Iburu 11
11
Kone rulaeme wenaalina angele lea ei
1Naame Gode repara kone rulalimandare gore ale menda ora pilia loma aema. Go pula pea alenuri naame ambe na-ande arayapare golere ora pilia kone suma aema. 2Ambaisena ao-aisimiya wenaalimi Gode repara kone rulaisimiya einare Godeme nimu repara raname komoaisaya.
3Go su yaa laapo warea eiri naame na-andemapare nipuna angeleme gole wapea lore naame kone rulaema. Godemere naame na-andape alenu mumare pename andape alenu waruma wia.
4Ebolo nipuna kone rulaisaya eimi nipuna alinau pisaya eimiri Kenina ei lu rambuaisaya. Nipuna kone rulaisaya eimiri Godeme nipuri ora rendepona ao-ae ali lisaya. Akepeare nipuna pakama Gode para alisaya alenuri Godeme raname komisaya. Ebolo nipu komeapare golere ambiare nipu angele pa da.
5Inokome Gode repara kone rulaisaya eimiri nipu na-komisaya. Nipu na-kome-ainyaloma Gode repara ma-paisimiya. Gupuma mendame nipu na-andisimiya. Ande Godena angele wia bukamere gupi lea. Inoko nipu yaa nane ambe na-pe ara gole Gode raname ma-komao-aisaya lea. 6Kone na-rulalia alimiri Gode rana na-ma-palia. Akepeare Gode repara epelea alimiri Gode endoma aya kone su pange nipu repara kone rulaoma epelea aliri nipumi epe yanginu adea kone siari epeleme.
7Noamere werepe pula pea aunu na-andoma golere ora pilia kone suaisaya. Nipumi Godena angele pangoma kawaso ora andaai wapisaya. Go kawasomere nipu pange nipuna repaa rambamisaya. Go au pisaya eimiri suna aeme wenaalimiri pa aunu pimi lisaya. Noare Gode repara kone rulao-ae ali aisayandare Godeme ora rendepona ao-ae ali lisaya.
8Eparame nipuna kone rulaisaya eimiri Godeme nipuna adoa lisaya andasu para paisaya. Nipumi pola pa andasuri na-ande ara golere pa anda minyapalaisaya. 9Nipuna kone rulaisaya eimiri ande Godeme walisaya andasu para golere parere ali leale ao-aisaya nipu pange ria anda para Aisake pange Dieikopo laapome pisipiya rupa. Niipu laapo pange Godeme adoa loma angele lisaya alenu alisaya. 10Akepeare Godeme ro puma elalia andaa andasu Eparameme maisao aisaya. Go andaa andare pa ao-alia.
11Eparame nipumi kone rulaisaya eimiri nipu nongo nakina ara aisaya. Nipu pange Sera pange yomogae wenagae laapo piriyapare golere Godeme lalore niipi nongo nakinu gula lisaya ei repara kone rulao aisipiya. 12Eparame nipuri puri na-pale ali aisayapare golere nipumi mandu rangala paisaya nongo nakinuri so yaa para aeme kumba danganu mandana. Gupuma pange ipa repaa lena wida ipa kekela manda mandu supaya.
13Go lalo repaa raayosi kone rulaoma komisimiya. Nimumiri Godeme gula lisaya alenu ambe na-mi ara golere kone rulaoma komisimiya. Gupuma nipu pange pa mendana andasu para pa kimisu alinu aeme lo aisimiya. 14Gurupa angele deme repaamere gore nimuna ora andare ale menda para aya loa dame.
15Nimumi mo nimuna giaoma epameya andasu kone na-wisimiya. Kone pa sulapameyalore gore wala lekeya pola pame. 16Go nimuna anda para kone na-wiri mo nimuna pola pameya anda para kome kone rulao-aisimiya. Go andasuri so Epeni nane aya. Go wenaali para Gode nipu para Gode loaeme eina yalame na-komea. Akepeare go wenaalina andaa ree anda ambala wamopu siaya.
17Eparame nipuna kone rulaisaya eimiri nipuna naki Gode repara alinau paisaya. Go eiri Godeme nipu la andisaya. Godeme Eparamena repaa ale menda palua loma wili mandaa misaya. Go eiri kone sumayapare golere nipuna naki alinau paisaya. 18Godeme Eparame para gupi lisaya. Ande nee para nongo naki andapu gula lawande eiri Aisakena rupara gupula lisaya. 19Aisakere komola peapare golere Godeme wala manda ma-rekalia kone wisaya. Eparamemere Aisake komolo pa naki golere wala misaya.
20Aisake nipumi Dieikopo pange Iso laapore werepenu ora epe aunu ando ali pi lisaya. Go einare nipumi kone rulaisaya eina pisaya.
21Dieikopo nipu komolameyare Diosepa nipuna nakinu parare ora epe aunu andelepe ae lisaya. Nipumi nipuna rimapu para pamuala ara Gode repara yainya puaisaya. Go eiri nipuna kone rulaisaya eimi pisaya.
22Diosepa nipu repara komolameya piriri Isaraeli wenaalimi Idipi andasu minyapalaoma pola pameya eina angele laya. Gupuma nipu komeleanda nipuna do para pula peme aunu wenaali para la alisaya. Go eiri nipuna kone rulaisaya eimi pisaya.
23Mosesi onge nakisi pirinare ara angi laapome sumba repome panga ma-piraisipiya. Go naki andapeyapare ora epe naki lisayandare ande kini alina angele rungulape paalame na-komisipiya. Go au pisaya eiri nipuna kone rulaisipiya eimi pisaya.
24Mosesi andayaoma ainyalomare nipuri ande kinina wanena sipi na-dapape lisaya. Go au pisaya eiri nipuna kone rulaisaya eimi pisaya. 25Nipumi pa ria ambo koae aunu pape eina kone na-wi Godena wenaali rapu menda rendaa nola kone wisaya. 26Nipuna kone sialore Reali ande Mesayana pupudengi nape eimiri Idipi andasu para wia amo alenu raayo rambua aya kone wisaya.
27Mosesimi ande kini alina rono pangola pa ei repara paalame na-kome, Idipi andasu minyapalaisaya. Go eiri nipuna kone rulaisaya eimi pisaya. Nipumi ande wenaalimi pange na-andape Gode ande nono pumare wala Idipi andasu nane pope giaisaya. 28Pasopa enda nape aunu pu pange ande pora gape para wee kirala pisaya eiri kone rulaisaya eimi pisaya. Go pora gapena wee ma-kirala pi auri ande Komala ei ma-epao-ae Eindiolome mo Isaraeli wenaalina ririna nakinu komelemeya pisaya.
29Ande Isaraeli wenaalimi ande Weepi Ipare su kamana pi nono puma rungulisimiya. Idipi alinumi mendaa au pula kone wisimiyapare ande ipa ipulu ara ipa nisimiya. Go eiri ande Isaraeli wenaali nimuna kone rulaisimiya eimi pisimiya.
30Ande Isaraeli wenaali yapi di mendane ki pereya mendane kina laapome Dieriko anda ma-kopoliaisimiya. Mo anda kopoliaisimiya alena golere mo andasuna rombala pisaya. Go eiri nimuna kone rulaisimiya eimi pisaya. 31Ande ali pake noae wena nipuna bi Raiabe nipu ande Godena angele yoko ae wenaali rapu na-komisaya eiri nipuna kone rulaisa eimi pisaya. Ande kundiripu ipisipiya Isaraeli ali laapo karu misaya.
32Go wenaalimi kone rulaisimiya einuna angele pa lari ponoyapae. Gidioni pange Barake pange Samesoni pange Diepa pange Deipidi pange ande poropedinuna angele pa lari popeyapare ni naarele diale anda apo na-lalonda. 33Go alinumi andasunu andapu rapu yanda puma lu rumbala puaisimiya. Nimumi ora aunu puma ande Godeme ora adoa loma lisaya alenu ora misimiya. Go au pi auri nimumi kone rulaisimiya eimi pisimiya. Go alinumiri laioni yananuna angaa pora poala pisimiya. 34Repana raloaya ei ora andaai kundinao pange bainasi raimi nimu dia pame ei wanduao pisimiya. Nimu puri dia lisayapare Godeme puri alisaya. Gupuma ande yanda runguli alinu lu rambuaisimiya. 35Wenanumi kone rulaisimiya eimiri nimuna repaa komea ei gole wala ma-rekala pisimiya. Mendane repaare rendaa nape einuna paalame na-komisimiya. Go repaare lisimiya. Nimumi go au pisimiya eiri werepe epola pa epe aunu kone sialo ara pisimiya. 36Gode repara kone rulaisimiya wenaali mendaparere yala mea mea pu pange lu yambu pisimiya. Gupuma mendane wenaaliri seni kopeme dipula meala pisimiya. 37Kaname pange liisimiya pange some runa rungulu poala pisimiya pange bainasi raimi pange liisimiya. Nimu ale menda na-wi wenaali aisimiya pange nimuri epe rupa na-andere-aisimiya pange rendaa andaai alo puaisimiya. Nimumi yamape akanu dialisayandare sipisipi pange nanigosi menanuna yongaleme wari akanu marala puaisimiya. 38Go kengena koae wenaali mo epe wenaali nimu rapu apere ora ana na-paya ae. Nimuri yandana pongola pe wenaali leale weambipi sunaini pange kana rundu naini pange apenda paranu pange su paranu pange wia pondea andaai paranu pamulopala puma paliala pisimiya.
39Go wenaali raayome kone rulaisimiya eimiri Godeme nimu rapu raname komisaya. Go peapare nimumi ande Godeme adoa lisayande alenu na-mi komisimiya. 40Godemere ora epe aunu menda go aunu pange lu angulae aunu naana ei wamopu siaya. Gode nipuna rana pia eiri go wenaali ora ale menda na-rale epe wenaali ainya kone wia. Go pia auri naa rapu runaoma ara pula kone wisaya.
Currently Selected:
Iburu 11: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
