Winali 5

Songka Hopulu

5:1-22

1 # Pel. 20:1-17 I Musa moboi ira luwu to Isaraeli mpepumpu ka ipotaeako ira, ”Imerongeomo, hei to Isaraeli, pompakosi ka atora anu kupohaweakomiu a oleo andio,

kai mpepaguruakono ka mpetenunu meweweuo. 2Ondae i Ue, Ue Alato Dowutuomo pedandia saru ontae i Torukuno Hore. 3Komba saru ondae uempu'uto Dowutuo i Ue pedandia atuu, sine saru ontae, ontae anu mekongko i ndi'ai a oleo andio, ontae luwuto anu da mentuwu. 4Ondae i Ue mepau saru omiu tepo'aro rupa i torukuno inso a ntonga-tongano api. 5Kanandiomo i tempo atuu mentade aku i olono Ondae i Ue ka omiu ka mompauakomiu pau-Do i Ue, hangano imedoitoakono api ka omiu nahi mpewuatako a ntorukuno. Mepau Ira:

6’Ongkuemo Ue, Ue Alamiu anu wawa komiu mpeluarako inso i wita Masiri, inso a mpo'ianga tepe'ataa.

7Si hina ndi omiu ue ala susua i aro-Ku.

8 # Ima. 26:1; Win. 4:15-18; 27:15 Si mpoweweu tinaha tiamiu maupo kana hapa anu kongko i langi i wawono, ke anu kongko i tolino i totono, ke anu kongko a laro uwoi i totono tolino. 9#Pel. 34:6-7; Pod. 14:18; Win. 7:9-10Si mpenggolontu mpelangkaio ke mpesomba ndi onae, hangano Ongkue Ue, Ue Alamiu, onaemo Ue Ala anu monsiri, anu mombalo salano ama a luwuno anano hawe a inuleno ko'otolu ka ko'opaa inso a luwuno mia anu umo'aliaaKune. 10Sine, Aku mopokitao pompehohawa pokongkomi a sowu-sowuno mia, ndi ondae anu mehohawa Aku ka me'ini a luwuno parenta-Ku.

11 # Ima. 19:12 Si pauo nee-Do i Ue, Ue Alamiu, nahi pototono, hangano Ondae i Ue Ira mokonsalao mia anu nahi pototono pauo nee-Do.

12 # Pel. 31:12-15; 35:2; Ima. 23:3 Pekakaakono ka pokomemporio oleo Saba, kana anu Doparentaa komiu i Ue, Ue Alamiu. 13Onoo oleo tehineno komiu mpo'angga ka meweweuo luwuno anggaamiu. 14Sine oleo ko'opitu, onaemo oleo Saba-Do i Ue, Ue Alamiu. Si mpoweweu anggaa hapamo koa, omiu, anamiu tama ke beine, atamiu tama ke beine, sapimiu ke kalidemiu, luwuno pinotuwumiu, ke maupo mia hawe i laro kotamiu, ka dompenaa-naa atamiu tama ka beine kana omiu mbo'u. 15Asalakono impewowoloo nine omiu i ndi'ipua ata koa mbo'u i wita Masiri ka Dowawa komiu i Ue, Ue Alamiu mpeluarako inso i ra'ai saru kae moroso ka tokia tetande. Onaemo pu'uno, Ondae iUe, Ue Alamiu parenta komiu mpelangkaio oleo Saba.

16 # Win. 27:16; Mat. 15:4; Mrk. 7:10; Eps. 6:2-3 # Mat. 19:18-19; Mrk. 10:19; Luk. 18:20 Pelangkai ira amamu ka inemu, kana anu Doparentaa komiu i Ue, Ue Alamiu, ka imelai tinuwumiu ka moiko tumuwumiu i wita anu Doweeakomiu i Ue, Ue Alamiu.

17 # Pel. 9:6; Mat. 5:21 #Rom. 13:9; Yak. 2:11Si pompepate.

18 # Ima. 20:10; Mat. 5:27 Si ponsosabo.

19 # Rom. 13:9 Si ponako.

20 # Pel. 23:1 Si pesakosii a mpe'asa miamu gagi sakosii megaupi.

21 # Rom. 7:7; 13:9 Si monsisiriakono kombiano pe'asa miamu. Si monsisiriakono rahano ke lereno, atano tama ke beine, sapino ke kalideno, ke maupo hapa anuno pe'asa miamu.’

22 # Ibr. 12:18-19 # Pel. 20:18-21 Pau atuumo anu pinau-Do i Ue saru pau meroku i torukuno a luwuno bawaamiu, inso a ntonga-tongano api, seru ka wongi-wongia. Nahi Dotiangiakono maupo hapa mbo'u. Ka Do'amba burio a orua watu buriano songka ka Dopeweengakono ndi ongkue.”

Ondae i Ue mepau molalo i Musa

5:23-33

23Tempono imerongeo pau atuu inso i tonga-tongano wongi mpusu, kontongaano torukuno atuu melanga, omiu ka luwuno petewawa sukumiu ka mia memota'umiu me'umpedaakune.

24Mpotae komiu, ”Menteeano Ondae i Ue, Ue Alato, Dopopokitaaomo ndi ontae maramba ka langkaino pabawa-Do, ka suara-Do tomerongeomo inso i tonga-tongano api. A oleo andio kimengkitaomo, nine Ondae Ue Ala mepau saru mia ka mia atuu kongko tuwu. 25Ka i'amba kanandio-andio, tembio ka kami memate? Hangano api anu langkai andio ta mokomo'ai kami. Tewala kimerongeo tehine mbo'u suara-Do i Ue, Ue Alato, kami memate. 26Hangano anu hinao penaano isuake anu rumongeomo suara-Do Ue Ala anu tuwu, anu mepau inso i tonga-tongano api, kana omami andio ka kongko tuwu? 27Kanandio omue, perangkuhimo ka rongeomo luwuno anu pinau-Do i Ue, Ue Alato. Omuemo koa anu mohaweo ndi omami luwuno anu pinau-Do i Ue, Ue Alato ndi omue, manasa kami merongeo ka meweweuo.”

28Mansa-Do rumongeo i Ue pinaumiu atuu, kontongaamiu mempauo ndi ongkue, mepau Iramo i Ue ndi ongkue, ”Kurongeomo paudo tongku andio anu pinaudo ndi omue. Luwuno anu pinaudo atuu moiko. 29Po'ineeomo aroado kai kanandio mpiha: doito ndi Ongkue ka mpe'ini a luwuno parenta-Ku, ka imoiko tuwudo ka inuledo anu nahina tampulaano! 30Lakomo, pauako iramo, ’Impekulemo a ngkemamiu.’ 31Sine omue, pentademo i ndi'ai saru Ongkue. Aku pauakomu luwuno parenta, onaemo pompakosi ka atora anu asalakono kau paguruako ira, ka domeweweuo i wita anu Kuweeako ira ka dompe'ueo.”

32Gagi, Impetenunumo meweweuo luwuno atuu, kana anu Doparentaa komiu i Ue, Ue Alamiu. Si mepansia i koana ke i manggali. 33Luwuno sala anu Doparentaa komiu i Ue, Ue Alamiu, asalakono imentondao, ka imentuwu ka moiko tumuwumiu saru melai tinuwumiu i wita anu komiu mpetorokio.

Currently Selected:

Winali 5: XMZ

Highlight

Compare

Copy