KOLOSE 2
2
1Hangano ineheku, ka imento'orio, ba kana'umpe mobeano kupeteahakoakomiu, ka ondae anu i Laodikia ka luwuno, anu napi domento'ori aku, 2ka itetarero aroado ka dontepo'asa a pompehohawa, ranta ka domehaweo luwuno kaeaa ka pompe'ala-ala mento'orio ntu'u ka mento'orio rahasia-Do Ue Ala, onaemo Ondae i Kerisituu, 3hangano i laro-Do tewuni luwuno arataa ponto'ori mentee ka pande. 4Mongkona andio kupauo, ka si hina anu mopo'ooakomiu pau mpo'o'ahiti. 5Hangano maupo nahi kukongko i olomiu, sine a mpenaa kuperonga-rongaakomiu ka mawongko aroaku kumita komiu te'atora tuwumiu ka morosono pompe'ala-alamiu ndi Ondae i Kerisituu.
Bukeano tumuwu ndi Ondae i Kerisituu
2:6-15
6Imentarima Iramo i Kerisituu Yesu, Ueto. Onaemo pu'uno po'ineeomo tuwumiu ka kongko mpiha ndi Ondae. 7Impehakamo ndi Ondae ka mewinangu i wawo-Do, po'ineeomo ka ikomoro-morosono pompe'ala-alamiu anu imempinaguruakomo, ka po'ineeomo aroamiu ka ibukeako pontarimakasi. 8Impetangkoromo, ka si hina anu umo'ahitiakomiu pompaguruno anu mooa ka nahi mentee montonda pompaguru mapa'api-api inule ka rupa-rupa penaa anu pabawaio wawontolino, sine komba montonda Ondae i Kerisituu. 9Hangano i laro-Domo ipo'ia montonda koroi luwuno bukeano pe'Ue Alaa, 10ka mempinobuke komiumo ndi Ondae. Ondaemo pu'uno poparenta ka anu mempabawa. 11Ndi Ondae mentinindi komiumo, komba petindi anu wineweuno mia, sine pontindi-Do i Kerisituu, onaemo pololohia koroi anu tehala, 12#Rom. 6:4 hangano mengkinaburu komiu saru Ondae a mpebahoa, ka ndi Ondae mpetonda komiu mbo'u mewinangu hangano pompe'ala-alamiu a mpo'anggano pabawa-Do Ue Ala, anu wangu Iramo inso a mpo'iangado mia mate. 13#Eps. 2:1-5 Omiu mbo'u, maupo i ndi'upua memate hangano halamiu ka hangano nahi mpetindi montonda koroi ntolino, Dopotuwu komiumo Ue Ala meronga saru Ondae, umari-Do umanpunio luwuno halato, 14#Eps. 2:15 Dopahihio wunta pasua, anu hangano luwuno pompakosino songka umewai kita ka mokodoito kita. Ka Do'oninio atuu saru mepasoakono a ngkeu pinotamba: 15Dololohi iramo anu mpeparenta ka anu mempabawa ka mokogagi ira kikitaado mia hadio a mponangi-Do ndi ondae.
Ime'ungkeomo poparentaa anu i wawono
2:16–3:4
16 #
Rom. 14:1-6
Onaemo pu'uno si mpo'inee ira mia mehuku komiu mongkona kaanga ka inua ke mongkona oleo langkai, wula wo'ohu ke oleo Saba; 17luwuno andio butu eo-eono hapa anu asalakono ta hawe, sine tadeno Ondaemo i Kerisituu. 18Si mpo'ineeo ponangimiu nahi pokogagio mia anu mo'onde-onde me'urumako ka mesomba a mala'eka, saru me'ini moroso a luwuno pongkita ka nahina pu'uno ka ipompelangka-langkaiako pinewowolono ntolino, 19#Eps. 4:16 sine nahi pe'ini moroso a Ulu, insoano asa ngkoroi, anu pinokoroso ka iwutuo hadio ia ka luwuno pesombuano wuku ka igagi aasa, montarima tuwu inso ndi Ondae Ue Ala.
20Tewala memate komiumo meronga saru Ondae i Kerisituu ka ntepotola inso a luwuno penaa i wawontolino, tembioke ka impetuundu a mperupa-rupa atora, kana da mentuwu komiu i wawontolino: 21si me'inio andio, si mpenamio atuu, si medanggio andio; 22luwuno atuu butu mongkona sangka anu masola hangano pinake ka butu montonda luwuno parenta ka pompaguruno mia. 23Luwuno atora andio, maupo tengkita buke ponto'ori a mpesomba wineweudo ondaedo, kana mpe'urumako, mebobarasaio koroi, nahina tuduno butu motendeo tuwu ntolino.
Currently Selected:
KOLOSE 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
