Winali 4

Patudu ka dompekariao songka-Do Ue Ala

4:1-40

1”Kanandio-andio, hei to Isaraeli, imerongeomo pompakosi ka atora anu kupaguruakomiu kai wineweu, kai mentuwu ka kai mpewinso saru mpetorokio wita anu Doweeakomiu i Ue, Ue Alado uempu'umiu.

2 # Meng. 22:18-19 Si mentiangio hapa anu kuparentaa komiu ka si mengkurangio, tendeano impe'inimo a luwuno parenta-Do i Ue, Ue Alamiu, anu kupohaweakomiu.

3 # Pod. 25:1-9 Ukitaakonomo matamu hapa anu wineweu-Do i Ue a Baala-Peori. Hangano, luwuno mia anu tumondao Baala-Peori umariomo Doropu ira i Ue, Ue Alamiu inso i tonga-tongamiu, 4sekono omiu anu mpe'ini ndi Ondae i Ue, Ue Alamiu da mentuwu a oleo andio.

5Impewowoloomo, kupaguruakomiumo pompakosi ka atora, kana anu Doparentaakune i Ue, Ue Alaku, kai meweweuo kanandio i wita, anu komiu mpewinsokio kai mpetorokio. 6Impetenunumo meweweuo atuu, hangano onaemo atuu anu ta gagi ponto'orimiu ka mpopewowolo a pongkitado luwuno tongku. Tewala rumongeo luwuno pompakosi andio ira mpotae, ”Lano tongku anu langkai andio, ondaemo bawaa anu mponto'orimiu ka mpopewowolo” 7Hangano, tongku langkai isuake anu hinao ue alano anu kanandio umpeda ndi onae kana Ondae i Ue, Ue Alato, sompo tempo tompebooli ndi Ondae? 8Tongku langkai isuake anu hinao pompakosi ka atora moleo kanandio kana luwuno songka andio, anu kupohaweakomiu oleo andio?

9Sine impetangkoromo ka impompe'inandai mpiha, kasi mengkolupeo luwuakoano anu kinitano matamiu atuu, ka kasi tetadi luwuno atuu inso a mpinewowolomiu asa ntinuwumiu. Pauako iramo luwuno atuu a anamiu ka ana uemiu. 10Oleo atuu mpentade komiu i aro-Do i Ue, Ue Alamiu i Torukuno Hore, ka Ondae i Ue mepau ndi ongkue, ”Tena iramo tongku atuu mpepumpu ndi Ongkue. Aku moporongeako ira luwuno pau-Ku, ranta ka domedoito ndi Ongkue asa ntinuwudo i wawontolino ka paguruako ira anado kanandio.” 11#Pel. 19:16-18; Ibr. 12:18-19Omiu mbo'u mperangkuhako ka mpentade a mpu'uno torukuno atuu, kontongaano torukuno atuu melanga hawe a mpuheno langi a laro wongi mpusu, seru, ka wongi-wongiano. 12Ka Do'amba i Ue mepau ndi ongkue inso a ntonga-tongano api. Suara anu mepau imerongeo, sine nahina rupa anu kinitamiu; butu hinao suara. 13#Pel. 31:18Dopauakomiu pedandia anu Doparentaa komiu kai wineweu, kana Songka Hopulu, ka Doburio a orua watu buriano songka. 14#Pel. 21:1I tempo atuu Doparenta aku i Ue ka kupaguruakomiu pompakosi ka atora, kai meweweuo i wita ba isua imelako kai mpetorokio.

15Nahi mpokita hapamokoa i oleo Dopepau i Ue ndi omiu i Torukuno Hore inso a ntonga-tongano api. Onaemo pu'uno, imedagaio ntu'u koroimiu, 16#Pel. 20:4; Ima. 26:1; Win. 5:8; 27:15kasi mpogau mokoburu saru mpoweweu tinaha anu kana lahumoa hapamo koa: ke merupa tama ke beine; 17#Rom. 1:23tadeno kana kondehora anu i tolino ke manu-manu mepani anu menee i laro meene. 18Tadeno kana kondehora anu melele i wawontolino ke bou anu mo'ia a laro uwoi i totono tolino. 19Tewala mengkitako mbo'u i langi, kumitao mata'oleo, wula ka anano wula, luwuno sorodadu i langi, si ntepopandei kai mpenggolontu mpelangkaio ka impesomba a luwuno atuu. Tendeano Ondae i Ue, Ue Alamiu meweengakono luwuno tongku i wawontolino gagi tiado. 20#Pel. 19:5; Win. 7:6; 14:2; 26:18; Tit. 2:14; 1Pet. 2:9Sine, Do'ala komiumo i Ue ka imewinawa mpeluarako inso i wita Masiri, inso a awu pompokolonoa labu, kai megagi bawaa-Do, kana anu gagi kanandio-andio.

21 # Pod. 20:12 Ka Do'amba i Ue gagi tekuda ndi ongkue hangano omiu ka mesumpa nine nahi aku sumakio Koro Yarade ka nahi aku mewinso a wita anu moiko anu Doweeakomiu i Ue, Ue Alamiu, gagi pusakamiu. 22Mentee, aku mate i wita andio ka nahi aku sumakio Koro Yarade, sine komiu mensakio ka mpetorokio wita anu moiko atuu. 23Impope'inandaimo, kasi mengkolupeo pedandia-Do iUe, Ue Alamiu anu wineweu-Do saru omiu, ka impoweweu tinaha kana hapamo koa anu inonto-Do i Ue, Ue Alamiu. 24#Ibr. 12:29Hangano, Ondae i Ue, Ue Alamiu, onaemo api anu mompokomo'ai, Ondae Ue Ala anu monsiri.

25Tewala mpe'ana ue komiu ka gagi mota'u i wita atuu, ka impogau mokoburu mpoweweu tinaha kana hapamo koa ka mpoweweu hapa anu mosa'o a pongkita-Do i Ue, Ue Alamiu, komiu mokontekuda Ira. 26Onaemo aku moboio langi ka tolino gagi sakosii ndi omiu a oleo andio nine manasaomo komiu ronga memoliu inso a wita anu ta pinentoroki miu umari mensakio Koro Yarade. Nahi ta tehine imentuwu i ra'ai, sine manasaomo komiu meropu. 27#Win. 28:36Ondae i Ue Ira tumia-tia komiu i olodo luwuno tongku, ka butu tedei komiu impo'ia i olodo luwuno tongku, ba isua Doliahako komiu i Ue. 28I ra'ai komiu mpesomba a luwuno ue ala wineweuno kaeno mia, inso a ngkeu ka watu, anu nahi pokompongkita ke moronge, nahi pokompongkaa ke mowoo. 29#Yer. 29:13Sine maupo i ra'ai komiu umungke Ira i Ue, Ue Alamiu ka komiu humawe Ira, polo ka ime'ungke Ira tompaano aroamiu ka tompaano sumangamiu.

30Tewala lembuino omiu a laro masukaraa ka luwuno anu andio umalu komiu, onae kai mpepokule ndi Ondae i Ue, Ue Alamiu, ka mperorongeakono suara-Do. 31Hangano Ondae i Ue, Ue Alamiu, Ondaemo Ue Ala puu Pompehohawa. Nahi Ira binta komiuke rumopu komiu; Nahi Ira kumolupeo pedandia anu pinau-Do saru sumpa ndi ondae uempu'umiu.

32Kanandio-andio impo'arahakomo mpesikeno mongkona tuwua nse'elu, anu hina se'eluno omiu, mompu'u Dopokogagio Ue Ala mia i wawontolino. Pesikenoakono inso i tompano langi ka hawe i tompano langi: Nde horio gagike mongkona anu langkai kanandio, horio terongeke aasa kanatuu? 33Horiokoake aasa tongku moronge suarano ue ala anu mepau inso a ntonga-tongano api, kana anu rinongemiu ka kongko tuwu? 34Horiokoake aasa ue ala mo'arahako aiwa ta mo'ala tiano aasa tongku inso i tonga-tongano tongku anu susua a mperupa-rupa po'arahako, petondoni, wineweu kinohali-haliako, ka peteaa, ka kae anu moroso ka tokia tetande, saru luwuno mongkokongiria langkai, kana anu wineweu-Do i Ue, Ue Alamiu ndi omiu i wita Masiri, i arono matamiu? 35#Mrk. 12:32Luwuno atuu pinopokita ndi omiu kai mento'orio nine Ondaemo i Ue, Ue Ala, nahina anu susua sangkadio Ondae. 36Inso i langi Dopoporongeo pau-Do ndi omiu anu paguru komiu; i tolino Dopopokitao ndi omiu api-Do anu langkai, ka pinau-Do imerongeo inso a ntonga-tongano api. 37Hangano Dopehohawa ira uempu'umiu ka Dobinikio inuledo, saru roso-Do anu langkai Ondae-Do wawa komiu mpeluarako inso i wita Masiri. 38Ira sumaario inso i aromiu luwuno tongku anu lalu langkai ka moroso sekono omiu ka Dowawa komiu mpewinso a witado ka meweengakono ndi omiu gagi pusakamiu, kana anu gagi kanandio-andio. 39Onaemo pu'uno imento'oriomo a oleo andio ka impekokoongakono, nine Ondaemo i Ue, Ue Ala anu i langi i wawono ka i tolino i totono, nahina anu susua. 40Impe'inimo a pompakosi ka parenta-Do anu kupohaweakomiu a oleo andio, kai moiko tumuwumiu ka inulemiu lembuino, ka kai melai tinuwumiu i wita anu Doweeakomiu iUe, Ue Alamiu ranta nahina tampulaano.”

Luwuno kota pekaduduia i asatowano Yarade

4:41-43

41 # Yos. 20:8-9 Ka i'amba i Musa mesusuao otolu kota i asatowano Koro Yarade, i sabaano oleo, 42kai mia anu mompepate pe'asa miano nahi pe'inungakono ka nahi o'aliaakono se'eluno, mokompolai i ra'ai. Tewala onae molai i asa kota atuu, ta kongko tuwu. 43Luwuno kota atuu, onaemo: Beseri i pada one, i wita mantandeano, tiado to Rube; Ramoti i Gileadi tiado to Gadi. Ka Golani i Basani tiado to Manase.

Pompohawea songka Taura

4:44-49

44Ndiomo songka Taura anu pinohaweno i Musa a nto Isaraeli. 45Ndiomo pepopoto'ori, pompakosi, ka atora anu pinohaweno i Musa a nto Isaraeli, a laro pelempaado mpeluarako inso i wita Masiri, 46i asatowano Koro Yarade, i lembono tepo'aro saru Beti-Peori, i witano i Sihoni, mokoledo to Amori anu mo'ia i Hesiboni. Onae inangio i Musa ka to Isaraeli a laro pelempaado mpeluarako inso i wita Masiri. 47Dompetorokio witano ka witano i Ogo, mokole i wita Basani. Orua ira mokoledo to Amori i asatowano Koro Yarade, i sabaano oleo. 48Wita pinebawai atuu mompu'u inso i Aro'eri, i wiwi Ngkoro Mo'are Aranoni, hawe a Ntorukuno Sirioni, onaemo atuu Torukuno Heremoni, 49saru luwuno lembono i asatowano Koro Yarade, i sabaano oleo, hawe i Tahi Araba, a mpuu Torukuno Pisiga.

Currently Selected:

Winali 4: XMZ

Highlight

Compare

Copy