Penameyaya ei 17
17
Ali pake noae wenana angele
1Ande mendane ki pereya mendana laapo koponu sia arimi eindiolo mendame ni para gupi la. Monde bi wi ali pake noae wena rendaa ada peme rupa andainya ipuae la. Go pake noae wenare ande e loaeme andaa anda ipa andapuna reena eleme. 2Go suna aeme kini raayore nipu rapu pake noaeme. Go wename go suna aeme wenaalinu rapu pakena dinare ande koae ipa noma keyao-aeme rupa keyarimi.
3Go ei pangoma pirano Godena Sipiridimi ni epa mea. Gupuma weambipi su mendana ma-pua. Go ale para wena menda andawa. Go wenare rarane ale menda wee pupie nai mandaa pirina andawa. Go ale mandaare Gode para ero lala pi angele wape paya. Nipuna kaluri mendane ki pereya mendane kina laapo aripaya. Nipuna kapore ki laapo. 4Mo wenare weepi pange busupi aka maraoma piraya. Nipuna donare golome wari ki ropanu kana kili andaaimi kambe ropanu pange maa para andaio pange ki paranu ma-piraripaya. Nipuna ki parare golome wari kapo menda siamba piraya. Go kapo parare waini ipa nipuna koae aunu puaya ei manda meaya ei siamba piraya. 5Nipuna weno mandaare bi menda kundiripi angele wia ei menda wape paya. Go angelenuna reere gore go loma wape paya. Poya loaeme Babiloni. Neere ali pake noae pange koae koae aunu raayo go suna wida aunu raayona ree. 6Go wenamere Godena wenaali pange Yesu repara kone rulaemenda liimi wenaalinuna wee noma keyaripaya. Ni nipu andoma rungulu mealo pambawa. 7Ande eindiolome ni para lalore, Neere akepea rungulu mealo pambalepae la. Nee repara kundiripi ei mendana ree angele monde wena pange mo nipu ma-pamuala rarane ale nipuna ree la gula la. Mo rarane ale nipuna kaluri mendane ki pereya mendane kina laapo. Gupuma nipuna kapore ki laapo ora aripaya. 8Ande rarane alere ambalare endoma aripa. Go peapare ambiare dia. Nipu nonde koae remonu pirinya kuda punyae anda aoma epelea. Go au puma Yesumi lu ma-komalia. Go su yaa ambe na-wari ara Godeme ande Endoaya Bukana bi na-wape pi repaare go rarane ale andeleme. Gupuma nimumi rungulu mealo pambeleme. Ambalare nipu endoma aripapare ambiare dia. Go peapare werepe wala opopalia.
9Go eiri ora kone waru suma rekele pape eina lea. Go kalu mendane ki pereya mendana laapo kaluri ande wena pia mendane ki pereya mendana laapo kana rumunu. Gupuma kini alinu pange mendane ki pereya mendana laapo manda meaya. 10Go peapare go kini alinu mendane kipuri ambala komeme. Komeamere ambia andere pia. Mendare ambe na-epea. Go peapare ipuma pangere pa ongepusi epa andere pidia. 11Go rarane alere ambalandere endoma aripapare ambiare na-aya. Nipuri ande mendane ki pereyoma mendana repopa ei. Gupuma nipuri mendane ki pereya mendane kina laapo pa ei menda piri kini. Go ale nipu lu ma-komalimi.
12Ande kapo ki laapo andande eiri ki laapo kini alinu manda meaya. Nimuri andasu ambe na-andere pimi. Go peapare pa riambosi ande rarane ale rapu andere pirinaya Godeme puri adea. 13Go ki laapo kininu raayore komea kone komea wimi. Nimumi nimuna purinu raayo ande rarane ale para ademe. 14Go repaa raayore ande Sipisipi menasi rapu yanda pilimi. Go peapare ande Sipisipi menamere nipuna wi la mea repaa pange mea repaa pange nipuna angele pangoaeme repaa rapu ara lu rambualimi. Akepeare nipuri kini alinu raayona Kini aya pange andere pimi alinu raayona Reali aya.
15Ande eindiolo alimi ni para go angele lo pa. Ande pake noae wena pirande ipare anda menda menda pange wenaali ruru menda menda pange angele rando rando leme wenaali manda meaya. 16Ande andaende kapo ki laapome pange ande rarane alemere monde pake nala wena rapu yanda dimi. Nimumi nipuna ole molesinu raayo mupaoma konapusinu pange koyo milimi. Nipuna do mindi lu ma-noma nipu repana para kidimi. 17Godeme nipuna rana pea eiri nimumi painya kone wia ei palimi. Go eiri nimu raayome komea kone suma nimuna purinu raayo mo rarane ale ademe. Godeme go aunu pa pa eiri penaloma mo nipuna angelenu mula epelea dinare pereyalia.
18Ande andaende wenare andaa ree anda menda andere piri kini ali mendame go suna aeme kini alinu raayo andere pimi ei andaende.
Currently Selected:
Penameyaya ei 17: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
