Penameyaya ei 11
11
Godeme rapae poropedi ali laapo
1Gupuma ni repana kuli menda Godeme gia. Mo repana kuliri olemole manda meao-aya ale. Gupuma ni para gupi la. Mo Gode repara alinau puae anda para puma go anda pange mo alinau puaeme pereaya lena pua manda mea la. Gupuma apo para yainya pulu pidimi wenaali pange pua yarepea ae la. 2Go peapare monde Isaraelimi na-mandu rangala pae repaa epa ao-aeme parare na-manda meape la. Akepeare go parare kama nane pa ao-aeme repaana ei. Nimumi ande yaakopi anda rambua rambua pulu pirina sumba ali ria laapo pange ki laapona gialimi. 3Neme nina poropedi ali laapo rapalua. Niipuri pirile pange rungulu pape pi akanu yamisipi. Niipuri yai suma epelepe. Gupuma niipumi naare daosani komea pange anderede laapo pange ali ria repopu rupara angele wala eiri pamilipi.
4Go ali laapore ande olipi repana laapo pange ande lamepa laapo. Niipu go su Reali Gode nipuna lee rona aepe. 5Menda apimi go ali laapo niipu marapaluame pilimindare gore niipuna angaa para repana rala rala epelea. Go au pilia eimiri niipuna yanda runguli ali ma-koyalipi. Gupuma ora lu ma-komalipi. 6Mo niipumi angele walalo-ainyaloma yai na-epelea. Akepeare niipumi yai epapanayanda sese pia eina puri mepe. Onge ipulu piri ipasinu pange wee ma-aulainyayanda Godeme puri alo pea. Gupuma go su pange niipuna rana pilia alenumi ma-koyainyayanda puri alo pea. Niipuna rana pilia dina go aunu pinya dea.
7Niipumi mo Godena angele lo pereyalipi dinare rarane alepe menda opolo ipuma mo ali laapo dia. Mo rarane alere no koae remonu kuda para ma-pirae para aoma epelea. 8Gupuma mo ali laapo niipuna rore mo andaa andana porana wilimi. Niipuna Reali pange go andaa anda para lu andiaisimiya. Go andaa anda manda meaya eiri Sodomo pange Idipi anda loma leme.
9Wenaali one mone angele le repaa pange one mone ruru raayo pange go ali laapona ro pa andoma epala puala pilimi. Gupuma mo ali laapona ro dapa pipa pi na-deme. Go au pulu pirinyaloma yapi repo pereyaoma malapu ei na runa peredea. 10Go suna aeme wenaalimi mo ali laapo komalepe eina ranae loalimi. Nimumi go eina raname komalo ara olemole menda pa alama alama pilimi. Go ali laapomere wenaali repara koae yanda kama ma-andala pape eina reenare go au pilimi.
11Yapi repo aomare malapu yapina runare Godeme mo ali laapo ma-rekaripa. Gupuma niipu andame wenaali raayo paalame waru komame. 12Ande ali laapome so yaa nane go angele epa ei pangape. Go niipi ipulupa la ei pangape. Go la ei pangomare niipuna yanda runguli alinumi andambainyaloma sone koaa para pua oposiaoma puape. 13Go aleme ande andaa andare ki laapo rekele pumare rekelepena menda para aripa alenu raayo su momani puma ma-koyaripa. Wenaali daoseni mendane ki pereya mendane kina laapo ma-koyaripa. Pa arimiya wenaali raayome paala komala ara pururumi komoma so epeni aya Godena bi minyasiarimiya.
14Ande koaeyanda laapopa eiri go peredapare repopa ei repara epelea.
Ande mendane kina laapopa bu kenange
15Gupuma ande mendane kina laapopa eindiolome nipuna bu kenange liia. Go pa dinare so epeni nane angele ora andapu lalo ara gupi lame. Ande go suri naana Reali Gode pange nipuna Keriso nipuna ei lame. Gupuma Kerisome ora pa andere ari pea lame. 16Go lame ei pangomare ande ali ria komeana malapu kalu alinumiri nimuna pirame alenu minyapalaoma Godena pira lena epa andanyao lopoma yainya pame. 17Nimumi go angele lame.
Reali Gode neere ora puri waru pale Gode.
Neere ambala pange ao-paya pange
ambia pange pa ale.
Nena purinare go su yaa laapo apo andere pili.
Go einare nee para ranae angele dama.
18Ande nena angele na-mi wenaalimi rono pangame.
Akepeare nena rono pangola pele di epande.
Ande komeme wenaali rali pula pele di pange epa.
Ande nena pupudengi nao-aeme poropedi ali pange
ande nena rolo para panda puma yainya puaeme
repaa raayo amo alinu pange narali alinu
nimuna yangi mula peme di apo ipulanda.
Ande go su ma-koyao-aeme wenaali ma-koyape di
pange apo ipulanda.
19So epeni nane ae alinau puaeme anda pange lombame. Gupuma ande ki laapo angele wi kesi pange go para wia ei andame. Gupuma repana rekele puma pange su momani pupa pange aisi yai ora andaai ipupa ei andawa.
Currently Selected:
Penameyaya ei 11: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
