Imama 25

Ta'u Saba ka ta'u Yobeli

25:1-22

1 # Pel. 23:10-11 Ondae i Ue mepau ndi Musa i torukuno Sinai, 2”Pepaumo a nto Isaraeli ka potaeako ira: Tewala mpewinso komiumo a wita anu Aku weeakomiu, wita atuu asalakono mohawe penaa-naaano gagi saba ndi Ondae i Ue. 3I larono onoo nta'u asalakono imporawoakono leremiu, ka onoo nta'u tehineno asalakono imperangkaio lere anggoromiu saru mpopumpu hasilino wita atuu. 4Sine a nta'u ko'opitu asalakono hinao tiano wita atuu asa saba, tempo penaa-naaano ntu'u, asa saba ndi Ondae i Ue. Leremiu si mporawoio ka lere anggoromiu si mperangkaio. 5Hapa anu tuwuako onaeno inso a mposowiamiu atuu, si sowio, ka wua anggoro inso a ngkeuno anggoromiu anu nahi mperangkaio, si me'opuo. Ta'u atuu asalakono gagi ta'u penaa-naaano ntu'u wita atuu. 6Hasilino wita i larono saba atuu asalakono gagi kaangamiu, omiu isa'a saru atamiu tama ka beine, tiado mia mentinambo ka mia hawe anu mpo'ia ndi omiu, 7tiado mbo'u pinotuwumiu ka kondehora mo'ila anu kongko i witamiu. Luwuno hasilino wita atuu moiko ikinaa.

8Umarino atuu asalakono imedoao opitu nta'u saba, opitu nta'u pepitu, ranta tempo opitu nta'u saba atuu onaemo pato pulu ka osio nta'u. 9Ka i'amba asalakono mpoporongeo unino tawuwua maupo isua a wula ko'opitu, tanggala hopulu wula atuu. A oleo langkai Pesintuwua asalakono impoporongeo unino tawuwua atuu maupo isua a luwuno wita atuu. 10Asalakono kai mpokomemporio ta'u kolima pulu, ka pinopoto'ori pompotolaa i wita atuu a luwuno palilino. Tempo atuu asalakono gagi ta'u Yobeli ndi omiu, a singge mia mekule a wita pine'ueno ka a nsukuno. 11Ta'u kolima pulu atuu asalakono gagi ta'u Yobeli ndi omiu. Si mporawo inii, ka hapa anu tuwuako onaeno i larono ta'u atuu si mensowio, ka keu anggoro anu nahi mperangkaio si me'opuo wuano. 12Hangano ta'u atuu ta'u Yobeli, asalakono atuu mempori ndi omiu. Hapa anu komiu mpongkaa asalakono hasili inso a lere. 13A nta'u Yobeli atuu asalakono singge mia mekule a wita pine'ueno.

14Tewala hinao inasamiu a mpe'asa miamiu ke mpo'oli inso ndi onae, si hina anu rugi i olomiu. 15Tewala mpo'oli komiu a mpe'asa miamiu asalakono montonda hadiono ta'u umarino ta'u Yobeli, ka tewala onae mo'asa ndi omue asalakono montonda hadiono ta'u ponsowia. 16Kolangka-langkaino hadiono ta'u atuu, kolangka-langkaino olino, ka komaku-makurano hadiono ta'u atuu, kokode-kodeino olino, hangano mararuno ponsowia anu inasano ndi omue. 17Si hina anu rugi i olomiu, sine asalakono imedoitoako Ira Ue Alamiu, hangano Ongkuemo Ue, Ue Alamiu.

18Asalakono imeweweuomo pompakosi-Ku ka mpe'ini mpiha a atora-Ku saru meweweuo, onaemo kai merodo mpo'ia i witamiu. 19Wita atuu ta mompowee hasilino, komiu mpongkaa ranta kai memowohi ka komiu merodo mpo'ia i ra'ai. 20Tewala mpesikeno komiu: Hapa anu kami mpokaa a nta'u ko'opitu atuu, kombake nahi moiko kami mporawo inii ka nahi moiko kami mpopumpu hasilino wita mami? 21Aku parentao poronso-Ku ndi omiu a nta'u ko'onoo, kai wita atuu mompowee hasilino tiano otolu nta'u. 22A nta'u ko'oalu komiu mporawo inii, sine komiu mpongkaa inso a hasili anu laano ranta ta'u ko'osio; ranta kai pewinso hasilino, komiu mpongkaa anu laano.”

Pontolosia wita

25:23-28

23”Wita si me'asao mpiha, hangano Ongkuemo ueno wita atuu, sekono omiu mia mehawe ka mia anu me'aiwa mperato ndi Ongkue. 24A luwuno wita pine'uemiu asalakono impompowee tiano po'owahi pontolosi wita. 25Tewala pepaekompomu gagi mongkokolaro, ranta kai asao asa ntia inso anu pine'ueno, asalakono pe'etuno anu umpeda ta umowahio pontolosi atuu aiwa ka itolosio anu inasano pepaekompono. 26Tewala nahina mia anu tumolosio, sine lembuino ipolio ka ipohawe anu ta tumolosiakono pine'ueno atuu, 27asalakono ka iwinsoo luwuno ta'u umarino umasao atuu a laro podoano. Polaluano asalakono ka ipokuleo a mia anu umolio inso ndi onae, ka ipepokule a wita pine'ueno. 28Sine tewala nahi polio mohawe anu ta wali mokuleakono, asalakono anu i'asao atuu mo'ia mpiha a ngkaeno mia anu umolio hawe a nta'u Yobeli. A nta'u Yobeli wita atuu tepotola, ka mia atuu moiko ipekule a wita pine'ueno.”

Pontolosia raha

25:29-34

29”Tewala asa mia mo'asa raha po'ianga i asa kota anu merere watu, ka pontolosia butu asa nta'u koa mompu'u inso a oleo i'asao. 30Tewala raha atuu nahi tinolosi i larono tempo asa nta'u, raha a laro kota merere watu atuu manasaomo gagi ipe'ueo mia umolio hawe a inuleno. A nta'u Yobeli raha atuu nahi pinokule. 31Sine luwuno raha a luwuno inia anu nahi limbuo rere watu asalakono rineke mengkena kana luwuno lere i wita atuu. A raha atuu asalakono ninao pabawa tumolosio ka a nta'u Yobeli raha atuu asalakono bebasi. 32Mongkona luwuno raha i luwuno kotado to Lewi, anu ta tumolosio luwuno raha atuu butu a nto Lewi anu nahina tampulaano. 33Maupo anu montolosi inso i olodo to Lewi, raha anu inasa i kotano anu me'ueo atuu asalakono pinokule a nta'u Yobeli. Hangano luwuno raha i luwuno kotado to Lewi, onaemo anudo i tonga-tongado to Isaraeli. 34Sine, pada pompakambia petengi-tengino luwuno kotado nahi moiko i inasa, hangano pada atuu anudo ranta nahina tampulaano.”

Pelelu a mia mongkokolaro

25:35-55

35 # Win. 15:7-8 ”Tewala pepaekompomiu gagi mongkokolaro, ranta nahi polio kumorahakono tumuwuno i olomiu, omiu asalakono mentulungio kana a mia hawe ka mia susua, kai pokotuwu i olomiu. 36Si mpo'ala bungano doi ke untu inso ndi onae, tendeano omiu asalakono medoitoako Ira Ue Alamiu, kai pokotuwu pepaekompomiu i olomiu. 37#Pel. 22:25; Win. 23:19-20Si poweeakono doimu ndi onae saru po'ema bungano, ka kaangamu si poweeakono ka mo'ema bungano. 38Ongkuemo Ue, Ue Alamiu, anu wawa komiu mpeluarako inso i wita Masiri, ka weeakomiu wita Kana'a, kai Ongkue gagi Ue Alamiu.

39 # Pel. 21:2-6; Win. 15:12-18 Tewala pepaekompomiu gagi mongkokolaro i olomiu ka ipeweengakono koroino ndi omiu, asalakono si mentenao mo'angga kana ata. 40Kana teweweuno mia tinambo ka mia hawe asalakono ipo'ia i olomiu, ranta ta'u Yobeli onae asalakono mo'angga ndi omue. 41Ka i'amba po'ineeomo ka ilako inso ndi omue, onae saru luwuno anano ka ipekule a mpe'etuno, mekule a wita pine'uedo uempu'uno. 42Hangano ondae atuu luwuno tetenaa-Ku anu Kuwawa ira mpeluarako inso i wita Masiri, si dome'inasa kana mia mo'asa ata. 43Si koa parentao saru tekuda, tendeano omiu asalakono medoitoako Ira Ue Alamiu. 44Atamu tama ke beine anu moiko impe'ueo onaemo inso i olodo luwuno tongku petengi-tengimu. Butu koa inso ndi ondae moiko impo'oli ata tama ke beine. 45Kanatuu koa mbo'u luwuno anado mia mehawe anu mpo'ia i olomiu moiko ime'olio ka pe'etudo mbo'u anu mpo'ia i olomiu ka anu pine'anaako i witamiu. Mia atuudo moiko impe'ue ira. 46Moiko impeweengako ira gagi tia pusakado ana'uemiu lembuino ka dompe'ueo; moiko impe'ata ira mpiha. Sine a luwuno pepaekompomiu, luwuno to Isaraeli si mpeparenta saru tekuda a mpe'asa miamiu.

47Tewala asa mia hawe ke mia susua i olomiu mompoliomo, sekono pepaekompomiu anu mo'ia ndi onae gagi mongkokolaro ka meweengakono koroino a mia hawe ke mia susua i olomiu atuu, ke asa mia anu te'inso a mpe'etudo mia hawe, 48ka umarino ipeweengakono koroino, onae tekona itinolosi. Asa mia inso i olono luwuno pepaekompono moiko itolosio, 49ke pepaekompono amano ke ana ntama anano pepaekompono amano, ke asa mia pepaekompo lalu umpeda inso a pe'etuno, ke tewala ipoliomo, onaeno tekona tumolosio koroino. 50Meronga saru mia anu umolio, asalakono ipoweweu pedoaa mompu'u inso a nta'u ipeweengakono koroino a mia atuu hawe ta'u Yobeli. Olino i'asao koroino asalakono tinantui montonda porokono luwuno ta'u atuu menunu saru tempo ipo'ia a mia atuu gagi mia tinambo. 51Tewala porokono ta'u atuu da hadio, onaemo asa ntia olino pe'olia asalakono ipokuleo gagi tolosino koroino montonda porokono ta'u atuu. 52Tewala tedei porokono ta'u anu torea hawe ta'u Yobeli atuu, asalakono ipoweweu pedoaa saru mia atuu; montonda porokono ta'u atuu asalakono i'owahio doi tolosino koroino. 53Kanatuumo asalakono ipo'ia ndi onae gagi mia tinambo inso a nta'u hawe a nta'u. Siimo ipinarenta mia atuu saru tekuda i aromu. 54Tewala onae nahi tinolosiako kanandio pesalaano, moikoomo ilako a nta'u Yobeli, onae saru luwuno anano. 55Hangano to Isaraeli gagi ata ndi Ongkue, ondae atuu tetenaa-Ku anu Kuwawa ira mpeluarako inso i wita Masiri. Ongkuemo Ue, Ue Alamiu.”

Currently Selected:

Imama 25: XMZ

Highlight

Compare

Copy