Powadi 4
4
Patudu mo'ungke ponto'ori mentee
4:1-27
1Rongeomo, hei nana'ote, pompaguruno asa ama,
ka pekokoongakonomo ka upohawe ponto'ori,
2hangano ongkue moweeakomu pompaguru anu moiko;
si bintao pontisoku.
3Tempono ongkue da gagi ana i rahado amaku,
molema ka kana anado ineku anu asa-asa,
4dopaguru aku amaku, dopotae ndi ongkue, ”Po'ineeomo aroamu uminio pauku;
pe'inimo a luwuno pontisoku, ka omue kotuwu.
5Alaomo ponto'ori anu mentee, alaomo pompewowolo molino,
si kolupeo, ka si pansia inso a mpinauno ngangaku.
6Si bintao ponto'ori anu mentee atuu, ka kopinekaria,
onae pehohawao, ka ta dumagaiko.
7Pompu'uano ponto'ori anu mentee onaemo alaomo ponto'ori anu mentee
ka saru luwuno anu inalamu alaomo ponto'ori.
8Onae su'uomo, ka omue ta tumandeko;
omue ta mokogagiko pinelangkai tewala ukopuio.
9Onae ta mompokonaakomu bunga peramba-ramba anu tekosi a ulumu,
ramba-ramba ulu anu tekosi ta weeakomu.”
10Hei anaku, rongeomo ka tarimaomo pauku,
ka igagi hadio ta'u tumuwumu.
11Ongkue paguruakomu pesalaa tumo'orio anu mentee,
ongkue wawako a mpesalaa anu moleo.
12Tewala omue melempa, pelempamu nahi ta te'onsoi,
tewala omue melulu, nahi kotetidu.
13Pe'inimo a pompaguru, si potolao,
pekariaomo, hangano onaemo tuwumu.
14Si pesalaio pesalaano mia mosa'o gauno,
ka si tondao pesalaano mia moweweu mosa'o.
15Olaiakonomo pesalaa atuu, si telaloio,
pansiamo inso ndi onae ka potilalomo.
16Hangano nahi dompokompoturi,
tewala nahi dompoweweu anu mosa'o;
tampula mongkokoturido,
tewala nahi domeweweuo mia tetidu;
17hangano ondae mpongkaa roti gau mosa'o,
ka mpo'inu anggoro pobobarasaia.
18Sine, pesalaano mia mentee atuu kana wantano towea,
anu komewa-mewantano hawe kona ntu'u ntonga oleo.
19Pesalaano mia mosa'o gauno atuu kana wongi-wongi;
nahi domento'orio hapa pu'uno ka dontetidu.
20Hei anaku, pekokoongakonomo pauku,
po'aroomo birimu a mpinauku;
21luwuno atuu si olai inso ndi omue,
naaomo atuu i laro aroamu.
22Hangano onaemo atuu anu gagi tuwuado anu mehaweo
ka mokotompao asa ngkoroido.
23Aroamu dagaiakonomo luwuno petangkoro,
hangano insomo i ra'ai tepansari tuwua.
24Tadiomo nganga pompopo'oo inso ndi omue
ka poko'olaiomo wiwi pegaupi inso ndi omue.
25Po'ineeomo matamu mengkita mpiha i arono
ka pengkitano matamu kongko mpiha i arono.
26 #
Ibr. 12:13
Pokomereteomo pesalaano karumu
ka asalakono tekosi luwuno pesalaamu.
27Si pansia i koana ke i manggali,
poko'olaiomo karumu inso a wineweu mosa'o.
Currently Selected:
Powadi 4: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
