Iburu 12
12
Naana Apa Gode
1Naa pange go wenaali andapupeme naame pima aunu andolameya naa kopoliao-aeme. Go einare mo naana para sese pia alenu giaminya. Gupuma naa korao rumbuma aya alenu pange giaminya. Go einare mo naana mula pema alenu meaminya raname komopale angirali nali pipape.
2Naana leeme Yesu komea andari pelema. Akepeare naana kone rulaema aununa reere kini pulu pange pereyadore nipu komea. Nipu ekeraisa wapepi repana mandaa komape eina yalame na-komisaya. Nipumi pala yalame na-komea eiri ande komala ei minyapalaoma raname komola ei andola pa eina pisaya. Go werepe raname komola pa eina kone sia eimiri komape eina paalame na-komaya. Ambiare nipuna Apa Godena popeke ki nane pia.
3Nipumi nisaya rendaa kone sialepape. Koae aunu puae wenaalimi nipu ora yanda waru lisimiyapare nipumi kone menda na-wisaya. Go einare nimimi Gode repara kone rulada au na-gialepape. 4Koae aunu puae wenaali nimi rapu yanda pisiminde dinare nimumi nimi na-lu komaisiminde. 5Nimiri Godena nakinuyandare Godeme nimina loponu puri ma-palaluameyanda lisande angelere kone na-rungulalepape. Go lisayande angelere go ei.
Nina nakio, Reali Godeme nimi rendepoyalindare
gore ora waru pangalepape.
Gupuma nipumi nee epe rupa ainyayanda
kee para diandare gore rono na-pangalepape.
6Akepeare Reali nipuna raname kome wenaaliri
rendepoyao aya. Gupuma pange nipuna naki
nongonu loaya repaare kee para ora waru luaya.
7Godeme nimi rendaa giliandare gore aranumi sinu mana doameya pia rupa mandayale kone na-sialepape. Go rendaa naleme eimi go ei wada. Nimiri Gode nipuna naki loma pia. Go suna aranumi mana doameyandare naki nongonu ora waru luaeme. 8Nimi nipuna si wanenu leale kee para na-diandare gore nimiri nipuna si wanenu dia. Nimiri gore ara diale nongo nakinu. 9Naana go suna apanumi naa mana doameyanda naa liiala pamendare gore naame ora waru andasiao andala pama. Go einare naame naana yaa nane Apana angele ora waru pangoma andasiao andoma endoaya ei meaminya. 10Naana suna apanumiri naa nongo nakisinu pirala pama dina komea naana kee para liala pamende. Godeme naa kee para diandare gore naa rambamea pa ainya pia. Go eina reere gore naa nipu manda amonoyanda pia. 11Naa kee para dia dinare naame go dina komea pu kendame komalema. Go peapare werepenuri nee go rendaa nande ei kone sialo ara epe rupa ari pele.
Kingi angelenu pange mana angelenu
12Nimina lupawi kinu puri ma-palao minyasiaoma nimina pururu li angenu puri ma-palao alepape. 13Ora epe rupa komea ao-paidapape. Go eina reere go eina lalo. Nimina Keriso aunu na-kole ora puri paloma epe rupa puri palenayanda lalo.
14Menda menda rapu ora kuma pi rupa ao-paidapape. Gupuma ora rendepona komea ao-paidapape. Akepeare Godere ora rendepona ao-paidia alimi komea andelea. 15Gode nipuna pakama yarame komala ei para kou wademe waru andere-alepape. Romome pia rupa nimina runane aeme wenaalimi gole nimi ma-koyapana waru andere-alepape. 16Mendame nipuna na-mi wena rapu palu papana waru andere-alepape. Isome ande rana komea nape endana kone sialo arare nipumi Gode kone na-wisaya. Gupuma nipu ande ririna nakiyalo nipuna mulapa alenu wandu lisaya rupa. Wenaalimi go au papana waru andere-alepape. 17Nimi go Isome pisaya ei kone wimi. Ande nipuna apame nipu repara yakiliae angelenu menda lenayanda puayapare menda na-alisaya. Akepeare arame mo lisaya angele wala ropo pape na-lisaya. Iso nipumi ree lalo ara go pisaya aunu ropo pulame pisayapare dia lisaya.
18Nimiri ande Isaraeli wenaalimi pisaya rupa na-pimi. Nimuri ande Sanai kana rumuna risaya repana andisimi. Nimumiri puri pale pokiki epaya ei pange rimbayo pambaya ei pange repana rekele paya ei pange ando pisimiya. 19Bu kenange liaya ei pange Godeme angele lisaya ei pangisimiya. Ande wenaalimi go Godena angele la ei pangomare nimumi go lisimi. Naame go alena angele wala na-pangomona la ae lisimi. 20Akepeare mo angele lisaya aliri Godeme gole lisaya. Nipumi angele lalo ara gupi lisaya.
Ali menda apimi o yaa yapa menda apimi go kana
rumu oposialia repaare komena lape lisaya ei
pangoma paalame komisimiya.
21So Sanai kana rumuna piri andame einu andomare ande wenaalimi paalame waru komisimiya. Go ei andalo ara Mosesimi gupi lisaya. Ni paalame komalo eimi ni go pururu adonda lisaya.
22Go wenaali nimiri mo Isaraeli wenaalimi pisimiya rupa mo Sanai kanana na-peme. Go peapare nimiri ande Saioni lee kana rumu manda apo epemenda. Go andare ande pa endoma aya Godena anda Diurusaleme ande epeni nane wia andana lalo. Go andasu para eindiolonu ora daoseni daoseni lo aeme.
23Nimiri ande Godena ririna nakinu mombedame alena apo epemenda. Go nakinuna binu raayo epeni nane wape pea. Gode ande wenaali raayo rali pula pea alina andaa apo epemenda. Ande ora epe wenaali ambaisena komoma ma-epeaya repaa aeme para apo epemenda.
24Nimiri Yesu repara apo epemenda. Yesu nipuri runa aya ali. Nipumi pena angele lo koro wia. Go angele la wia ei puri ma-palaluameya nipuna wee kolena lea. Go weemere ale menda pea. Go alere ande ambalande Ebelona weeme pisaya rupa dia. Go weemere Ebelona weeme pisaya einu lu rambuaya.
25Go einare nipumi angele ale menda dea ei kou na-wadapape. Ande go suna Godena angele larimi alina angele kou walame repaare na-pindipiame. Go eina ande yaa nane ipula angele para kou wadea aliri ora na-pindipidia. 26Go naarena angele lisaya dinare go su pange lewa pisaya. Go peapare ambiare nipumi gupi lea.
Neme go su komea na-lewa lewa pala pepare neme
so yaa pange rana komea wala lewa palua lea.
27Go rana komea wala lewa palua lea eiri go loma lea. Go suna Godeme wari alenu raayosi lewa lewa paoma pane peredea. Gupuma lewa lewa na-pae alenu komea pa alimi.
28Go einare naame raname komaminya. Akepeare naamere lewa lewa na-pape ki rambuao-aya ei memale. Naame ora raname waru komalo ara Gode repara panda punyaoma yainya paminya. Nipuna rana pilia rupa paminya. Nipu ora andasiaoma ando paminya.
29Akepeare naana Gode nipuri ora ralo ralo ae repana manda. Go repanamere olemole raayo ma-koyao-aya.
Currently Selected:
Iburu 12: POLENT23
Highlight
Share
Compare
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
