Imama 27
27
Mo'owahi pontanga
27:1-34
1Ondae i Ue mepau ndi Musa, 2”Pepaumo a nto Isaraeli ka pauako ira: Tewala asa mia mompau pontanga ndi Ondae i Ue mongkona tinuwuno mia anu ineuako rekeno anu tinonda tempo atuu, 3ka rekeno tama inso anu tinuwuno rua pulu nta'u hawe tinuwuno nomo pulu nta'u, rekeno atuu asalakono lima pulu sikala salaka, kinati montonda sikala po'ianga mempori. 4Sine tewala mia atuu asa beine, rekeno atuu asalakono tolu pulu sikala. 5Tewala onae asa mia anu tinuwuno olima nta'u hawe rua pulu nta'u, rekeno tama atuu asalakono rua pulu sikala ka beine hopulu sikala. 6Tewala onae mia anu tinuwuno asa wula hawe olima nta'u, onaemo a ntama rekeno atuu asalakono olima sikala salaka, ka beine otolu sikala salaka. 7Tewala onae anu tinuwuno nomo pulu nta'u ke laalo, onaemo a ntama rekeno atuu asalakono hopulu ka olima sikala ka beine hopulu sikala. 8Sine, tewala mia atuu tedoa mongkokolaro ta mo'owahi rekeno atuu, asalakono mowawa mia anu pinontangaakono atuu ndi sando mpesomba, anu ta tumasereo menunu saru pompolino mia anu montanga atuu.
9Tewala anu pinontangaakono atuu pinotuwu anu moiko iwinawa gagi pesomba ndi Ondae i Ue, ka hapamokoa inso a mpinotuwu atuu anu pinesombaakono mia atuu ndi Ondae i Ue asalakono mempori. 10Siimo i'euo ka tumobosio anu moiko saru anu mosa'o ke anu mosa'o saru anu moiko. Sine, tewala ta tubosio asa pinotuwu saru pinotuwu susua, ka moiko pinotuwu atuu maupo euno asalakono mempori. 11Tewala asa inso i olono pinotuwu mokoburu anu nahi moiko ipinesombaako gagi pesomba ndi Ondae i Ue, pinotuwu atuu asalakono winawa i arono sando mpesomba, 12ka sando mpesomba asalakono pakosio rekeno pinotuwu atuu ba moiko ke mosa'o. Kana pontasereno sando mpesomba kanandiomo gagino. 13Tewala mia atuu behe tumolosio mbo'u, asalakono itiangio asa ntia olima a rekeno atuu.
14Tewala asa mia mompokomempori rahano gagi pesomba mempori ndi Ondae i Ue, asalakono sando mpesomba pakosio rekeno raha atuu ba moiko ke mosa'o. Kana rekeno anu pinakosino sando mpesomba, kanandiomo anu asalakono inini moroso. 15Tewala mia anu mompokomempori atuu behe tumolosio rahano, asalakono itiangio olino asa ntia olima hadiono inso a doi rekeno ka raha atuu gagi wali onae me'ueo.
16Tewala asa mia mompokomempori asa ntia inso a lereno tia-Do i Ue, asalakono rekeno menunu saru porawoano, asa homeri inii jelai rinawo me'oli lima pulu sikala salaka. 17Tewala ipokomemporio lereno mompu'u inso a nta'u Yobeli, asalakono rekeno inini moroso. 18Sine tewala onae mompokomempori lereno umarino ta'u Yobeli, sando mpesomba asalakono dumoaakono mia atuu olino menunu saru luwuno ta'u anu da torea hawe ta'u Yobeli, ka olino atuu asalakono pinokura inso a rekeno. 19Tewala mia anu mokomemporio mente ntu'u ineheno tumolosio lere atuu, onae asalakono tumiangio olino asa ntia olima hadiono inso a doi rekeno ka lere atuu kongko ipe'ueo. 20Sine tewala nahi tolosio lere atuu, ka i'asaomo a mia susua, manasa nahi pokotolosio mbo'u. 21I tempono lere atuu tepotola a nta'u Yobeli, lere atuu asalakono mempori tia-Do i Ue, mengkena kana lere anu pinesusua tia-Do i Ue. Sando mpesombamo anu ta me'ueo.
22Tewala ipokomemporio tia-Do i Ue lere anu umariomo i'olio, anu nahi tewinso lere pine'ueno i ndi'ipua, 23asalakono sando mpesomba dumoaakono olino hawe a nta'u Yobeli ka mia atuu asalakono mesombaakono rekeno atuu ia oleo koa atuu gagi pesomba mempori ndi Ondae i Ue. 24A nta'u Yobeli lere atuu asalakono pinokule a mia umasao, a mia anu amba-ambano me'ueo wita atuu.
25Luwuno rekeno asalakono montonda sikala po'ianga mempori, anu mobeano rua pulu gera. 26Sine ana amba-ambano inso i olono pinotuwu, anu gagi ana amba-ambano gagi tia-Do i Ue, nahi moiko ipokomemporio maupo isemamo koa; moiko atuu asa sapi maupo asa bembe ke bimba, tia-Do i Ue atuu. 27Tewala ana amba-ambano atuu inso i olono pinotuwu anu mokoburu, asalakono domentolosio mia montonda rekeno saru metiangi asa ntia olimano. Tewala nahi tinolosi, asalakono inasa montonda rekeno.
28 #
Pod. 18:14
Sine, maupo hapa inso a luwuno pine'ueno asa mia anu umariomo pinesusua tia-Do i Ue, moiko mia, pinotuwu, maupo lere pine'ueno, si inasa ke tinolosi. Luwuno anu pinesusua onaemo tedoa mempori tia-Do i Ue. 29Sompo mia anu pinesusua ta pinokotampula inso i olodo mia, siimo itinolosi, onae asalakono hinuku mate.
30 #
Pod. 18:21; Win. 14:22-29 Kanatuu koa mbo'u luwuno pesomba tia hopulu inso a wita, moiko inso a wuano inii a wita maupo inso a wuano keu, onaemo Ondae i Ue me'ueo; Onaemo pesomba mempori tia-Do i Ue. 31Tewala aasa mia behe montolosi asa ntia inso a mpesomba tia hopuluno atuu, onae asalakono tumiangio asa ntia olimano. 32Mongkona pesomba tia hopulu inso a nsapi ke asa bawaa bembe bimba, onaemo sompo pinotuwu kohopulu inso a luwuno anu telalo itotono tukono puu pompakambi asalakono ta gagi pesomba mempori ndi Ondae i Ue. 33Siimo ibinikio isua anu moiko ke anu mosa'o, ka siimo itinobosi. Tewala mansa domentobosio mia, ka moiko pinotuwu atuu maupo euno, asalakono mempori ka nahi moiko itinolosi.”
34Onaemo luwuno parenta anu pinohawe-Do i Ue ndi Musa i torukuno Sinai tiado to Isaraeli.
Currently Selected:
Imama 27: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
