KOLOSE 3
3
1 #
Pud. 110:1
Onaemo pu'uno, tewala mewinangu komiu meronga saru Ondae i Kerisituu, ime'ungkeomo mongkona anu i wawono, a mpo'ianga-Do i Kerisituu, mentoro i koana-Do Ue Ala. 2Impewowoloomo mongkona anu i wawono, komba anu i tolino. 3Hangano memate komiumo ka tuwumiu tewuni meronga saru Ondae i Kerisituu ndi Ondae Ue Ala. 4Tewala Ondae i Kerisituu, anu onaemo tuwuto, mepokomengkaa Ira te'upua, komiu koa mbo'u mpepokomengkaa meronga saru Ondae a marambaa.
Mia wo'ohu
3:5-17
5Onaemo pu'uno impepateomo a laro ngkoroimiu luwuakoano anu po'eheno wawontolino, onaemo pebelesua, mokoburua, po'eheno aroa, pinewowolo mosa'o ka medokoli mbo'u anu mengkena saru mompesombai lahumoa, 6luwuno atuu mokontekuda Ira Ue Ala [a luwuno mia mpe'ewa]. 7I ndi'upua imeweweu ira koa mbo'u mongkona atuu tempono imentuwu i larono. 8Sine kanandio-andio, imentadiomo luwuno andio, onaemo tekuda, bamburu, mosa'oa, momposebe ka pau mokoburu anu meluarako inso a wiwimiu. 9#Eps. 4:22 Siimo mbo'u imemambe gaupi, hangano imelohuomo mia laanomiu saru peleluno, 10#Teg. 1:26; Eps. 4:24 ka impokonaomo mia wo'ohu anu pinokowo'ohu mpiha ka impohawe ponto'ori anu mentee montonda gambara-Do Anu Mokogagio; 11mongkona andio nami hina mbo'u to Yunani ke to Yahudi, mia metindi ke mia nahi petindi, to Barabara ke to Sikiti, ata ke mia maradeka, sine luwuno Ondae i Kerisituu ka a luwuakoano.
12 #
Eps. 4:2
Onaemo pu'uno, kana mia bininiki-Do Ue Ala anu mempinokomempori ka pinehohawa-Do, impokonaomo pompehohawa, pe'aroa, pe'urumako, mauru ka sabara. 13#Eps. 4:32 Imemambe sabaramo, ka imemambe ampunimo tewala asa mia monaa-naa aroa a walino, mengkena kana Ondae i Ue Do'ampuni komiumo, imeweweuomo mbo'u kanatuu. 14Ka i wawono luwuno atuu: impokonaomo pompehohawa, gagi powutu anu mompo'asa ka mompokosompo. 15Po'ineeomo rodoa inso ndi Ondae i Kerisituu moparenta i laro aroamiu, hangano onaemo atuu ka imempinoboi gagi aasa koroi. Ka impontarimakasimo. 16#Eps. 5:19-20 Po'ineeomo pau-Do i Kerisituu ka ipo'ia saru luwuno kaeano i olomiu, ranta ka imemambe paguru ka mambe patuduako luwuno ponto'ori ka saru mpenaniako po'unde-unde, ka po'unde-unde ka penani rohani, impontarimakasi ndi Ondae Ue Ala i laro aroamiu. 17Ka luwuakoano anu wineweumiu molalo pau ke mpoweweu, imeweweuomo luwuno atuu a nee-Do Ue Yesu, saru mpontarimakasi hangano Ondae ndi Ondae Ue Ala, Amato.
Penggoeado luwuno mia asa nsombori
3:18–4:6
18 #
Eps. 5:22; 1Pet. 3:1 Hei luwuno beine, impetuundumo a ntamamiu, ba kana'umpe asalakono ndi Ondae i Ue.
19 #
Eps. 5:25; 1Pet. 3:7 Hei luwuno tama, impehohawao beinemiu ka si melambaha ndi onae.
20 #
Eps. 6:1
Hei nana'ote, impomperorongeako a mia mota'umiu a luwuakoano, hangano onaemo anu Dopetekosio i Ue.
21 #
Eps. 6:4
Hei luwuno ama, si mpokomahakio aroano anamiu, ka si motewe aroano.
22 #
Eps. 6:5-8
Hei luwuno ata, impetenunumo a uemiu anu i wawontolino andio a luwuakoano, si komba butu mokonsanaa ira i arodo, tendeano a moleono aroa hangano doitoako Ira i Ue. 23Hapamo koa anu wineweumiu, imeweweuomo tompaano aroamiu kana tia-Do i Ue ka komba tiano mia. 24Imento'orio, nine insomo ndi Ondae i Ue komiu mpontarima tia anu imempinakosiako gagi tambo. Ondaemo i Kerisituu pe'uea ka omiu ata-Do. 25#Win. 10:17; Eps. 6:9 Ba isema sala poweweuno, ta tumembio salano atuu, hangano Ondae i Ue nahi Dopobiniki mia.
Currently Selected:
KOLOSE 3: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
