Dieimusi 1
1
1Go ramayo wape pi ali niri Dieimusimi wape pi. Niri Godena pange Reali Yesu Keriso laapona pupudengi nao-ae ali. Godena wenaali alenda alenda raayo para rapa rapayo aeme repaa nimi repara epe naare lalo.
Kone rulada ei pange epe kone rekelepu wida ei laapo
2-3Nina Keriso yangonuo, nimi repara la andala einu epeleandare raname komalepape. Akepeare go kendame komala arayapare nena kone rulale ei na-minyapalalindare gore one mone kendanu manda rurumbari pele lo walale. 4Neeme go kendanu riaeri polapele ei na-ongelenalape. Go au na-pinyalape. Go au pilindare nena Keriso aunu puri paloma epe rupa ari pele. 5Nimi mendana rupara epe kone su rekele pi au menda dia deandare gore Gode lora pinya. Godeme ora adea. Akepeare Godeme nipu repara konge leme alenuri pakama yarame komalo ara aloaya. 6Nimimi yainya pilimindare Godeme manda pange lea kone sualepape. Nimimi kone laapo laapo na-sialepape. Kone kone su rapelendare gore pape au marala ara kalu andalu pia rupa manda. 7-8Go rupa pape au marelea ali nipuri Gode repara alenda mula kone na-siape.
Amo aunu pange narali aunu
9-10Narali alia Keriso alimi Godeme nipuna bi minyasialia dina raname komena. Gupuma Keriso ali menda amo alia ali nipumi pange Godeme nipuna bi minyanialianda pange raname komena. Akepeare amo alenuri na-poae palawasinu manda kapuyo rumbeleme.
11Naare raeri epea dinare nipuna riripu pea eimiri gonde palawasi ope repana rea. Go pea dinare gonde palawasi suna lopea dinare nipuna aulea ei ma-koyaya. Mendaa rupa mandare amo ali pange nipuna pupudengi naeri pulu-ainya nipuna amo alenu kodea.
La andala eina ree
12La andala einu ipulu-ainya puri paloma alia alimi raname waru komena. Akepeare nipumi go la andala ei wandualiandare nipumi yangi milia. Go mula pea yangiri ande Godeme nipu raname komeme wenaali repara ada pea endoaya ei. 13Ali menda la andala eimi ma-lopaliandare go ni lopalo eiri Godeme ma-pada lo na-lena. Akepeare koae eimi Gode na-ma-lopalia. Gupuma Gode nipumi menda ali lopenaya la andala ei na-adea. 14Ali menda go au puma lopala ali nipuri nipuna ora meawe o ora pula loma wee pambada aumi ma-lopalia. 15Nipuna wee pambada einumiri koae aunu pia ei maida. Koae aunu pia ei pa eiri puma moneginare gore komala ei ma-dia.
16Nina Keriso amenuo, mendame nimi na-makirainya dapape. 17Pakama midama ora epepe alesinu raayo Epeni andasu naneyame epea. Apa Gode ande kumba danga pange sumba naare laapo wapea alimi gida alenu. Nipuri naare raayosi paa pa puaya. Gupuma paa pi ei rimbada eimi na-ropo pea. 18Apa Gode nipuna gole nipuna ande wenaali rambamida ora angeleme naana remonu endoaya ei aloaya. Nipumi go pea eiri nipuna pula lea au pange nipuna wapu perere pea alenu raayosina kalu piramanaya pea.
Godena angele pangoma pia ei
19Nina amenuo, go ei kone waru sialepape. Wenaali raayo angele pangape einare wangepu pangalepape. Go peapare angele yokobo lape einare pawa piruma lape. Gupuma rono pangala ei pange rana komea rono na-pangena. 20Akepeare alina rono pangala aumi Gode nipuna pinya kone wia au na-puaya.
21Go einare koae pungu pi aunu raayo gialepape pange koae rupa ao-paida ei pange gialepape. Godena rolo para ao palumare Godeme nena pu runane laneda angele waru meape. Go angeleme nee manda rambamilia.
22Angele komea pangomayapare mo angeleme da au na-pilindare nena gole nee makirade. Kaleme komea pangoma na-giae ora go angeleme da au waru pualepape. 23-24Angele pangomayapare gole na-pia ali nipuri gore wasupana nipuna do pea au andala ali manda. Nipuna do pea au waru andomayapare gole mo wasupa minyapalala pula dinare nipuna do go pe andelore go gole kone rungulada ali manda. 25Go peapare ande ora epe rudule angele waru pangoma pualiandare go ali nipuna pilia aunu raayo ora epepe aunu pao-alia. Go angeleme dea aunu kone na-rungulae ora repara repara pu pango aliandare Godena ora epepe aunu palia. Ande Godena angele ora rendepole angeleme wenaali kepe rapao-aya.
26Ali menda nipuri Keriso ali go ayo deapare gole nipuna angaa kambulu waru na-andere-aliandare gore nipuna Keriso aya eiri ree menda na-wia. Gupuma nipuna gole nipu makirada. 27Apa Godeme ora epe Keriso au kone wia eiri go au puaya ali. Kale nongo nakinu andere-aya ei pange waisa wenanu monde kendanu midame ei andere-ao-aeme repaa komea ora Keriso au wademe. Go au pulu ara go suna aunumi nipu ma-koyapanaya nidi puaeme repaa komea ora epe Keriso wenaali.
Currently Selected:
Dieimusi 1: POLENT23
Highlight
Share
Compare
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
