Tiago 4
4
Hakruuk ba Maromak
1Tanba saida mak imi istori malu bebeik, too baku malu? Tanba imi kaan buat oi-oin deit, halo imi nia laran la hakmatek. 2Buat nebee imi kaan, imi la hetan. Nunee imi laran moras malu, istori malu, baku malu, too atu oho malu.
Imi la hetan buat ida tanba imi la husu ba Nai Maromak. 3Se imi husu ba Maromak mos, imi la simu buat ida, tanba imi nia objetivu sala. Imi husu diak ba imi nia aan rasik deit.
4Hei! Imi sira nebee fila kotuk ba Maromak. Imi hanesan feen ka laen nebee la foo laran ba malu. Imi la hatene katak se imi hadomi moris tuir mundu nian, imi sai Nai Maromak nia inimigu? Nunee see deit mak hakarak halo belun no moris tuir mundu nian, sei sai Maromak nia inimigu. 5Nee mak Nai Maromak nia Liafuan hatete, “Maromak nia Espiritu nebee Nia tau iha ita nia laran, hakarak ita foo laran tomak ba Maromak deit. Se lae, Nia laran moras no hirus.” 6Maski nunee, Nai Maromak sei hatudu Nia grasa boot liu tan ba ita. Tuir Livru Sagradu hatete:
“Maromak kontra ema nebee foti aan,
maibee Nia hatudu Nia laran diak ba ema nebee haraik aan.”#Proverbiu sira 3:34
7Tanba nee, hakruuk ba Maromak. Tuba rai nafatin kontra Satanás, maka Satanás sei halai hosi imi. 8Hakbesik aan ba Nai Maromak maka Nia mos sei hakbesik aan ba imi. Imi nebee moris iha sala nia laran, halo loos ona imi nia moris. I imi nebee laran rurua, foo ona imi nia laran tomak ba Maromak. 9Imi laran susar ona baa, hodi tanis halerik tanba imi nia sala. Lalika hamnasa ona, tanis fali baa! Lalika kontenti ona, tristi fali baa. 10Imi tenki haraik aan iha Nai Maromak nia oin, maka Nia sei foti sae imi.
La bele hatete aat ema
11Maun-alin sira, la bele hatete aat ema. Se o hatete aat o nia maluk sarani ida, i foo sala bebeik ba nia, entaun o hatete aat Nai Maromak nia lei nebee haruka ita hadomi malu, hodi dehan lei nee la diak. Se o foo sala ba Nai Maromak nia lei nunee, entaun o laos ona ema nebee tuir Nia lei, maibee o foti aan hanesan fali juis hodi tesi lia ba lei nee. 12Maromak deit mak halo lei, i Nia deit mak iha direitu atu tesi ema nia lia. So Nia deit mak bele salva ema, ho foo kastigu ba ema. Maibee see mak o hodi julga ema seluk?!
La bele gaba aan
13Rona mai! Imi la bele dehan, “Ohin ka aban ami atu baa iha sidade nebaa. Ami sei hela iha nebaa tinan ida hodi kontratu manaan osan.” 14Imi la hatene saida mak atu mosu aban! Ita ema nia moris hanesan abu-abu nebee ema haree lalais deit, depois lakon tiha.#Proverbiu sira 27:1 15Tuir loos imi tenki dehan, “Se Nai Maromak hakarak, ami sei moris, maka ami sei halo ida nee ka halo ida nebaa.” 16Maibee imi gaba aan hodi hanoin katak planu hotu-hotu iha imi nia liman laran. Foti aan hanesan nee sala.
17Hanoin didiak! Se ita hatene buat diak nebee ita tenki halo, maibee ita la halo, nee sala ona.
Currently Selected:
Tiago 4: BTDT
Highlight
Copy
Compare
Share
Want to have your highlights saved across all your devices? Sign up or sign in
© 2024 Wycliffe Timor-Leste.
