Penameyaya ei 12
12
Wena menda pange Sadanina angele lea ei
1Go au puma nande au menda so yaa para andawa. Gupuma wena menda andawa. So naarere lame leale yamoma aripa. Gupuma nipuna ange rolo parare sumba ra. Nipuna kalunare ande kini alinuna kalu aka mararipaya. Mo kalu akanare kumba danga ki laapo pereya angena laapo ora piraya. 2Nipu naki panda piruma repara manduameyanda piraya. Gupuma nipu naki kou na eimi ree lalo piraya.
3Go au andoma pirano so yaa para wala pare au menda pa. Uala peme ande ale menda ora andaai wee pupa pea ei andawa. Nipuna kaluri mendane ki pereya laapo aripaya. Go kalu raayonare kini alinuna ranguna andapaya. Gupuma nipuna kapo raayo ki laapo opaya. 4Nipuna apumiri so kumba raayo kumbura repo aoma kumbura komeare suna ma-loparipaya. Go ualame ande aleme monde wena nipuna lee rona aripa. Go au pi auri monde naki mandu loparipa alena ma-nalomeya maisambao-aripa. 5Monde wename naki mainda. Go nakimiri andasu raayo andere pidia. Go payapare ande nakiri pane rambamuma so Gode nipuna piruaya seana ma-puame. 6Ande wenare Godeme wapu siae weambipi suna puaya. Go ale parare nipu naare daosani komea pange anderede laapo pange ali ria repopu rupara alia. Go ale para nipu ora epe rupa andere-alimi.
7Gupuma so yaa nane yanda ora andaai reka. Maikolo ande eindiolo pange nipuna andere pia eindiolonu raayo pange ande uala rapu yanda pame. Go uala pange nipuna eindiolo rapu aperaoma ara yanda pame. 8Go pamepare monde uala pange nipuna kou nane koae rali eindiolonu raayo lu ma-rambuarimi. Gupuma nimu wala epeni nane na-ainya lame. 9Gupuma monde andaa uala ralu rumbame. Go ambaisena ae kero Sadani nipuna bi menda Koae Remo pane pu loma suna nipuna eindiolonu rapu ralu liiame. Golemere wenaali raayo koae aunu kama ma-pao-aya.
10Gupuma so epeni nane angele andapu lame ei pangawa. Go angele lalo ara go lame. Godeme nipuna wenaali rambamilia. Godeme nipu kini loma nipuna puri wadea. Ambiare nipuna Kerisome nipuna puri wada. Akepeare ande Sadani Godena lee rona nipumi naana amenumi na-pi einu la ma-ria ria pulame pa na-aya lame ei pangawa. 11Naana amenumiri Sadani lu rambuarimi. Go au pi auri ande Sipisipi menana weena purimi pange ande nimumi lari pamuaeme Godena angeleme pame. Nimu komape einuna kone na-siame la ei pangawa. 12Nimi so epeni nane aeme repaa raayo raname komalepape. Go peapare nimi suna pange ipa para aeme alenu nimi komea yarae. Akepeare ande koae remo nimi repara apo epa. Nipu rono ora waru andapu pangala. Akepeare nipu kone widapare nipu pa onge naaresi komea widanda, lalo la ei pangawa.
13Ande ualame nipu suna pu lame ei pangomare ande naki maindande wena waisa. 14Mo wenare yaa ida yamana popa laapo mumare mo weambipi suna nipuna anda para ria pua. Monde ualame nipu warapanayare go para kuni gipa repo aoma sumba mendane ki pereyaoma komea go para panga pirualia. 15Monde wena ria penayanda ande ualame nipuna angaa para ipa lombo raparipa. 16Go payapare ande su rekele puma ande ipa pa go para punyaripa. Go eimi monde wena rambamea. 17Ande uala go ei andoma rono ora andaai panga. Gupuma monde wena nipuna mandu rangala pae wenaali rapu yanda pulame pua. Go wenaaliri ande Godena angele pangoaeme repaa pange ande Godena angele Yesumi walisaya einu raluaeme repaa. 18Go au puma ande uala monde ipa reena aripa.
Currently Selected:
Penameyaya ei 12: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
