Powadi 3
3
Ronso inso a ponto'ori mentee
3:1-26
1Hei anaku, si kolupeo pompaguruku,
ka po'ineeomo aroamu mekariao parentaku,
2hangano melai tinuwu ka luwuno ta'u tumuwumu
saru manangaia ta tiniangiako ndi omue.
3Pompehohawa ka petenunu si tebinta inso ndi omue!
Pe'enu-enuakomo atuu a we'umu, buriomo i laro aroamu,
4 #
Luk. 2:52
ka komohawe pompehohawa ka pompelangkai
a pongkita-Do Ue Ala saru mia.
5Pe'ala-ala Iramo i Ue tompaano aroamu,
ka si pehonda a ponto'orimu omuemu.
6Pe'ala-ala Iramo a laro ntumuwumu,
ka Ira mokomoleoo pesalaamu.
7 #
Rom. 12:16
Si potae koroimu pande mosongka,
doitoako Iramo i Ue ka olaiakono mosa'oa;
8onaemo anu ta mokomoikoo koroimu
ka mokorosoo luwuno wukumu.
9Pelangkaiako Iramo i Ue arataamu
ka wua amba-ambano inso a hasilino witamu,
10ka luwuno si'emu ta te'ihii buke ranta hadio ntu'u,
ka bolusa pomporo'iamu ta luluaako uwoino wua anggorono.
11 #
Ayb. 5:17
#
Ibr. 12:5-6
Hei anaku, si pebungkuio pompaguru-Do i Ue,
ka si te'osaakono pompopoto'ori-Do.
12 #
Meng. 3:19
Hangano Ondae i Ue tumunduhio mia anu pinehohawa-Do,
kana asa ama a ana anu pinehohawano.
13Me'uraomo mia anu mohawe ponto'ori anu mentee,
mia anu mohawe pande,
14hangano me'urano lumaloio salaka,
ka hasilino lumaloio wulaa.
15Onae masuliopo olino sekonopo paramata;
maupo hapa anu inehemu nahi pokopengkenaakono.
16Tuwu melai kongko a ngkae koanamu,
a ngkae manggalimu kaeaa ka pompelangkai.
17Pesalaano onaemo pesalaa anu buke me'uraa,
luwuno pesalaano manangai luwu.
18Onae gagi keu tuwuano mia anu metako ndi onae,
isema anu me'ini ndi onae ta pinau me'ura.
19Saru ponto'ori-Do i Ue Donaaomo empehino tolino,
saru pinewowolo molino Dopakosio langi,
20saru ponto'ori-Do uwoino tahi malua asa wawontolino tesiarawo
ka seru mompo'iti tontoru.
21Hei anaku, pontimbanga ka pande mosongka si olai inso a matamu,
pekariaomo atuu,
22ka atuu ta gagi tuwuano sumangamu,
ka ramba-rambano we'umu.
23Ka omue komelempa a mpesalaamu nahina mompokodoito,
ka karumu nahi ta tetidu.
24Tewala mepomboleko, nahi kodoito,
sine omue komepombole ka moturi rodo.
25Siimo doitoakono masolaa anu mepobingko,
ke mateano mia mosa'o gauno, tewala atuu hawe.
26Hangano Ondaemo i Ue anu ta gagi pehondaamu,
ka Ira lumiahakono karumu inso a oho.
Po'oluako moweweu moiko
3:27-35
27Si ontoo moikoado mia anu tekona domentarimao,
kahinaano upolio weweuo.
28Si potae a mpe'asa miamu, ”Lakomo ka pekulemo,
tisomopo kuweeakomu,” sekono anu inemano hinao ndi omue.
29Si posongka anu mosa'o a mpe'asa miamu,
sekono onae nahina pinorerengkono ipo'ia saru omue.
30Si pe'u'uaakono asa mia nahina pu'uno,
kahinaano onae nahi poweweu mosa'o ndi omue.
31Si mosisiriakono mia anu lambaha,
ka si pobiniki maupo te'asa inso a mpesalaano,
32hangano mia anu tesaa onaemo anu mokoburu-Do i Ue,
sine Ondae mewali-waliakono mia anu moleo.
33Pontotonaa-Do i Ue kongko a rahano mia mosa'o gauno,
sine po'iangano mia mentee Doronsoo.
34 #
Yak. 4:6; 1Pet. 5:5 Tewala Ondae mo'aropi anu mompasinggiri, Ondae mbo'u mompasinggiri,
sine mia anu me'urumako Dopehohawao.
35Mia pande mosongka ta mohawe pompelangkai,
sine mia anu benge-benge ta montarima pasinggiri.
Currently Selected:
Powadi 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
