Iburu 13
13
Gode rana ma-pape aunu
1Keriso amenu menda menda para pu adapape. 2Nimina anda para lee wili na-ande repaanu pange pa anda mipape. Akepeare ambala pange alinumi go au pisimiya. Pa suna ali menda nimuna anda para anda midame kone siameyapare andere eindiolonu para gole pisimiya. 3Dipula piri wenaali kone sialepape. Nimi pange nimu rapu dipula mendaa pima kone sialepape. Rendaa rupara aeme repaa pange kone sialepape. Nimi pange nimu rapu rendaa mendaa nalema kone sialepape.
4Repaa raayomere repaya aya eiri epelea kone sialepape. Wenanu pange alinu rapu pake na-nalepape. Akepeare Godemere wenaali pake nala repaare ali pe wena o wena lami alimi pilia pangere Godeme rali pilia.
5Muni repara raname komala au na-pape. Nimina ambala sialimi muniri go ei manda pea ae kone sialepape. Akepeare Godeme lalore, Neme nimi ora na-kone rungulalua lea. 6Go einare naame paalame na-kome gupi laminya.
Ande Realimi ni rambamuaya.
Niri paalame na-komola.
Mendame ni repara ale menda na-pilia laminya.
7Ambalande nimina kalu alinu kone sialepape. Nimi repara Godena angele larimi. Nimu aoma komame rupa kone sialepape. Go au puma nimumi pisimiya rupa Gode para kone rulalepape. 8Yesu Keriso nipuna aunu na-ropo pea. Ambalande aripa rupa pange ambia aya rupa pange werepenu alapea rupa pange nipuna aunuri ora na-ropo pilia. 9One mone angelenu wadame einumi nimi pa para na-karu pena dapape. Godena yarame komoma rambamida eimi nimi puri ma-palaliandare gore epelea. Nimina puri midame eiri ande go enda naminale mongo enda na-naminya loma nidi pimi eimi nimi na-wamo pea. Akepeare gurupa angele pangame repaare go einumi na-rambameame.
10Mo Isaraelimi mandu rangala pae wenaalina palai anda para pupudengi noaeme alinumi naana alinau puaeme pereaya lena mandaa wia endare na-neleme. 11Ande Isaraelimi mandu rangala pae repaana alinau puae kalu alimiri go au puaya. Ande ora nonde yaakopu rumbe anda panda parare ande aarinuna wee wenaalina koae einuna alinau puluame ma-epea. Go au pameyapare ande napenuri monde anda puma pirameyalena pape reena kirisimiya. 12Go eina reenare Yesu pange ande andaa andana kama nane lu andiaisimiya. Go au pisimiya eiri wenaali nipuna weeme randepelenayanda pisimiya. 13Go einare naa pange Yesu pisimiya rupa yala mea mea pinya ambalana aunu giaoma Yesu repara epaminya. 14Akepeare go suna naa ora ree aulaoma ala pema andasu menda na-wia. Naare werepe epola pea andaa anda komea go maisambao aema. 15Go einare naame naare raayo Godena bi minyasiaminya. Gode repara naame alinau pema eiri Yesuna rupara pema. Go alinau pi auri angaa kambulumi komea pima. Naana angaa lombalo ara Yesuri naana Reali dema dinare go au pima. 16Menda menda repara epepe aunu pape eina pange rambameape aunu pape einuna kone na-rungulalepape. Akepeare go aunu pilindare gore Gode repara alinau pili ei manda. Gupuma nipu rana ma-pape aunu go pilinda.
17Nimina andaa alinuna angele pangalepape. Nimumi nimi waru andere-aeme. Akepeare nimumi naleme pupudengiri Gode para la ademe. Nimuna angele pangelemendare nimumi raname komalo ara epe rupa pupudengi neleme. Go au na-pilindare gore kendame komoma ara pilimi. Go eimi nimi na-rambamilia. 18Naana yainya waru pala pipape. Naana kone widamapare naana puparare koae aunu pape eina kone na-wima. Akepeare naare raayo naame ora aunu kama pulame rapo aema. 19Godeme ni nimi repara wala rapainyayanda nimimi nina yainya paliminyayanda kongeyalo.
Pora poala ara yainya pia ei
20-21Godeme Reali Yesu komala ei minyapalaoma ma-rekeya. Nipuri ande ora epe rupa Sipisipi Andere-aya Ali. Nipuna komisaya eimiri ande pena angele lo koro wia. Nimimi paliminya kone wia aunu paliminya nimi rambaminyayanda yainya pado. Gode ande kuma pi ei guaya alimi go au pinyaya yainya pi. Godeme Yesu Kerisona rupara nipuna rana pia ei naana rupara pinyayanda yainya pado. Paa pi ei pange puri ora andaairi Yesu Kerisona ei ora pa suari pe ae.
Pereyado angele
22Go einare nina amenuo, neme nimina punu puri ma-palape angelenu lalo ei waru pangalepape. Akepeare go nimi repara rapado ramayore pa peao ei. 23Naana ame Dimodiri dipula minyapalaripa eiri nimi kone sialiminyayanda la gialo. Nipu pa go gole epeleandare gore nimi andaliminyayanda karu epola.
24Go einare nimina kalu alinu para pange Godena wenaali para pange paidapape dapa. Idali andasu para aeme Keriso amenumi nimi para paidapape dame.
25Godena yarame komala ei nimina rupara winya.
Currently Selected:
Iburu 13: POLENT23
Highlight
Share
Compare
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
