Tiago 3

Kuidadu didiak ho o nia ibun

1Maun-alin doben sira, imi barak hakarak hanorin sarani sira. Maibee hanoin didiak lai, tanba imi hatene katak, ema nebee hanorin sarani sira, Maromak sei tesi sira nia lia todan liu duke ema seluk.

2Ita hotu halo sala oi-oin. Ema nebee la halo sala ho nia liafuan, ema nee moris loos, i nia bele domina nia aan tomak. 3Ezemplu ida hosi kuda. Ita bele haruka kuda lao tuir ita nia hakarak, ho dada deit freiu kiik-oan iha kuda nia ibun. 4Ezemplu seluk hosi roo. Ita bele halo roo boot ida fila baa-mai tuir ita nia hakarak, ho dulas deit volanti kiik-oan ida, maski anin boot.#3:4:Iha tempu nebaa, roo la iha volanti. Ema hatuun ai kabelak hosi roo nia kotuk atu bele halo roo fila baa-mai tuir ema nia hakarak. 5Nunee mos ho ita nia ibun. Maski kiik-oan, maibee nia impaktu boot teb-tebes. Nee hanesan ahi funan kiik-oan ida bele haan hotu ai laran boot ida.#3:5:Iha versikulu 5-10, lian Gregu temi bebeik ‘nanaal’, hodi hakerek kona ba ema nia koalia. Ho lian Tetun, ita dehan ‘ibun’. Por ezemplu, ita dehan ‘ibun boot’, laos ‘nanaal boot’. 6Ita bele kompara ibun hanesan ahi. Iha ita nia isin lolon, ita nia ibun nakonu ho buat aat, nebee estraga ita nia aan. Nee hanesan ibun lori ahi infernu nian hodi sunu motuk ita nia moris tomak.

7Ema bele halo maus i domina animal fuik oi-oin, manu fuik, animal nebee dolar iha rai, ho ikan iha tasi. 8Maibee la iha ema ida mak bele domina nia ibun. Tanba ibun nee aat, hanesan veneno nebee bele oho ema.

9Ita uza ibun hodi hahii Nai Maromak, ita nia Aman. Ho ibun nee mos, ita foo malisan ba ema, maski Nai Maromak halo ema hanesan Nia Aan. 10Hosi ita nia ibun sai liafuan diak ho aat. Maun-alin sira, la bele nunee!#Jenesis 1:26 11Bee matan ida la bele foo bee moos ho bee merak. 12Ai-figeira nunka foo fali ai-oliveira nia fuan. I ai-uvas nunka foo fali ai-figeira nia fuan.#3:12:Iha versikulu nee, Tiago temi ai fuan oin tolu (figu, azeitona, ho uvas) nebee ema Israel baibain haan, hodi hatudu katak ai ida-idak sempre foo fuan tuir nia huun, la bele foo fali fuan seluk. Nunee mos, ibun nebee ita agora loke hodi hahii Nai Maromak, la bele uza fali hodi hatete aat ema. Nunee mos, bee matan meer la bele foo fali bee midar.

Matenek loloos mai hosi Maromak

13Se imi balu matenek hodi hatene dalan nebee loos, i komprende saida mak diak, saida mak aat, imi tenki moris loos i halo buat diak ho haraik aan, hodi hatudu katak matenek nee mai hosi Nai Maromak. 14Maibee se o laran moras ema seluk i buka diak deit ba o nia aan rasik, entaun la bele gaba aan dehan, “Hau ema matenek.” Foti aan hanesan nee, sala. 15Matenek hanesan nee laos hosi Maromak. Maibee nee matenek tuir mundu nian, tuir ema nebee la konhese Maromak nia Espiritu Santu, i mai hosi diabu. 16Tanba bainhira ema sei iha laran moras i buka diak deit ba nia interese privadu, nia sei halo rungu-ranga ho hahalok aat oi-oin.

17Maibee matenek nebee mai hosi Maromak mak nee: moos, lori dame, laran maus, konsidera ema seluk, laran diak, foo fuan diak, gosta ajuda ema, la haree ba ema boot ka kiik, i la finjidu. 18Toos nain nebee kuda fini, iha ikus nia hetan rezultadu diak, nunee mos ema nebee hatudu dalan ba dame, kleur-kleur sei haburas justisa.

Currently Selected:

Tiago 3: BTDT

Highlight

Copy

Compare