Penameyaya ei 9
9
1Go au pumare ande supupa eindiolome nipuna bu kenange liia. Go au pumare kumba danga menda suna lopa ei andawa. Go kumba dangamere monde koae remonu pirinaya kuda punyae nekana ki siamba aripa. 2Go kumba dangame monde neka para lomba dinare londo ora andaai opalumba. Go londore ora andaa londo repana rala rala ae para ipula londo. Gonde londomere ora su rambuaoma aripa eimiyalore naare pirape rupa anana pa. 3Ande londo para pirumare komboronu ora andapu suna epa. Go komboronu nimuna purinuri kaalainuna puri manda. 4Godeme go komboronu para gupi la alaya. Kanga reke leale repana pange nomanu menda ora na-waralepape laya. Nimumi mara pala peme alenuri ande Godena pare au nimuna wenona na-ridimi wenaali komea mara palepape la alaya. 5Monde komboronumi go wenaali diapape pi na-laya. Go au na-piri nimu rendaa kapona sumba mendane ki pu ma-alepape laya. Go rendaare ande kaalainumi poalemenda naleme rendaa manda. 6Go sumbanu rupara mo wenaalimi rendaa nalo paliala pulua ara nimu komea gipiale komamona la da pemepare komala ei ambe nimu repara na-popelea.
7Monde komboronuri ande osi menanuyandana polameyanda lele puaeme rupa manda lele puma arimiya. Nimuna kalunare ande kini alinumi maraoaeme rangunanu mararimiyapare monde rangunanuri golome wari einu. Nimuna lee angaanuri alinuna lee angaame andameya. 8Nimuna iriri wenanuna irimi andaya. Gupuma nimuna angaare laioni yanana angaame andaya. 9Nimuna akonare aionimi wari nono pi kanganu ma-ralama ralama pameya. Monde nimuna popanu e ma-larimipare ande osi menanumi yandana popolameyanda yoloaeme kareme e loaya rupa manda e lame. 10Nimuna apunumiri ali aweleandare kaalainumi ali poalanda pimi rupa rendaa manda pilia. Mo wenaali marapae auri nimuna apunumi go au pilimi. Go au pi auri sumba mendane kipuna rupara go au pilimi. 11Mo nimu andere-aya auri kini ali mendame pea. Go aliri ande koae remonu pimi para kuda punyae andasu andere pia eindiolo. Go ali nipuna bi mo Iburu anda angelemere Abadoni leme. Mo Giriki angelemere gore Apolioni leme. Go leme eiri gore olemole ma-koyao-aya ali loa leme.
12Ande koaeyanda ririna eiri go perelea. Go peapare koaeyanda laapo ora epelepe.
13Gupuma ande mendane ki pereya mendana komea eindiolome bu kenange liia ei pangawa. Ande Godena lee wilina aya alinau puaeme pereaya lena kuni malapuna kuni mendaneyame ara angele lame ei pangawa. 14Mo angele la alimiri monde mendane ki pereya komea eindiolo para gupi la. Monde Yuparadisi ipana go andibaya eindiolo malapu pua kepe rapa la ei pangawa. 15Go ei pangomare ande eindiolo alinumi ande malapu eindiolonu kepe raparimi. Ambaisena Godeme go eindolo malapu nimuna pupudengi ne ei sese pumapare ambi gosi go epola pea kuni gipa pange sumba pange naare pange aua epa. Go naarere go repo rekele puma rekelepena menda para aeme wenaali lu pereyainya siaya naare. 16Go yanda pape alinuri ora kumburape. Yarepeape pange manda na-pea. Neme 200 milion alinu pangawa. 17Nina upaame mo osi menanu pange mo ma-pamuaeme alinuri gupi repaa andawa. Mo osi menanu ma-pamuaeme alinuna ako mandaa mararimiya kangare repana lenga leale wepuma puaya pange yaana do pake meaya pange ambu aki paya. Monde osi menana kaluri laioni menana kalumi andaya. Gupuma monde osi menana angaa parare repana lenga pange londo pange ande salopa lemende danga opopa epaya. #9:17 Salopare mungupi kana menda ora riripu waru pi kanana bi. Ande repana roaya kanana epea ale.
18Go suri repo rekele puma rekelepena menda para aeme wenaali ande osi menana angaa para epaya repana lengame pange londome pange salopa lee dangame lu ma-komarimi. 19Akepeare mo osi menanu nimuna puriri nimuna apu para pange nimuna kalu para meme. Nimuna apunare kerona kalumi andaya. Go einumiri wenaali lu ma-koyao-aya.
20Go repo aleme na-koyae repaare monde nimuna kimi wari alenu repara yainya pa pa eiri puameya. Koae remonu repara pange golo pange silipa pange boronisi pange kana pange repaname wari alenu repara yainya pame. Go yainya puaeme alenuri pora na-pu pange olemole na-ando pange angele na-pangeme alenuyapare golere pa yainya pa eiri puame. 21Nimumi ali pa liiari polame pange romo neambu pa eiri polame pange wenaali lapo pake nari polame pange olemolenu pake pa nari pu aluameyanda nimuna pu rombanu na-ropo pame.
Currently Selected:
Penameyaya ei 9: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
