Penameyaya ei 16
16
Godeme pereyado ara gula pea rendaanu
1Gupuma monde alinau puae anda para piri mendame monde eindiolonu para gupi la. Aponde koponu raayo mendane ki pereya mendane kina laaponu pua koyoma suna lopalepa la. Mo koponuna ruparare Godena rono pangala einu pia.
2Go ei pangoma ande ririna eindiolo nipuna kopo no suna koda pua. Go paya dinare koae rerenu ora andaainumi wenaali noma rumbaya. Go rereme waraya auri ande rarane ale pange ande repana kaname nipu manda meaoma wari ale repara yainya pulandere puaeme repaa pange nipuna pare au ae repaa komea wararipaya.
3Go au puma pirina laapopa eindiolome nipuna kopo andaa ipa mandaa loparipa. Go paya dinare ipa raayo kome alina weeme andola ipuma ipa para piri alenu raayo pereyame.
4Repopa eindiolome nipuna kopo ipa mandaa pange ipulu piri ipa mandaa loparipa. Go pa dinare ande ipanu wala wee aulame. 5Go pa dinare ande ipa andere pia eindiolomere gupi la.
Reali neere ora Yaakopi Gode ale.
Neere ambala pange aripi. Ambia pange ale.
Ambia go suna aeme wenaali para
rendaa alale eiri ora anana pili la.
6Go wenaalimi Godena wenaali pange
poropedi alinu ora waru liiame.
Go einare nimu wee nena lale eiri
ora pili kone sialo.
7Go einu andoma pirano lomare monde alinau puaeme pereaya lena wia alena piri mendame gupi la. Reali Gode ora puri waru pade Godeo. Neeme alale rendaare ora anana piliae la.
8Ande malapu eindiolome nipuna kopo para piri ale naare mandaa koya. Go pa dinare monde naare nipuna riripumiri wenaali roma rumba. 9Monde naareme nimu ora roma rumbanda Godena bi ero lala puma piri siame. Akepeare go koae yandanu sese puluri Godeme kome puri wia. Go peapare mo wenaalimi nimuna koae aunu na-giaoma Gode para na-epame. Gupuma nipuna bi na-minyasiarimi.
10Ande supu eindiolome nipuna kopo monde rarane alena seana loparipa. Go au pa dinare rimba ripe monde ale nipuna surumbe repaa repara epa. Mo wenaalimi rendaa ora andaai nalo ara angaa lengere pao arimi. 11Gupuma ande epeni nane ae Godena bi ero lala pamepare nimuna koae aunu na-lekeyame. Go ero lala pame eiri nimuna rerenumi no rumbameyanda rendaa panda lameya.
12Gupuma ande mendane ki pereya komea eindiolome nipuna kopo ande Yuparadisi lee ipa mandaa koya. Go paya dinare ande ipape lomoma kapuyaya. Go kapuli auri monde naare opala naneyame yanda runguli kini alinuna pora piado pameya.
13Go ei andoma pirano loma koae remo repo kurimi ande ei andawa. Nimuri ande ualana angaa para pange ande rarane alena angaa para pange ande yayapi poropedina angaa parayame piruma epame. 14Go koae remonumiri su wenaalimi pape-na-ae aunu puaeme. Go remonumiri go suna aeme kini alinu raayo para puaeme. Go kini alinumi ande puri pale Godena wenaali rali pia dina yanda pinayanda raayo komea para ma-mombeaya.
15Pangalepa. Niri pake nala ali ipuaya rupa epola. Ali menda apimi nipu na-pali pa reka piri nipuna aka yamape ei lelepu sia pidia alimi raname komena. Akepeare go ali nipuri wenaali aya alena polamere konapu yamo pale pelea.
16Go au pumare monde remonumiri kini alinu andasu mendana Iburu angelena bi Amagedoni le andasu menda para epa ma-mombearimi.
17Go aunu andoma pirano ande mendane ki pereya mendana laapopa eindiolome nipuna kopore epeni sone ao su one suma pa runa epa koyo loparipa. Go au pa dinare sonde alinau puaeme anda para aoma ali mendame andapu wi loma lalore Go peredanda la.
18Go angele lo minyabala-ainyare go pa. Repana rekele pa pange sumi sumi pa pange rurupi lia. Sumi sumi ora andaai pa. Go pa eiri ambalande go su yaa kini pulu ara menda pi au diama. 19Go au pa dinare ande andaa ree anda repo rekelepu rumba. Andasu menda nipuna andaa andanu raayo ora koyaripa. Godeme Babiloni wenaali kone na-rungulaisaya. Nimumi nipuna kapona waini ipa nipuna rono pangala ei nimumi nena laya. 20Ande ipa piru kopoliaoma runa su wia andasu raayo alu paripa pange kana rumunu raayo mendaa au pa. 21Gupuma aisi rapu rapu yai ora andaai epa. Mo lopa aisi nipuna kenda puluri 50 kilo mandana. Go aisimi nimu ma-koyaripandare koae angele ora waru andapu Gode repara lame.
Currently Selected:
Penameyaya ei 16: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
