I MARAKUSU 1
1
I Yohane Puu Pobaho
1:1-8
(Mat. 3:1-6, 11-12; Luk. 3:3-6, 15-17; Yoh. 1:19-28)
1Ndiomo pompu'uano Lele Mawongkoa mongkona Ondae i Yesu Kerisituu, Ana-Do Ue Ala. 2#Mal. 3:1 Kana hinao teburi a wuntano Nabi Yesaya,
”Kitaomo, Kutenao tinena-Ku mese'elungi-Komiu,
onae ta patindao pesalaa-Miu;
3 #
Yes. 40:3
hinao suarano mia meboo-booli i pada one:
Patindaako Iramo i Ue pesalaa-Do,
pokoleoako Iramo sala”,
4kanandiomo i Yohane Puu Mpobaho meposaba i pada one ka ipobaho tepidia tiano po'ampunia hala. 5Ka i'amba mehawe iramo ndi onae mia inso i asa wawo wita Yudea ka luwuno palilino Yerusale, ka kontongaado memangakuakono halado mebinaho ira a ngkoro Yarade. 6#2Mok. 1:8 I Yohane mompokona lemba meloe inso a wulu unta ka meboo-booako kuli, ka kaangano kosume ka siu hoani. 7Ndiomo anu pinaleleno, ”Umarino ongkue Ira hawe anu lalu pabawa sekono ongkue; sekonopo metuundu kumaleako Ira onggono sapatu-Do nahi pototoku. 8Ongkue bahoakomiu uwoi, sine Ondae Ira bahoakomiu Penaa Mempori.”
I Yohane baho Ira i Yesu
1:9-11
(Mat. 3:13-17; Luk. 3:21-22; Yoh. 1:32-34)
9I tempo atuu hawe Iramo i Yesu inso i Nasare i wita Galilea, ka Ondae ibaho Ira i Yohane a ngkoro Yarade. 10I tempono Dope'engka inso a uwoi, Dokitao langi teberi, ka Penaa kana manu-manu marapatii metii i wawo-Do. 11#Teg. 22:2; Pud. 2:7; Yes. 42:1; Mat. 3:17; 12:18; Mrk. 9:7; Luk. 3:22; 9:35Ka i'amba terongeomo suara inso i suruga, ”Omuemo Ana-Ku anu pinehohawa-Ku, Omuemo mokomawongkoo aroa-Ku.”
Po'ara-arahakoa i pada one
1:12-13
(Mat. 4:1-11; Luk. 4:1-13)
12Nahi tehine umarino atuu Penaa wawa Ira i pada one. 13I pada one atuu Dopo'ia patopulu oleo tehineno, i Mosa'o umara-arahako Ira. Dopo'ia i ra'ai i olodo kondehora mo'ila ka mala'eka mpekakaako Ira.
Ondae i Yesu meposaba i Galilea
1:14-15
(Mat. 4:12-17; Luk. 4:14-15)
14Umarino rinako i Yohane hawe Iramo i Yesu i Galilea paleleo Lele Mawongkoa-Do Ue Ala, 15#Mat. 3:2; 4:17Dopotae, ”Tempono inihiiomo; Poparentaa-Do Ue Ala rangkuomo. Intepidimo ka impe'ala-alaomo Lele Mawongkoa!”
Ondae i Yesu mompoboi ana guru anu amba-ambano
1:16-20
(Mat. 4:18-22; Luk. 5:1-11)
16Tempono Ondae i Yesu kontongaa-Do melempa tumondao wiwi rano Galilea, Dokitao i Simo ka i Andarea, pepaekompono i Simo. Kontongaado tumendeo buanido a rano, hangano ondae puu mpobuani bou. 17Dopotaeako ira i Yesu, ”Aiwa, ka itonda Akumo ka Aku mokogagi komiu puu mpobuani mia.” 18Ka do'amba mompari-pari bintao buanido ka dotonda Ira. 19Ka mansa-Do motilaloakono i Yesu pelempaa-Do nahi olai, Dokitao i Yakobu, anano i Sebedeu, ka i Yohane, pepaekompono, kontongaado mokomoikoo buanido a laro bangka. 20Mompari-pari Ira i Yesu moboi ira onaemo ka dobintao amado, i Sebedeu, a laro bangka saru mia mentinambodo ka do'amba tumonda Ira.
Ondae i Yesu a laro raha tepumpua i Kapenau
1:21-28
(Luk. 4:31-37)
21Mehawe iramo i Kapenau. Mansano mompu'u oleo Saba, Ondae i Yesu mompari-pari mewinso a laro raha tepumpua ka mompaguru. 22#Mat. 7:28-29; Luk. 4:32 Mengkohali-hali ira merongeo pompaguru-Do, hangano Dopaguru ira kana mia anu pabawa, komba kana luwuno guru agama. 23I tempo atuu a laro raha tepumpua atuu hinao asa mia anu pinewinsokino onitu nsa'o. Mia atuu mebooli, 24”Hapa ta wineweu-Miu ndi omami, hei Yesu to Nasare? Komiu hawe mepate kami? Kuto'orio isema Omiu: Anu Mempori inso ndi Ondae Ue Ala.” 25Sine Dokuahakono i Yesu, Dopotae, ”Perodo-rodo, peluarakomo inso ndi onae!” 26Onitu nsa'o atuu nggumenggetoo mia atuu, ka kontongaano meraali meroku onae meluarako inso ndi onae. 27Mengkohali-hali ira luwu, onaemo ka domempopauo, dompotae, ”Hapa ndio? Aasa pompaguru wo'ohu. Ondae mepauako pabawa. Maupo onitu nsa'o Doparenta ira ka domentondao.” 28Ka i'amba rongaomo telele mongkona Ondae i asa wawo wita Galilea.
Ondae i Yesu mokotompao ponino i Peturu anu beine ka hadio mia susua
1:29-34
(Mat. 8:14-17; Luk. 4:38-41)
29Sapeluarako-Do inso a raha mpesombaa atuu lumako Iramo i Yesu saru i Yakobu ka i Yohane a rahano i Simo ka i Andarea. 30Ponino i Peturu anu beine kombole-mbole hangano mahaki mokula. Liu domempauako Ira i Yesu teweweuno. 31Lumako Ira a mpo'iangano beine atuu, ka tekonai uminio kaeno Dowanguo, ka i'amba tompaomo mokulano. Ka i'amba beine atuu mekakaako ira. 32Tamo wongi, umarino sumoo oleo, winawaomo ndi Ondae i Yesu luwuno mia anu memahaki ka anu pinewinsokino onitu nsa'o. 33Onaemo ka dompehowu luwuno palilino kota atuu i arono pewowa. 34Hadio mia pinokotompa-Do anu mperupa-rupa hakido ka monsaari hadio onitu nsa'o; Nahi Dobehe ira onitu nsa'o atuu mpepau, hangano domento'ori Ira.
Ondae i Yesu mompaguru a ngkota susua
1:35-39
(Luk. 4:42-44)
35Mo'o-mo'oru ntu'u, da wongi-wongi, mewangu Ira ka Dolako i bungkuno. Lumako Ira a mpo'ianga boni-boni ka Dopekakai i ra'ai. 36Sine i Simo ka wali-walino tumonda bungku Ira; 37tempono dontepohaweako Ira dompotae, ”Dome'ungke Komiu luwuno mia.” 38Sumangki Ira, ”Aiwamo ka tomelako a mpo'ianga susua, a ngkota anu ntepo'umpeda, ka Kupaleleo mbo'u i ra'ai Lele Mawongkoa, hangano onaemo Ku'aiwaako.” 39#Mat. 4:23; 9:35; Luk. 4:44Ka Do'amba lumako a luwuno wita Galilea ka paleleo Lele Mawongkoa a luwuno raha tepumpuado ka sumaari ira onitu nsa'o.
Ondae i Yesu mokotompao asa mia anu mahaki ngkuli mesaki
1:40-45
(Mat. 8:1-4; Luk. 5:12-16)
40Aasa mia anu mahaki ngkuli mesaki aiwa ndi Ondae i Yesu, ka kontongaano menggolontu i aro-Do onae mepetulungi ndi Ondae, ipotae, ”Tewala behe Komiu, Ipolio mokotompa aku.” 41Ka teleluomo aroa-Do mehohawao, ka Do'amba tumasiakono kae-Do, umanggao mia atuu ka Dopotae, ”Behe Aku, ka ugagimo tompa.” 42I tempo koa mbo'u atuu moliuomo haki ngkuli mesakino mia atuu, ka tompaomo. 43Mompari-pari Ira tumenao mia atuu ka ilako saru umoliwio moroso, 44#Ima. 14:1-32”Pepentiio, si pompau hapa-hapa mongkona andio maupo ndi sema, sine lakomo, popokitaomo koroimu a nsando mpesomba ka pesombaakonomo pesombamu hangano tompakomo, kana peparentano i Musa.” 45Sine mia atuu lumako pauo anu gagi atuu ka paleleo ba isua-suamo koa, ranta Ondae i Yesu nami Dopepopokita mewinso a laro ngkota. Mo'ia Ira i bungkuno a mpo'ianga anu boni-boni; sine mehawe ira koa mbo'u mpiha mia ndi Ondae inso a luwuno po'ianga.
Currently Selected:
I MARAKUSU 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
