Tiago 2
2
Imi tenki konsidera ema hotu hanesan
1Maun-alin sira, imi dehan imi fiar ba Nai Jesus Kristu, ita nia Nai nebee boot teb-tebes. Maibee imi balu halo fali diskriminasaun ba ema. Nee la bele! 2Por ezemplu, se ema nain rua tama ba iha imi nia fatin enkontru, ida riku hatais ropa folin karun ho kadeli osan mean barak iha liman, ida kiak hatais hena bosan no foer. 3I imi fadigadu hodi simu ema riku nee, hodi dehan, “Senhor, favor mai tuur iha oin.” Maibee ba ida kiak nee, imi dehan, “O hamriik iha kotuk nebaa! Se lae, tuur deit iha rai!” 4Nunee imi hili ema balu hanesan ema diak, i balu hanesan ema aat. Hahalok ida nee la loos. Nee hanesan juis nebee tesi lia la loos ho hanoin nebee aat.
5Maun-alin doben sira, rona mai. Nai Maromak hili ona ema kiak tuir mundu nia haree, atu sai riku iha fiar. Maromak nudar Liurai hili ona sira hodi sai Maromak nia reinu nebee Nia promete ona atu foo ba Nia povu nebee hadomi Nia. 6Maibee imi la respeita ema kiak, maski sira la halo buat aat ida ba imi. Afinal ema riku sira mak hanehan imi. Sira mak sempre buka lia ho imi, hodi obriga imi baa hataan iha tribunal. 7Sira mak hatete aat imi nia Nai Jesus nia naran nebee boot. Nusaa mak imi hakarak buka oin ho sira?
8Imi halo buat loos bainhira imi halo tuir Maromak nia Lei nebee hakerek iha Livru Sagradu nebee dehan, “O tenki hadomi ema seluk, hanesan o hadomi o nia aan rasik.”#Levitiku 19:18 9Maibee se imi konsidera liu ema balu i ema seluk lae, imi halo sala, i kontra ona Nai Maromak nia Lei. 10Maski imi halo tuir Maromak nia lei hotu, maibee se imi kontra lei ida deit, nee hanesan imi kontra lei hotu. 11Por ezemplu, Maromak foo ona lei dehan, “La bele iha relasaun seksual ho ema nebee laos o nia feen ka o nia laen.” Nia mos foo lei seluk dehan, “La bele oho ema.” Nunee, se imi la halo sala ho ema nia kaben, maibee imi oho ema, imi kontra ona Maromak nia lei hotu.#Ezodu 20:13,14; Deuteronomio 5:17,18
12Nee duni, molok imi atu koalia, ka atu halo buat ruma, imi tenki hanoin uluk lai: “Hau nia liafuan ka hahalok nee tuir Maromak nia lei atu hadomi ema seluk ka lae?” Tanba Maromak sei tesi imi nia lia tuir lei, nebee liberta imi. 13Tan bainhira Maromak tesi ita ema nia lia, Nia sei la hatudu laran diak ba ita, se ita la hatudu laran diak ba ema seluk. Maibee se ita hatudu laran diak ba ema seluk, Maromak mos sei hatudu laran diak mai ita.
Fiar nebee la hatudu ho hahalok diak, la iha folin
14Maun-alin sira, se imi fiar ba Maromak, maibee imi la hatudu imi nia fiar ho hahalok diak, fiar hanesan nee la iha folin i la salva imi. 15Por ezemplu, se iha maluk sarani ruma presiza ropa ka hahaan, 16maibee imi la foo, i imi dehan, “Haree dalan! Maromak foo bensaun ba o! Hatais faru manas para anin la bele tama! I haan halo bosu baa!” I imi la foo ba nia buat nebee nia presiza, liafuan nee la iha folin.
17Nunee mos ho fiar. Se ita nia fiar la hatudu hahalok diak, fiar hanesan nee mate ona.
18Maibee ema ruma bele kontra dehan, “Iha ema balu fiar deit, i balu hatudu hahalok diak.” Hau hataan, “Se o la hatudu hahalok diak, hau la bele dehan o fiar ba Maromak. Maibee o bele haree hau nia fiar, liu hosi hau nia hahalok.” 19O fiar Nai Maromak mesak ida deit, la iha tan seluk. Nee loos! Maibee diabu sira mos fiar nunee, nee mak sira tauk no nakdedar.
20Beik-teen! Se o fiar ba Maromak maibee la hatudu hahalok diak, fiar nee mate ona. Too bainhira loos mak o rekonhese ida nee?!
21Hanoin ita nia avoo Abraão. Nia halo tuir Nai Maromak nia orden, hodi lori nia oan Isac baa tau iha fatin sakrifisiu atu entrega ba Maromak. Tanba nee mak Nai Maromak deklara dehan, “Abraão ema nebee moris loos ona iha Hau nia futar oin.”#Jenesis 22:1-14 22Nunee ita hatene katak Abraão nia fiar ba Maromak mak halo nia kumpri Maromak nia orden. I nia hahalok nee mak halo nia fiar sai kompletu. 23Nee tuir loloos Nai Maromak nia Liafuan nebee hakerek dehan, “Abraão fiar ba Maromak i nunee Maromak deklara ona nia nudar ema nebee moris loos” I ema mos dehan, “Abraão nee Maromak nia belun.”#Jenesis 15:6; 2 Kronikas 20:7; Isaías 41:8
24Agora imi hatene ona katak, Maromak deklara ema moris loos, laos tanba nia fiar deit ba Maromak, maibee nia tenki hatudu mos hahalok diak.
25Haree ezemplu ida tan hosi feto luroon ida naran Rahab. Bainhira Rahab subar espiaun sira hosi Israel, depois haruka sira halai sai liu hosi dalan seluk, para ema la bele oho sira. Maromak deklara nia nudar feto nebee moris loos ona, tanba nia hahalok diak nee.#Josué 2:1-21
26Isin lolon nebee la iha iis, mate. Hanesan nee mos, fiar nebee la hatudu ho hahalok diak, mate.
Currently Selected:
Tiago 2: BTDT
Highlight
Copy
Compare
Share
Want to have your highlights saved across all your devices? Sign up or sign in
© 2024 Wycliffe Timor-Leste.
