Penameyaya ei 19
19
1Go einu pangoma perelenalomare wenaali andapumi poya ma-lae nono pi poya so epeni nane pangawa. Nimumi Godena bi minyasiarimi. Gupuma lalore Godere ora puri waru palea pange nipuri naana rambami lame. 2Nipumi olemole raayo ora rupa rali puaya. Nipumi ande ali pake noae wena rendaa ala. Go wena nipumi pa koae aumi wenaali raayo ma-koyaripa. Godeme nipu rendaa ala. Akepeare nipumi Godena pupudengi nao-aeme repaa liianda. 3Nimumi wala andapu gupi lame. Godena bi minyasiaminya. Ande anda ralo ara ma-puada londore ora na-peredea. 4Go au lame dina ande ali ria komea pereyoma malapu kalu alinumi pange pa piri ale malapu alenumi panda puma Gode nipuna seana pirina repara yainya pame. Mo wenaalimi lalo arare Orae, Godena bi minyasiaminya lame.
Ande Sipisipi menasi wena mealo ara pambelea enda
5Gupuma ande Godena piru ae sea naneyame ara mendame gupi la. Naana Godena bi minyasiaminya lame. Nimi Godena pupudengi nao-aeme wenaali pange amo pange narali wenaali raayome pange Gode paalame komeme wenaali raayome nipuna bi minyasiainya. 6Gupuma wala wenaali andapumi le nono pi poya andaai pangawa. Nimumi ma-larimi poyare ipa daau rombalo ara loaya poya pange rurupi lialo ara loaya poya manda larimi. Mo poya lado ara gupi lame. Godena bi minyasiaminya lame. Akepeare Reali Gode naana puri waru pale Godere Kini pia. 7Naame raname ora waru komaminya. Nipu ora andaa ali ayanda nipuna bi minyasiaminya. Akepeare ande Sipisipi mename nipuna wena mula pea naare ipula. Gupuma nipuna wename pange lele puma pirande. 8Go mula pea wenare ora yaakopu rumbea aka maraya. Go yaakopu rumbea akare ande Godena wenaalimi ora epe aunu peme einu.
9Go ei perelenaloma ande eindiolome ni para gupi la. Go angele wape pa la. Ande Sipisipi mename enda pambala para ipulupa loma angele rapae wenaalimi raname waru komame. Ande eindiolo alimi gupi la. Go angelere Gode para ipula angele la.
10Gonde ei pangoma neme nipuna ange rolo para lopawa. Go au pi auri nipu repara panda punyaoma yainya pulameya pawa. Go pawapare gupi la. Ni repara go au na-pili. Ni pange nena amenu nimi peme rupa Godena pupudengi nao-ae ali. Nimi raayo ande Yesumi lisayande angele pa siambao-aeme. Gode komea panda punyaoma yainya pape la. Ande Yesumi walisayande ree angelemere ande poropedinu puri ala.
Kerisome ande rarane ale lu rambuaya ei
11Gupuma epeni anda pora lomba ei neme andawa. Gupuma yaakopi osi mena andawa. Mo osi mandaa piraya Aliri ora aunu pange ora rendepona au puaya Ali loaeme. Nipumi wenaali rali pulamere ora rendepona rali puaya. Gupuma nipu yanda pulamere ora rendepona rupa puaya. 12Nipuna leere kalo rumboma repana lengame andaya. Gupuma nipuna kalunare kini alinuna kalu ranguna ora andapu andapaya. Nipu mandaa bi menda wape paya. Go biri mendame kone na-wiapare nipuna komea kone wia.
13Mandaa yamaya akare weeme koyoma rumbaya. Nipuna biri Ande Godena Angele leme. 14So epeni nane ara nipu rapu yanda puaeme alinuri nipu raluma puame. Go alinuri kaakepi osi mena mandaa kaakepi akanu marapale puame. 15Nipuna angaa parare ora nee waru ae banasi rai opopao epa. Go rai ma-pamualo arare andayaya raayo lu rambualia. Gupuma nimu ora puri pale rupa andere pirape eina Godeme puri adea. Nipumi monde waini ipa muame para waini kili rakupi rambualia. Go au pi eiri ande Gode ora puri waru pale alina rono pangala ei. 16Nipuna mandaa akana pange pala mandaare Kini alinuna Kini pange Realinuna Reali wape pameya.
17Go ei andoma piriri wala eindiolo ali menda naare mandaa reka aripa ei andawa. Nipumi ora so yaa rangala para ria pamualo arimiya yaanu para andapu wi loma gupi la. Godena yawe ora andaai pambolame piale epa mombealepa la. 18Kini alinu pange ami alinuna kalu alinu pange ami alinu pange osi menanuna pange go osi menanu mandaa piruame alinu pange pakama pupudengi nao-aeme alinu pange pa aeme alinu pange komape endapenu raayo nimuna do mindi go yaanumi epa nalepa la ei pangawa.
19Go ei andomare go ei andawa. Ande rarane ale pange go suna aeme kini alinu pange nimuna ami alinu raayo yanda pulame mombeame. Nimumi yanda pulapame repaare monde yaakopi osi mena mandaa pira Ali pange nipuna ami alinu rapu yanda pulameya. 20Ande rarane ale ange go alena lee rona na-ande aunu puma makirae aunu puae poropedi ali raida dipula mea. Go na-ande aunu pa eimiri go au pa. Ande go rarane ale manda mea repana kaneme wari ale para yainya puae repaa pange ande rarane alena maka nimuna dona lu ma-pirao-aisimiya wenaali makirao aripa. Ande rarane ale pange yayapi angele waloae poropedi ali raidipuna pa pirapale mo salopa lee dangame ralo ae repana para Godeme ma-loparipa.
21Go rarane ale ami alinu raayosi lu rumbisaya. Go alinu lii auri monde yaakopi osi mena ma-pamisaya alina angaa para ipisaya banasi raimi liisaya. Nimuna do mindi raayo monde yaanumi noma rumbame.
Currently Selected:
Penameyaya ei 19: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
