Winali 6

Parenta anu laluaopo

6:1-9

1Ndiomo parenta, onaemo pompakosi ka atora, anu aku paguruakomiu a parenta-Do i Ue, Ue Alamiu, kai wineweu i wita, ba isua imelako komiu mpetorokio. 2Gagi kanandio, asa ntinuwumiu, omiu ka inulemiu imedoitoako Ira i Ue, Ue Alamiu, saru mpe'ini a luwuno pompakosi ka parenta-Do anu kupohaweakomiu, ka ta melai tinuwumiu. 3Onae kai merongeomo, hei to Isaraeli! Impetenunumo meweweuo atuu, kai moiko tumuwumiu, ka kai megagi hadio ntu'u, kana anu Dodandiakomiu i Ue, Ue Alado uempu'umiu, i asa wita anu hadio ntu'u susu ka siu hoanino.

4 # Mrk. 12:29 Imerongeomo, hei to Isaraeli: Ondaemo i Ue, Ue Alato, Ondae i Ue atuu aasa! 5#Mat. 22:37; Mrk. 12:30; Luk. 10:27Pehohawa Iramo i Ue, Ue Alamu, saru tompaano aroamu ka saru tompaano sumangamu ka saru tompaano rosomu. 6#Win. 11:18-20Hapa anu kuparentaa komiu a oleo andio, asalakono impekokoongakono. 7Asalakono temararu imempaguruako ira anamiu ka impopauo tempono impentoro i rahamiu ke kontongaano a laro pelempaa, tempono impepombole ke mpewangu. 8Asalakono impetanggoakono gagi petondoni a ngkaemiu ka mempokogagio petondoni i ra'imiu. 9Asalakono imeburio a ngkaruno pewowa rahamiu ka a mpewowa langkai kotamiu.

Moiko-Do i Ue ka parenta mpetenunu

6:10-25

10 # Teg. 12:7; 26:3; 28:13 Ondae i Ue, Ue Alamiu, Ira wawa komiu mpewinso a wita anu dinandi-Do saru sumpa ndi Burahima, ndi Saki ka ndi Yako, uempu'umiu, ta pineweengako ndi omiu: wita saru luwuno kotano anu langkai ka moiko, anu nahi mewanguo. 11Luwuno raha bukeako luwuno sangka anu moiko anu komba omiu me'ihiio; luwuno sumuru anu komba omiu mengkekeo; luwuno mbo'u lere anggoro ka lere saitu anu komba omiu mempahoo. Tewala atuu gagi, ka impongkaa saru gagi mowohi, 12onaemo ka impope'inandaimo kasi mengkolupe Ira i Ue, anu wawa komiu mpeluarako inso i wita Masiri, inso a ntepe'ataa.

13 # Mat. 4:10; Luk. 4:8 Asalakono imedoitoako Ira i Ue, Ue Alamiu. Asalakono ndi Ondaemo impesomba ka asalakono impesumpa a nee-Do. 14Si mpotonda anu pinesombai susua, inso i olono anu pinesombaido luwuno tongku petengi-tengimiu, 15hangano Ondae i Ue, Ue Alamiu, Ondaemo Ue Ala anu mosiri i tonga-tongamiu. Kasi mansa tekuda-Do i Ue, Ue Alamiu haweako ndi omiu, ranta ka Doropu komiu inso i wawontolino.

16 # Pel. 17:1-7; Mat. 4:7; Luk. 4:12 Si me'ara-arahako Ira i Ue, Ue Alamiu, kana ime'ara-arahako Ira i Masa. 17Asalakono tementee ntu'u impe'ini a parenta-Do i Ue, Ue Alamiu, a mpepopoto'ori ka pompakosi anu Doparentaa komiu. 18Asalakono imeweweuo hapa anu mentee ka moiko a pongkita-Do i Ue, kai moiko tumuwumiu ka impewinsokio saru mpetorokio wita anu moiko, anu dinandi-Do i Ue saru sumpa ndi ondae uempu'umiu, 19saru sumaari ira luwuno iwalimiu inso i aromiu, kana anu pinau-Do i Ue.

20Tewala lembuino anamiu mpesikeno ndi omiu, ”Hapa pengkonaano pepopoto'ori, pompakosi, ka atora anu Doparentaa komiu i Ue, Ue Alato?” 21Asalakono imesangki ira anamiu atuu, ”Ontae i ndi'ipua atano i Pirao i wita Masiri, sine saru kae-Do anu moroso, Ondae i Ue wawa kita mpeluarako inso i wita Masiri. 22Ondae i Ue moweweu luwuno petondoni ka anu mengkinohali-haliako, anu langkai ka sumolangi ira to Masiri, i Pirao ka luwuno ihino rahano, tomengkitaakono matato. 23Sine, Dowawa kita mpeluarako inso i ra'ai, ka Dowawa kita mpewinso Ira weeakita wita anu Dodandiomo saru sumpa ndi ondae uempu'uto. 24Ondae i Ue parenta kita ka tomeweweuo luwuno pompakosi atuu ka doitoako Ira i Ue, Ue Alato, ka imoiko mpiha tumuwuto ka Dopo'inee kita tuwu, kana oleo andio. 25Kita megagi mentee, tewala mpetenunu kita meweweuo luwuno parenta atuu i aro-Do i Ue, Ue Alato, kana anu Doparentaa kita.”

Currently Selected:

Winali 6: XMZ

Highlight

Compare

Copy