Penameyaya ei 18
18
Babiloni anda perelea ei
1Gonde einu andoma pirano loma eindiolo menda epeni nane aoma epa. Nipu ora puri waru wi eindiolo epa. Nipuna dona paa paya eimiri su alenda parasinu raayo paa pula epa. 2Nipumi e ora andaai lalo ara gupi la. Ande poya loaeme Babiloni andasu ora koya ora koya la. Gupuma ambiare kolapunumi pange koae remonu pamboaeme. Koae koae nape nae yaanu go para pambo pimi. 3Akepeare Babiloni nipuna na pakenumi go suna aya andanu raayo ma-koyaripa. Go au pa auri ande puri pale waini ipa nipumi ada ei noma keyada rupa manda. Go suna kini alinumi nipu rapu pake name. Gupuma anda menda menda para olemole kamboma yangi meala puaeme alinu raayome nipuna raname komala alenu aloma ma-amo yao pa.
4Go ei pangoma pirano loma wala so epeni naneyame ara mendame wala gupi la ei pangawa.
Nina wenaali nimiri nipuna rupara na-ae ipulupa la.
Nipuna koae aunu pia eimi nimi warapanayanda
lalo la.
Nipuna rendaa mula pea ei nimimi milimi
ipulupa la.
5Babiloni nipuna koae aunu pea eiri ora andaai
Godeme pange kone wia.
Godeme go andasu koae yangi ora adea.
6Nipumi nee para pande rupa yangi meape.
Nee para koae aunu pea ei nipu para pange
nipumi paa ei wanduaoma palapape.
Nipumi nee koae ipa giala pa eiri neeme pange
nipuna gea rupa wanduaoma ora puri pale ei
alalapape.
7Nipu ora rendaa waru adapape.
Akepeare nipuri pa wi alena kuma pi enda no
paleanda lalo.
Akepeare nipumi lalore gupi loaya.
Niri kini wena go pinda loaya.
Niri waisa wena na-pi lea.
Ni waisa wena ora na-alua.
Koae yandanu neeme menda ora na-andola loaya.
8Go eina reenare naare mendana nipumi
ora koae yandanu andelea.
Yainya gipa pange pu koda pea di pange
reame komola pea di epelea.
Repaname nipu kiru pilimi.
Akepeare go au pula pea Gode nipuri
ora puri waru palea.
9Ande go koae andaa anda rapu koae aunu puarimi kini alinu go anda andalo ara ree ora deme. Ande repana sula oposiado ara londo yawelea ei andeleme. 10Go londo oposiada ei andolamere mo kininu papare ara andeleme. Akepeare go anda ralo ara nimu warapanayanda. Nimumi gupi deme. O ora kolea, ora kolea deme. Go au pi auri ande puri waru pale anda para gole pia deme. Nee koae yanda ma-andada auri pa onge naarele ruparasi gole nee ma-koyao rumbala deme.
11Ande go suna ara pange enda olemole rapao-aeme repaame pange ree deme. Akepeare mendame nimuna endanu na-kambeleme. 12-13Mendame nimuna golo pange silipa pange ora yangi andaai kana kili pange epepe kalu sekerenu pange muni andaai piralapi epepe busupi aka pange silika aka pange weepi akanu pange yangi andaai pualapi repana pange elepandina kapona wari alenu pange yangi andaai repana wari alenu pange boronisi wari alenu pange aioni wari alenu pange epe kana wari alenu pange epepe roropo pi repana keranu pange ripanenu pange sinamoni danga pange waini ipa pange roropo pi olipi repana ipa pange epe roropo pi danga pange epe palawa pange widi wai alenu pange gawa para sipisipi laapo pange osi mena pange osi mename yolo aya kawere pange pakama pupudengi nae alinu pange ora pa aeme alinuna remonu pange raayo ora mendame na-kambeleme.
14Ande olemole kamboma rapala puaeme alinumiri nipu para gupi deme. Nena siawe kone suma kone rulala pae alenu raayo alu paripa, deme. Nena amo alenu pange nena puri raayo alu paripa, deme. Gupuma neeme wala go alenu na-andele, deme. 15Go anda para olemole kamboma rapala puma amo aeme repaame mo anda rala ei andolamere papare ara andeleme. Akepeare mo anda ralo ara nimu warapanayanda. Nimumi ree ora andaai deme. 16Koma su ara gupi deme. O ora koae yandanu andalema deme. Ande ora epe andame pia deme. Nipuna busupi pange weepi yamande akanuri ora epepe alenumi wari akanu deme pange kana ora andaaimi kambe ki ropanu pange golo pange kalu sekerenu pange ma-ropanu yamo pae deme. 17Go peapare yapi di komeasina rupara gole go amo alenu raayo alu paripande deme.
Andaa sipinu andere-aya alimi pange ma-pamu-aeme alinumi pange pasindia pamu-aeme alinumi pange go ipa runa pamuala ara muni muarimi alinu raayome papare ara andalo ara gupi deme. 18Ambaisananu pange gupi anda menda ora na-aisaya deme. Repana sulame go anda ro lambealo ara londo roalia ei andalo ara ree deme. 19Nimumi yai sialo ara koma suma gupi deme. Ande andame gole peale anda ae deme. Ande ipana pamuala ara sipinu pange kawasonu ma-pamuala ara amo au lamendele go andame alande alenumi pamende. Go peapare yapi di komeana rupara gole go alenu raayo alu paripande deme.
20Go einare epeni andasu raname komape. Godena wenaali pange Godena aposolo alinu pange Godena poropedi wenaalinu raayo raname komale pa. Akepeare nimi ma-koyaripa rupare Godeme go anda ma-koyaripa.
21Go eina kou parare puri ora waru pale eindiolo mendame kana menda ora andaai ande palawa adupi aya kana kili mandana ipa para ma-lo pada ara gupi la. Go kana ipa para alu pula pula rupa ande poya loaeme Babiloni anda pange ora wala na-andeleme. 22O Babiloni anda o. Mendame nena poranuna ara pange yaisanu ora na-deme. Pualonu pange gidanu pange ora na-dimi. One mone pupudenginu nape rupa ora waru andeme alinu pange alu pilimi. Gupuma ande palawa adupi aya kana kilina enu pange ora na-pangeleme. 23Nena rupara lamepana paa pange na-andeleme. Gupuma nena rupara pange pena ki ropo pimi wenaalinu pange na-andeleme. Nena olemole rapao-arimi alinu raayo go su rupara puri waru pale amonu arimi. Gupuma Babiloni nena yaisa soko aunu puma go suna aeme wenaali raayo nena yayapi angele pangoma nimu makiraripi.
24Babiloni rendaa ale auri go einuna reena pa. Ande poropedi alinuna pange Godena wenaalinu raayo nipumi liianda. Orae. Anda menda menda para liiame repaana rendaa pange nipumi mida.
Currently Selected:
Penameyaya ei 18: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
