ʼgelaʼge oruak o.
Aʼgeat de, we, enebe wei nak delenebik o,” (Yesaya 10:22-23)
oluk egeimu Yesaya en pelal wokho pesi. 29Asogo oluk Yesaya enat wene mesik pageat disogo egei,
“Nenaik ʼgain Onuk Logo aʼge anni aʼbik ano en e,
nis en dogoʼgwe aʼge mesik ukpo erlakma en modogat warenebisellepma re,
Sodom ʼgelaʼge agalat,
Gomora hegit agalat, tolu o,” (Yesaya 1:9)
oluk Yesaya en pelal wokho pesiat.
Aphwami Israel aʼge en enede Yesus ebam heʼberik po erlakma en togu legesa wene
30Ai holuk e, nis en noʼgosogo ul? Disogo u o. Is aphwami oʼborl oʼgwe aʼge en wene enebam aʼge Allah en noʼgorlogo wokholuk, togolik emin hwedik tagonobouwagoluk tu aʼge logon ningsogo tu erlak. Aʼgeat de, enede Yesus ebam heʼberik pegesema re, Allah en wene enebam aʼge noʼgorlogo wokholuk, pobuk togolik emin hwedik tagenebesi. 31Asogo aʼgeat de, is aphwami Israel aʼge en, Allah en wene enebam aʼge noʼgorlogo wokholuk, pobuk togolik at emin hwedik tagonobo wene ano hologo wolomogoluk walhegesa aʼgeat de, mia aga. 32Nopaget en asogo mia aga. Ai re, enede Yesus ebam heʼberik po erlak, we, onuʼgwarek enede opoluk togu legesa ai enat o. Aphwami ebela pam lagalat helep pam onoyuk aʼgul dungsogo wathorlogwi ʼgelaʼge, nal egesa ai o. 33Wene ai paget Allah en e, disogo egei,
“An o Sion eba helep ʼgelaʼge mesik pegi yu hemit!
Helep ai pam aphwami onoyuk aʼgul dungsogo wathorloluk, ʼbulak horlogu lema o.
Aʼgeat de, henebe loʼbok henede at ebam heʼberik pagup aʼge heneʼgerli hagup modok erlak o,” (Yesaya 28:16)
oluk egeimu pelal wokho pegesa.
Currently Selected:
Roma 9: WUL
Highlight
Share
Compare
Copy
Want to have your highlights saved across all your devices? Sign up or sign in
