I MATIU 27
27
Ondae i Yesu pineweengako ndi Pilatu Mateno i Yudasi
27:1-10
1 #
Mrk. 15:1; Luk. 23:1; Yoh. 18:28 Tempono tamo meene, luwuno petewawado sando mpesomba ka mia memota'udo tongku Yahudi mpepumpu ka mempakosio ka Dopinepate i Yesu. 2Domempongu Ira ka do'amba winawa pineweengako ndi Pilatu, petewawa i wita atuu.
3 #
Tin. 1:18-19
Tempono ikitao i Yudasi anu meweengako Ira, nine Ondae i Yesu pinakosiomo Ira hinuku mate, me'o'oleomo. Ka i'amba mokuleo doi anu tolu pulu salaka atuu a mpetewawado sando mpesomba ka mia memota'u, 4ka ipotae, ”Tehala akumo hangano meweengakono reano mia anu nahina sala-Do.” Sine domesangkio, ”Nde to'oriamamike atuu? Atuu to'oriamu omuemu!” 5Onaemo ka ipetadiakono doi salaka atuu a laro Raha Mempori, ka i'amba lumako inso i tu'ai ka ipendoe. 6Dome'alao petewawado sando mpesomba doi salaka atuu ka dompotae, ”Nahi moiko iwininso doi andio a laro burua pesomba, hangano andio doi rea.” 7Umari nteriso doi atuu dompo'oliako wita anu nineeako Witano Puu Mponsuu Kuro ka ipinokogagi pekaburuado mia mehawe. 8Onaemo pu'uno wita atuu hawe a oleo andio nineeako Wita Rea. 9#Sak. 11:12-13 Hangano kanandio inihiiomo pau anu pinohaweno Nabi Yeremia, ”Ondae mpotarima tolu pulu doi salaka, onaemo olino mia aasa anu pinakosi montonda poreke anu domeleleoakono i olodo to Isaraeli, 10ka doi atuu dompeweengakono tiano witano puu mponsuu kuro, kana pe'oliwi-Do i Ue ndi ongkue.”
Ondae i Yesu i arono i Pilatu
27:11-26
(Mrk. 15:1-15; Luk. 23:1-5, 13-25; Yoh. 18:33–19:16)
11Ka Do'amba i Yesu pino'aro a pentewawa i wita atuu. Ka pentewawa i wita atuu mesikeno ndi Ondae, ”Omueke mokoledo to Yahudi?” Sumangki Ira i Yesu, ”Omuemu anu pauo.”
12Sine a pontuluri anu pinaudo petewawado sando mpesomba ka mia memota'u ndi Ondae, nahi Dosangki maupo hapa. 13Onaemo ka ipotae i Pilatu ndi Ondae, ”Nahi Urongeoke tedoa hadio pontulurido sakosii andio ndi Omue?”
14Sine nahi Dosangki maupo te'asa mpali pau, onaemo ka itedoa kohali-hali pentewawa i wita atuu.
15Gagiomo gaudo pentewawa i wita atuu mompotola aasa mia hinuku a sompo-sompo oleo langkai atuu montonda pobinikido mia hadio. 16I tempo atuu hinao a laro torungku asa mia anu teto'ori poweweuno mosa'o anu meneeako i Yesu Baraba. 17Hangano mpepumpu iramo i ra'ai, motae i Pilatu ndi ondae, ”Isema anu inehemiu kupotolaakomiu, i Yesu Baraba ke i Yesu, anu nineeako i Kerisituu?” 18Lano ito'orio, nine dompeweengakonomo i Yesu hangano kohilido. 19Tempono mentoro i Pilatu a ngkadera pobitaraa, beineno montena mowawa pe'oliwi ndi onae, ”Si salo-saloo kara-karano mia mentee atuu, Nde hangano Ondae ka kutedoa marasai a laro mo'ipiku hieno wongi.” 20Sine hangano pomposingkido petewawado sando mpesomba ka mia memota'u, mia hadio memoroko me'emao ka ipinotola i Baraba ka i Yesu hinuku mate. 21Sumangki pentewawa i wita atuu ka ipotaeako ira, ”Isema i olodo orua mia atuu anu inehemiu kupotolaakomiu?” Dompotae, ”I Baraba.” 22Ipotaeako ira i Pilatu, ”Tewala kanatuu, hapa anu asalakono kuweweuo ndi Yesu, anu nineeako i Kerisituu?” Luwudo mpebooli, ”Onae asalakono pinaso a ngkeu pinotamba!”
23Ipotae, ”Sine poweweu mosa'o hapake anu Iweweuomo?” Sine komero-merokuno dompebooli, ”Onae asalakono pinaso a ngkeu pinotamba!” 24#Win. 21:6-9 Mansano kumitao i Pilatu nine nahina tuduno luwuno pinauno, tendeano mompu'uomo memarisu, i'alao uwoi ka iwo'ohio kaeno i arodo mia hadio ka ipotae, ”Nahina salaku a reano mia andio; atuu to'oriamiumo!” 25Ka luwuno palili atuu mesangki, ”Po'ineeomo reano pinoposuruako ndi omami ka a luwuno anamami!” 26Ka i'amba motolaako ira i Baraba, sine Ondae i Yesu domensepi Ira ka i'amba pineweengako ka Dopinaso a ngkeu pinotamba.
Ondae i Yesu pinasinggiri
27:27-31
(Mrk. 15:16-20; Yoh. 19:2-3)
27Ka i'amba sorodaduno pentewawa i wita atuu wawa Ira i Yesu a raha pobitaraa, ka do'amba mempinoboi luwuno sorodadu mpepumpu lumimbu Ira i Yesu. 28Domelohuo sangka-Do ka mpokonaako Ira lemba meloe wungo. 29Dome'enao rui gagi aasa ramba-ramba ulu ka domenaao a wawo ulu-Do, ka do'amba mpoweeako Ira asa tuko a ngkae koana-Do. Ka do'amba mpenggolontu i aro-Do ka pasinggiri Ira, dompotae, ”Tabe, hei mokoledo to Yahudi!” 30Dome'onui Ira ka me'alao tuko atuu ka domentunduhiako Ira a ulu-Do. 31Umarido mempasinggiri Ira domelohuo lemba meloe atuu inso ndi Ondae ka dowali mpokonaako Ira mbo'u sangka-Do. Ka do'amba mewawa Ira meluarako ka Dopinaso a ngkeu pinotamba.
Ondae i Yesu pinaso a ngkeu pinotamba
27:32-44
(Mrk. 15:21-32; Luk. 23:26, 33-43; Yoh. 19:17-24)
32Ka do'amba mpelempa mpeluarako inso a ngkota, dontepotowoakono asa mia inso i Kirene anu meneeako i Simo. Mia atuu domedadaio ka ipo'ahao keu pinotamba-Do i Yesu.
33Ka mehawe iramo i aasa po'ianga anu meneeako Gologota, pengkonaano: po'iangano taku ulu. 34Ka do'amba mpopo'inuako Ira anggoro sinaloako upeu. Mansa-Do menamio, nahi Dobehe uminuo. 35#Pud. 22:19 Umari-Do pinaso a ngkeu pinotamba dompetia-tiao sangka-Do mempotendeakono undi. 36Ka do'amba mpentoro i tu'ai dumagai Ira. 37Ka a wawo ulu-Do ninaa binuri anu pauo pu'uno tembio ka Dohinuku, ”Ndiomo i Yesu Mokoledo to Yahudi.”
38Meronga saru Ondae pinaso mbo'u a ngkeu pinotamba orua mia puu mporontu, aasa mia i koana ka aasa mia i manggali-Do.
39 #
Pud. 22:8; 109:25 Mia anu mentelalo i ra'ai mpepaukiako Ira saru mebitu-bitu ulu, 40#Mat. 26:61; Yoh. 2:19 dompotae: ”Hei Omue anu kobetao Raha Mempori ka kowali wanguo i larono otolu oleo, kaduduiomo koroi-Mu tewala Omue Ana-Do Ue Ala, petiimo inso a ngkeu pinotamba atuu!” 41Kanandio koa mbo'u petewawado sando mpesomba mperonga saru anu mponto'ori Taura ka mia memota'u mempasinggiri Ira ka dompotae, 42”Mia susua Ikadudui ira, sine koroi-No Onae-No nahi pokokaduduio! Onae mokoledo to Isaraeli? Po'ineeomo Ipetii inso a ngkeu pinotamba atuu ka kimpompe'ala-ala ndi Onae. 43#Pud. 22:9 Onae momperorohi ndi Ondae Ue Ala: po'ineeomo Ondae Ue Ala kumadudui Ira, tewala Dopemoikoo! Hangano motaeomo: Ongkue Ana-Do Ue Ala.” 44Maupo puu mporontu anu pinaso a ngkeu pinotamba meronga saru Onae tumatao kanatuu koa mbo'u.
Ondae i Yesu mate
27:45-56
(Mrk. 15:33-41; Luk. 23:44-49; Yoh. 19:28-30)
45Mompu'u inso langku hopulu ka orua wongi-wongi tumutuwio asa wawo wita atuu hawe langku otolu. 46#Pud. 22:2 Bara'ura langku otolu mebooli Iramo i Yesu meroku, ”Eli, Eli lama sabakhtani?” Pengkonaano: Ue Ala-Ku, Ue Ala-Ku, tembio ka Ibinta Aku? 47Rumongeo atuu, ba opia mia anu mpentade i tu'ai mpotae, ”Ipoboio i Elia.” 48Ka mopari-pariomo aiwa asa mia inso ndi ondae; i'alao beri nsawu, i'emoo a laro anggoro mo'olo, ka i'amba tumangkeakono tuko ka ipopo'inuako Ira i Yesu. 49Sine dompotae mia susua, ”Osi'i, po'ineeomo ka tomengkitao, ba ta hawe i Elia kumaduduio.” 50Mebooli Ira mbo'u i Yesu meroku ka Do'amba meweengakono penaa-Do.
51 #
Pel. 26:31-33
Ka kitaomo, sawu pelingo a Raha Mempori tesempa tepe'orua inso i wawono hawe i totono ka gagiomo leelu, ka pongku-pongku watu nteboka, 52ka kaburu nte'ungkahi ka hadio mia mempori anu memate iramo mpewangu. 53Ka umari-Do mewangu i Yesu, ondae mbo'u mpeluarako inso a ngkaburu, ka do'amba mpewinso a ngkota mempori mpepopokita a mia hadio.
54Petewawado sorodadu ka luwuno sorodaduno anu dumagai Ira i Yesu gagi tedoa medoito tempono domengkitao leelu ka hapa anu gagiomo, ka do'amba mpotae, ”Mentee ntu'u, Ondae andio Ana-Do Ue Ala.”
55 #
Mrk. 15:40-41; Luk. 8:2-3; 23:49 Ka kongko i tu'ai hadio beine anu mpengkita inso olai, onaemo luwuno beine anu tumonda Ira i Yesu inso i Galilea mekakaako Ira. 56I olodo i Maria Madalena, ka i Maria ineno i Yakobu ka i Yusupu, ka inedo anano i Sebedeu.
Ondae i Yesu kinaburu
27:57-61
(Mrk. 15:42-47; Luk. 23:50-56; Yoh. 19:38-42)
57Tamo wongi haweomo asa mia kaea, to Arimatea, anu meneeako i Yusupu ka anu gagiomo mbo'u ana guru-Do i Yesu. 58Onae lumako me'aro ndi Pilatu ka umemao wata ngkoroi-Do i Yesu. I Pilatu meparenta ka iwineeako. 59Ka i alaomo i Yusupu wata ngkoroi atuu, ka itongoakono sawu lena wo'ohu anu mopute, 60ka i'amba momboleo a laro ngkaburuno anu napi hori inihii, anu kinekeno a laro pongku watu, ka umarino molundiakono aasa watu langkai a mpewowano kaburu atuu, ka i'amba lumako.
61Sine i Maria Madalena ka i Maria susua mo'ia i tu'ai mentoro i arono kaburu atuu.
Kaburu-Do i Yesu dinagai
27:62-66
62Tisomono, onaemo umarino oleo pepatindaa, mehawe iramo petewawado sando mpesomba ka to Parisi mperonga-ronga mpe'aro ndi Pilatu, 63#Mat. 16:21; 17:23; 20:19; Mrk. 8:31; 9:31; 10:33-34; Luk. 9:22; 18:31-33 ka dompotae, ”Ue, kimerambeo, nine mia mompopo'oo atuu tempono ituwu motae: Umarino otolu oleo Aku mewangu. 64Onaemo pu'uno ipeparentamo ka idinagai kaburu atuu hawe a oleo ko'otolu; tewala naahi, bara'ura ana guruno melako mponakoo, ka do'amba mempauo a mpalili: Mewangu Iramo inso i olodo mia mate, ranta pompopo'ooa anu lembuino ta mosa'oopo sekono anu amba-ambano.” 65Ipotaeako ira i Pilatu, ”Ndio iramo anu mpodagaiakomiu, imelakomo ka imedagaio temoiko kaburu atuu.” 66Ka melako iramo ka anu mpodagai atuudo mpokowali ira mentondonio kaburu atuu ka medagaio.
Currently Selected:
I MATIU 27: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
