KOLOSE 4
4
1 #
Eps. 6:9
Hei luwuno pe'uea, impoweweumo temoleo ka mentee a atamiu; impewowoloo koa, omiu mbo'u hinao uemiu i suruga.
2Imemokua koa mpekakai ka i larono atuu impetangkoro koa saru mpontarimakasi. 3Impekakaiakami koa mbo'u, ka Do'ungkahiakami Ue Ala pewowa a pompaleleamami, ranta ka kimempolio mpepau mongkona rahasia-Do i Kerisituu, anu hangano onae ka kutinorungku. 4Hangano kanandio kupolio mokomengkaao, ba kana'umpe asalakono.
5 #
Eps. 5:16
Imentuwumo ka imebukeako ponto'ori a luwuno mia i bungkuno, imempakeomo tempo anu hina. 6Po'ineeomo luwuno paumiu ka ibukeako koa mpiha pompehohawa, si motewe, ranta ka imento'orio, ba kana'umpe asalakono imesangki ira mia.
Pokotompaano ka tabea
4:7-18
7 #
Tin. 20:4; 2Tim. 4:12 #Eps. 6:21-22 Luwuno teweweuku ta koa pauakomiu i Tikiku, pepaekompoto anu pinehohawa, Tetenaa anu metenunu ka waliku mo'angga ndi Ondae i Ue. 8Tinooku tumenao ka i'aiwa ndi omiu, ka imento'orio koa teweweumami ka itareroakomiu aroamiu. 9#Plm. 10-12 Onae kutenao meronga saru i Onesimu, pepaekompoto anu metenunu ka anu pinehohawa, asa mia inso i olomiu. Ira mempauakomiu luwuakoano anu gagi i ndi'ai.
10 #
Tin. 12:12, 25; 13:13; 15:37-39; 19:29; 27:2; Plm. 24 Tabea ndi omiu inso ndi Arisatariku, pe'asa torungkuku ka inso ndi Marakusu, laki'anano i Baranaba – mongkona onae imentarimaomo pe'oliwi; tewala haweomo, imentarimaomo – 11ka inso ndi Yesu anu nineeako i Yusutusu. Butu otolu ira andio inso i olodo anu mpetindi anu gagi pe'asa mpo'anggaku tiano Poparentaa-Do Ue Ala; ondae atuu megagi iramo tareroku. 12#Kol. 1:7; Plm. 23 Tabeano i Eparasi ndi omiu; onae asa mia inso i olomiu, tetenaa-Do i Kerisituu Yesu, anu mokua wela mekakaiakomiu, ka imemoroso mpentade, gagi mia anu sompo tinuwudo ka anu mpe'ala-alao ntu'u luwuakoano anu po'ehe-Do Ue Ala. 13Hangano aku mokompesakosii mongkona onae, nine onae tedoa ipe'o'osuakomiu ka ondae anu i Laodikia ka i Hierapoli. 14#2Tim. 4:10-11; Plm. 24 Tabeano sando Lukasi anu pinehohawa hawe ndi omiu ka inso ndi Demasi.
15Impohaweo tabeamami a luwuno pepaekompo i Laodikia; ndi Nimipa mbo'u ka bawaa anu mekongko i rahado. 16Ka tewala binasaomo wunta andio i olomiu, ime'ungkeakono ka domebinasaako koa mbo'u bawaa i Laodikia ka wunta anu tiano Laodikia ka imebinasaako koa mbo'u. 17#Plm. 2 Ka impohaweakono i Arikipu: Pekokoongakono, pompekakaako anu tinarimamu ndi Ondae i Ue ka upolempao koa ntu'u tementee.
18Tabea inso ndi ongkue, i Paulu. Tabea andio kuburiakono kaeku. Impewowoloo koa ponguku. Pe'aroa kumongkomi komiu.
Currently Selected:
KOLOSE 4: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
