Penameyaya ei 20
20
Sadani kuni gipa daoseni dipula pidia lea ei
1Go ei andoma pirano loma eindiolo ali menda epeni nane aoma epa ei andawa. Nipuna ki parare ande koae remonu pirinaya kuda punyae nekana pora lombape ki siambao pange seani pu kenda ora andaai pi ei siamba aripaya. 2-3Ande eindiolome ande ualame ande ale seseka loma ripinyalisaya. Go ualame ande alere ande ambaisena ao-aisaya Koae Remo. Go koae kerore ande Sadani para lea. Mo eindiolome seseka loma seinimi yolomu andia. Andima nonde koae remonu pambo piri neka andaai para loparipa. Go nekana angaa pora pomare ande eindiolome pare au sia. Go Sadani go para pirinyaloma kuni gipa daoseni ora popelea. Nipumi go pidia naarena wenaali na-makirao-alia. Go kuni gipa daoseni peredea dinare pa rimbao komea lombo rapalia.
4Go ei andoma wala ande kini alinu piru-aeme seanu andawa. Go sea mandaa pirame wenaalimiri andasu andere pirape eina puri alaya. Ande Godena angele pange Yesumi walisaya angele lari pamisimiya wenaali liisimiya wenaalina remonu pange andawa. Go wenaalimiri ande rarane ale pange nipu manda muma repana kaname warisimiya alenu repara yainya na-pisimiya. Gupuma nimuna wenona pange kina pange go rarane alena makanu pange na-wisaya. Go wenaaliri endoma ipuma Keriso rapu kini ali leale andere pirame. 5Go pamepare wenaali mendapare ambe na-rekeleme. Monde daoseni komea kuni gipa peredea dina rekeleme. Go wenaaliri ande ora ririna rekola peme wenaali. 6Go ririna ma-endada wenaali rapu rala pale alimi wenaaliri raname waru komena. Akepeare komala eimi nimu laapo pa ora na-waralia. Nimuri Gode pange Yesu laapona alinau puaeme wenaali alimi. Gupuma nimu Yesu rapu ara andasu kuni gipa daoseni komeana rupara andere pidimi.
Sadani lu rambu pereyaya ei
7Ande kuni gipa daoseni komea peredeandare Sadani dipula pira ei peredea. 8Go au piliandare Sadani nipumi andayaya raayosi puma wenaali makirari pamilia. Go andanuna binuri Gogo pange Magogo le andanu. Sadanimi go para aeme repaa raayo yandana karu epelea. Go wenaaliri ande ipa para wida kekela manda ralalimi. 9Go wenaalinu su kuni alenda alenda para ao-kopolialimi. Gupuma ande Godena raname komea andaa anda pange nipuna wenaali pambo paleme paranu ma-ao-kopolialimi. Go peapare epeni nane repana lenga ipuma ma-koyalia. 10Gupuma Sadani ande wenaali makirara puayande aliri repana ralo ae para pange salopa lee danga ralo ae para ma-lopalia. Ande yayapi poropedi pange ande rarane ale laapo raida go para ambala pipi. Go para ara nimu rimba pange yapiyalosi rendaa na eiri pualimi.
Ande wenaali rali pia di
11Go einu ando pereyano lomare ande kini alinu piruaeme sea yaakopi ei menda andawa. Go sea mandaa piraya Ali pange andawa. Su pange yaa laapo raida nipuna lee rona na-ae pane pereyape. 12Gupuma ande komame wenaali raayo amo ali pange narali ali pange raayo Godena seana lee rona epa arimi. Bukanu andapu lombo siameya. Go au puma buka menda lomba. Go bukare ande endo-ae wenaalina bi wi buka. Go komeme wenaali raayo mo bukanuna leme rupa nimumi peme einu andoma rali pa. 13Ande ipame mi wenaali pange epame. Komala ei ma-epada ei pange komaleme wenaali aeme para aeme wenaali pange epenaya ma-rapape. Go wenaali raayo nimuna peme einu raayona rali pa. 14Gupuma Komala ei pange komaleme wenaali aeme para raida ande repana ralo ae para ma-loparipa ei andawa. Go repana ralo ae parare ande laapo pa komaleme ei midame para. 15Menda ali apimi nipuna bi monde endo ae bukana na-wape pilia repaa raayo go repana ralo paliala puae para loparimi.
Currently Selected:
Penameyaya ei 20: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
