Dieimusi 2
2
Wenaali raayo mendaa pea
1Nina amenuo, nimiri naana Reali Yesu Keriso ande naame andasiaoma andoaema alina angele meme. Go einare wenaali raayo mendaa rupa komea raname komoalepape. Mandaa yongale andoma na-rali pipape.
2-3Ali menda ora amo alinumi marao-aeme akanu yamoma pange narali ali menda koae aka pirinu marao nimina mombedeme para epelepe dina neeme monde amo ali komea wamopape einare gupi de. Nee go epe alena epa pira de. Gupuma mo narali ali para neere pa go alena reka de. 4Gurupa angele dendare nimina gole wenaali go rali rali piminda. Nimina konenuri ora koae einu su koyademe. 5Amenuo, pangalepa. Godeme go suna aununa narali alinu Keriso aunu ma amo yaeya. Go repaame pange ande Godeme nipu raname komeme wenaali para gula loma lea wili mandaa mea angele lee repaa repara adea. Go wenaaliri ande Godena Ki Rambuao-aya Ei rupara alimi. 6Go peapare narali wenaali rapuri yanda luale. Neeme kone wipare amo repaame nee ma-bembo lao-aeme. Go repaa nimumi nee yolo ria koso da polame andao-aeme. 7Go repaa nimuri ande nimimi pangamende pange meamende Yesu repara koae angele dame repaa.
8Ande Godena angelena wia rudule angelenu raidindare neeme ora aunu pulu ara pili. Go angelemere gupi lea.
Nena gole nee raname komoale rupa nena repara
paidimi repaa pange raname komape, lea.
9Go peapare wenaali nimuna mandaa pimi aunu andoma rali pilindare gore neeme koae au go pilinda. Go au pilindare Mosesina Rudule Angeleme neere go Rudule Angele rungulu ale ali da. 10Ande Rudule Angele komea rungudia alimiri Rudule Angele raayo runguda.
11Akepeare ande ali pe wena pake na-nape lea Godeme pange menda na-lu komape lo pea. Neeme wena akopu na-runguli-ainya pange ali lu ma-komalindare gore ande Rudule Angele raayo rungulale.
12Ande rudule angele mendamere naa kepe rapaya. Nimimi deme angele pange pilimi au raayo go rudule angeleme rali pilia. 13Akepeare Godeme ali rali pulu arare yarame na-kome ali parare yarame na-komelea. Go peapare Godeme wenaali rali puma sula peapare nipuna yarame komea eimi go wenaali rali pea au lu angulaya.
Kone rulada au pange pupudengi nala au
14Amenuo, ali mendame nipu kone rulayo da peapare nipuna pilia aunumi na-wadeandare go nipuna kone rulaya eimi nipu na-rambamilia. 15-16Repaa menda, naana ame naana ainyanu enda pange akanu dia lena gole neeme lalore Godeme nee repara epe aunu pinya dendare ora ana na-pea. Neeme go alenu na-adendare go lale angelenumi nimu na-rambamilia.
17Go einare nena kone rulale einda nena ao-padia eiminda na-wadeandare gore nena kone rulale ei ana na-pea.
18Ali mendame lalore gupi dea. Mendamere kone rulada au komea pilia dea. Gupuma mendamere epepe aunu komea pilia dea. Go angele da peapare nemere go angele lalo. Kone rulada au pange epepe au pia ei laapo raida mendaa para rambuli pi. Neemere nina pula epepe aunumiri nee repara ni kone rulayo loma wadoa. 19Nena kone rulada ara lalore Gode komea komea aya dea. Go lale angelere ora lale. Go rupa konere ande koae remonumi pange wimi. Gupuma nimu paalame komalo ara pururu ao-aeme. 20Nee keyali ale. Kone rulaya auri pula pelepare nena pili aumi na-wadeandare nena kone rulale eiri kolea lo neme nee wadoa. 21Naana kasua Eparame Godeme ora rendepona ali laya eiri akepeanda lea. Go eiri nipuna pa aunu andoa laya. Nipuna pisaya eimi nipuna naki Aisake Gode repara alinau pisaya. 22Eparame nipuna kone rulaya ei pange pisaya aunu raayo mendaa para rambulialo walea. Nipuna pea aumiri nipuna kone rulaya einu mapuri palaya. 23Ande Godena angele wia bukamere gupi lisaya.
Eparameme Gode para kone rulaisaya.
Godeme Eparame nipuna kone rulaisaya eina
nipuri rendepona aya ali lisaya.
Go einare Eparame parare Godeme nina andami lisaya. 24Go einare ali menda Godeme ora epe ali lea eiri kone rulaya auna komea diayapare nipuna epepe aunu pia ei raidipunana.
25Raiabe ande ali pake noae wena pange Godeme ora epe wena lisaya eiri nipuna pisaya aumi paisaya. Go pisaya auri ande Isaraeli ali laapo duame pisimiyanda rambamu pora mendana rapaisaya.
26Go einare ande remo na-piri dore komea loaemande rupa mandare kone rulada au nipuna pilia aumi pename na-andelemandare gore go ali o wena nipuna kone rulada eiri gore ana na-pea.
Currently Selected:
Dieimusi 2: POLENT23
Highlight
Share
Compare
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
