I MATIU 28
28
Pewangu-Do i Yesu
28:1-10
(Mrk. 16:1-8; Luk. 24:1-12; Yoh. 20:1-10)
1Mansano telaloomo oleo Saba, tamo tebosi towea a oleo amba-ambano minggu atuu, lumako iramo i Maria Madalena ka i Maria anu susua, kumita-kitao kaburu atuu. 2Ka gagiomo leelu anu tedoa meroku hangano aasa mala'eka-Do i Ue metii inso i langi ka aiwa a watu atuu ka lumundio ka i'amba mentoro i wawono. 3Rupano kana koliki ka sangkano mopute kana seru baku. 4Ka anu mpodagai atuudo mpondidi-ndidi medoito ka gagi kana mia memate. 5Sine mala'eka atuu motaeako ira beine atuu, ”Siimo imedoito; hangano kuto'orio ime'ungke Ira i Yesu anu pinaso a ngkeu pinotamba atuu. 6Nami Dondio i ndi'ai, hangano mewangu Iramo, mengkena kana anu Dopauomo. Aiwa, imengkitaomo pepombolea-Do. 7Ka impotuturakomo melako ka imempauako ira ana guru-Do nine mewangu Iramo inso i olodo mia mate. Dopese'elungi komiu lumako i Galilea; i ra'ai komiu mengkita Ira. Menteeano kupauakomiumo.” 8Mpontuturako iramo melako inso a ngkaburu atuu, medoito mesaloako mawongko anu langkai ka dompelulu mpontuturako ka domempauako ira ana guru-Do i Yesu. 9Borono Ondae i Yesu tepohaweako ira ka Dopotae, ”Rodoa ndi omiu.” Domerangkuhi Ira ka dompekopui a ngkaru-Do saru mpesombai Ira. 10Ka Dopotaeako ira i Yesu, ”Si medoito. Imelako ka imempauako iramo pepaekompo-Ku, ka domelako i Galilea, ka i ra'aimo ira mengkita Aku.”
Pegaupido Puu Mpobitara Agama
28:11-15
11Da kontongaado a nsala, me'aiwa iramo ba opia mia mpodagai atuu melako a ngkota ka mempauo luwuno anu gagi atuu a mpetewawado sando mpesomba. 12Ka umarido nteriso saru mia memota'u, domempakosiomo ka dompoweeako ira hadio doi a nsorodadu atuudo 13ka dompotae, ”Asalakono ka imempauo, nine ana guru-Do me'aiwa wongi-wongi ka domponakoo tempono impoturi. 14Ka tewala anu gagi andio dorongeo petewawa i wita atuu, kami koa mpepauako ira, ka si mpohawe anu mokonsusa komiu.” 15Domentarimao doi atuu ka meweweuo kana anu dome'inoliwiako. Ka tutulu andio telele i olodo to Yahudi hawe kanandio-andio.
Parenta mompalele Lele Mawongkoa
28:16-20
16 #
Mat. 26:32; Mrk. 14:28 Ka ana guru anu hopulu ka aasa atuu mpelungka melako i Galilea, a pongku anu Dopatotoako iramo i Yesu. 17Mansado mengkita Ira dompesombai Ira, sine ba opia mia nanta-nanta. 18Ondae i Yesu rumangkuhi ira ka Dopotae, ”Wineeako Akumo luwuno pabawa i suruga ka i tolino. 19#Tin. 1:8 Onaemo pu'uno imelakomo, impokogagi iramo ana guru-Ku luwuno tongku ka imebaho iramo a nee-Do i Ama ka Ana ka Penaa Mempori, 20ka imempaguru iramo meweweuo luwuakoano anu Kuparentaa komiu. Ka imento'oriomo, Aku kumongkomi komiu mpiha hawe a mpokotampaano tempo.”
Currently Selected:
I MATIU 28: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
