Powadi 2
2
Tuduno mo'ungke ponto'ori anu mentee
2:1-22
1Hei anaku, tewala utarimao pauku
ka numaao parentaku i laro aroamu,
2ranta birimu mekokoongakono ponto'ori anu mentee,
ka aroamu tengkoo a mpande,
3oo, tewala omue mebooli a ponto'ori,
ka mesuara mo'ema pande,
4tewala omue umungkeo kana mo'ungke salaka,
ka mompari-pari umungkeo kana pompari-pari mo'ungke arataa tetano,
5ka omue komohawe ponto'ori mongkona doitoako Ira i Ue
ka mohawe ponto'ori mongkona Ondae Ue Ala.
6Hangano Ondaemo i Ue anu mompowee ponto'ori anu mentee,
inso a nganga-Do hawe ponto'ori ka pande.
7Ondae mompatinda pontimbanga tiano mia anu moleo,
gagi kantano mia anu tuwuno nahina tataano,
8modagai sala moleoa,
ka mekakaakono pesalaado mia anu mpetenunu ndi Ondae.
9Hangano kanandio omue ko mokonto'orio mongkona menteea, moleoa,
ka nahina pegaupi, onaemo luwuno pesalaa anu moiko.
10Hangano ponto'ori anu mentee ta mewinso i laro aroamu
ka ponto'ori ta mokonsanaao sumangamu;
11pande mosongka ta mekakaakomu,
pandea ta dumagaiko
12ka utola inso a nsala mosa'oa,
inso a mia anu mompau pompopo'oo,
13inso ndi ondae anu mebintao pesalaa anu moleo
ka mentondao pesalaa wongi-wongia;
14anu mpo'unde a larono wineweu mosa'oa,
mengkokora-kora mpo'unde hangano pompopo'oo,
15anu molengku pesalaano
ka pansia peleluno;
16ka utola inso a beine sodilo,
inso a beine lansara anu mo'ahi pompopandeino,
17anu bintao tamano tempono mongura
ka kumolupeo pedandia-Do Ue Alano.
18Menteeano rahano tondu a laro matea,
salano te'aro a onitudo mia mate.
19Luwuno mia anu aiwa ndi onae nahi pekule mbo'u,
ka nahi pohawe sala ntuwua.
20Onaemo pu'uno tondaomo pesalaano mia moiko,
ka pekakaakonomo pesalaano mia mentee.
21Hangano mia moleo ta mo'iangario wita,
ka mia anu nahina tataano anu ta mo'ia mpiha i ra'ai,
22sine mia mosa'o gauno ta pinoko tampula inso i wita atuu,
ka anu mohapu pedandia ta tinadi inso i ra'ai.
Currently Selected:
Powadi 2: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
