Imama 26

Ronso

26:1-13

1 # Pel. 20:4; Ima. 19:4; Win. 5:8; 16:21-22; 27:15 # Win. 7:12-24; 28:1-14 ”Si mpoweweu lahumoa pesombaamiu, si mpompontade tinaha ke tugu pelahumoaamiu, ka si mponaa watu ngginori i witamiu ka impenggolontu mpesomba ndi onae, hangano Ongkuemo Ue, Ue Alamiu. 2Asalakono impekakaakono luwuno oleo Saba-Ku ka melangkaio po'ianga mempori-Ku. Ongkuemo Ue.

3 # Win. 11:13-15 Tewala mentuwu komiu montonda pompakosi-Ku ka kongko mpe'ini a parenta-Ku saru meweweuo, 4Aku moweeakomiu usa ia tempono, ranta wita atuu mompowee hasilino ka keu a lere mompowee wuano. 5Tempomiu mposesa ta menggoe hawe tempo mo'opu wua anggoro ka tempo mo'opu wua anggoro ta menggoe hawe tempo morawo inii. Komiu mpongkaa kaangamiu ranta mowohi ka merodo mpo'ia i witamiu. 6Aku mompowee rodoa i wita atuu, ranta komiu mpepombole nahina maupo hapa ta modengke komiu. Aku mokotampulao kondehora lambaha inso i wita atuu, ka ponai nahi ta telalo i witamiu. 7Komiu melulu ira iwalimiu, ka ira memateako ponai i aromiu. 8Olima mia inso i olomiu ta molulu asa etu, ka asa etu mia inso i olomiu ta molulu hopulu nsowu ka luwuno iwalimiu ira memateako ponai i aromiu. 9Aku mewolili ndi omiu ka weweu komiu mpe'ana'ue saru tetiangi hadio, ka mokorosoo pedandia-Ku saru omiu. 10Omiu da komiu mpongkaa wuano anu tehine inso a mpo'opua anu laloomo, ka wuano anu tehine atuu komiu meluarakono ka imenaao anu wo'ohu. 11Aku numaao Kema Mempori-Ku i tonga-tongamiu ka aroa-Ku nahi ta te'osa kumita komiu. 12#2Kor. 6:16Sine Aku kongko i tonga-tongamiu ka Aku gagi Ue Alamiu ka omiu megagi bawaa-Ku. 13Ongkuemo Ue, Ue Alamiu, anu wawa komiu mpeluarako inso i wita Masiri, kasi megagi mbo'u atado. Kupuduomo keu pasanga anu i wawomiu ka weweu komiu mpelempa moleo.”

Totonaa

26:14-46

14 # Win. 28:15-68 ”Sine tewala nahi mpomperorongeako ndi Ongkue, ka nahi meweweuo luwuno parenta atuu, 15tewala nahi mentondao pompakosi-Ku ka aroamiu nte'osa rumongeo atora-Ku, ka nahi meweweuo luwuno parenta-Ku ka melimpaio pedandia-Ku, 16manasa Ongkue mbo'u Aku weweuo kanandio ndi omiu, onaemo Aku mompotii tededengkea ndi omiu, mehengge mokari saru mokula, anu weweuo mata masola ka tumuwu marasai; nahi ta hina tuduno imerawoo iniimiu, hangano wuano ta pingko domengkaano iwalimiu. 17Ongkue anu umewai komiu, ranta iwalimiu numangi komiu, ka ondae anu umo'aliaa komiu ira pabawai komiu, ka komiu mpolai, maupo nahina mia anu lumulu komiu.

18Ka tewala omiu maupo a laro nteweweu anu kanandio nahi meronge Aku, manasa ta lansaraopo Kusepi komiu hawe meluka pepintu hangano halamiu, 19ka Aku mokotampulao pompelangla-langkaimu ka rosomu ka weweuo langi i wawomu kana labu ka witamu kana mala. 20Ka rosomu ta pingko mpena, witamu nahi ta moweeko hasilino ka luwuno keu i wita atuu nahi ta mompowee wuano.

21Tewala tumuwumu kongko umewai Aku, ka nahi behe meronge Aku, manasa Kutiangio pohuku-Ku ndi omiu hawe meluka pepintu menunu saru halamiu. 22Aku mompotola ndi omiu kondehora mo'ila anu ta rumopu ira anamiu ka anu ta rumopuo pinotuwumiu, saru weweu komiu gagi tedei, ranta luwuno salamiu gagi boni-boni.

23Maupo a laro nteweweumiu anu kanandio nahi mebehe Kuhuku komiu, ka tuwumiu kongko umewai Aku, 24manasa Ongkue mbo'u umewai komiu ka Ongkue-Ku humuku komiu meluka pepintu hangano halamiu, 25ka Aku mompotii ndi omiu aasa ponai anu ta weweuo pombaloa hangano linalo pedandia atuu; tewala mpepumpu komiu te'ipua i luwuno kotamiu, ka Ku'amba mompotola haki mesaki i tonga-tongamiu ka komiu mempineweengako a ngkaedo iwali. 26Tewala Kupokotampulao kaanga pinatindamu, manasa hopulu beine ta montunu roti i larono asa pontunua. Ira mempokuleo rotimu montonda ponsa'u pinakosi, ka komiu mpongkaa, sine nahi memowohi.

27Ka tewala omiu maupo a laro nteweweu kanandio nahi meronge Aku, ka tuwumiu kongko umewai Aku, 28manasa Ongkue mbo'u ta lansara umewai komiu ka Ongkue-Ku humuku komiu meluka pepintu hangano halamiu. 29Ka komiu mpongkaa baudo anamiu tama ka beine. 30Ka luwuno pongku wita pesombaamiu Aku rumopuo, ka luwuno pontunuamiu dupa Aku mokotampulao. Aku metadiakono luwuno wata ngkoroimiu a wawo luwuno wata ngkoroino lahumoamiu ka aroa-Ku ta te'osa kumitakomiu. 31Luwuno kotamiu Aku weweuo gagi hanga ngkota ka luwuno po'ianga memporimiu Aku sumolangio ka nami Kubehe mbo'u mowoo woono pesombamiu anu mompokomawongko. 32Ongkue-Ku sumolangio wita atuu, ranta iwalimiu anu mpo'ia i tu'ai ira mengkohali-hali hangano onae. 33Sine omiu Aku meweengakono i olodo luwuno tongku susua ka Ku'alao ponai lumulu komiu, ka witamiu ta gagi po'ianga londa ka luwuno kotamiu ta gagi hanga ngkota. 34I tempono atuu wita tepo'ia nahi pinekakaako a luwuno ta'u Saba, i tempono wita atuu londa ka tempono impo'ia i witado iwalimiu. I tempono atuu wita ta mohawe penaa-naaano ka membasaio luwuno ta'u Saba. 35I tempono wita atuu kontongaano londa wita atuu ta mohawe penaa-naaano anu napi hori membasaio kana luwuno ta'u Sabano, tempono impo'ia i tu'ai. 36Mongkona ondae anu da kongko mentuwu inso i olomiu, Aku mompotiiako ira danggara a laro aroado a luwuno witado iwalido, maupo unino lewe anu pinuurino angi ta lumulu ira, ka ira mpolai kana mia melulu olaiakono ponai. Ka ira ntebangku, kahinaano nahina mia anu lumulu ira. 37Ka ira ntetidu asa mia ka asa mia kana molaiako ponai, kahinaaho nahina lumulu ira. Nahi komiu mempolio mpekorahako i arodo iwalimiu. 38Komiu mempinokoropu i olodo tongku, ka witado iwalimiu ta mokotampula komiu. 39Isema anu da mo'ia tuwu i olomiu, ira metempula hangano i luwuno witado iwali, ka hangano salado uempu'udo mbo'u ira meropu kana uempu'udo.

40Sine tewala domemangakuakono salado ka salado uempu'udo, onaemo tebali nahi dompetenunu ndi Ongkue ka me'akuio mbo'u nine mentuwu ira umewai Aku, 41ka Ongkue mbo'u umewai ira ka wawa ira a witano iwalido ke tewala lembuino aroado anu motea atuu metuunduomo ka dome'owahio salado, 42#Teg. 17:7-8; 26:3-4; 28:13-14Aku rumambeo pedandia-Ku saru i Yako; pedandia-Ku mbo'u saru i Saki ka pedandia-Ku saru i Burahima ka wita atuu Aku rumambeo mbo'u.

43Wita atuu ira mebintao ka membasaio luwuno ta'u Saba onaemo tempono wita atuu londa, ka domebintao, ira me'owahio salado, komba hangano hapa, onaemo hangano nahi domentondao atora-Ku ka aroado nte'osa a pompakosi-Ku. 44Maupo kanandio, tempono domekongko i witano iwalido, nahi Aku mebungkui ira ke nahi Aku te'osaako ira, ranta Aku rumopu ira ka pedandia-Ku saru ondae nahi gagi, hangano Ongkuemo Ue, Ue Alado. 45Hangano ondae Aku rumambeo pedandia-Ku saru luwuno mia nse'elu anu winawa-Ku mpeluarako inso i wita Masiri i arodo luwuno tongku, ka Kugagi Ue Alado. Ongkuemo Ue.”

46Onaemo luwuno pompakosi ka luwuno atora saru luwuno songka anu pinakosi-Do i Ue, anu tinonda ndi Ondae i Ue saru to Isaraeli i torukuno Sinai, molalo i Musa.

Currently Selected:

Imama 26: XMZ

Highlight

Compare

Copy